Maka 4:24-34

²⁴Motong la Yesu isudungu betanga ki pang di mulu nen, “Katar talngamim ye betanga yo kalongo nga, inbe lomim kaua urata ye dook. Yesoo, kumata le kakapye be lomim galanga ye betanga kiau punu nga, ngan ole akap lo galanga pang ye betanga tina ipa ye betanga kapala lapau.

²⁵Kumata le sei tool be lon galanga ye betanga ke Maro a itoo nga, ngan ole Maro ipagalanga lono ye betanga ki sa mulu. Bong sei tool yo lon galanga ye betanga ki kasin, bong itoo tiap i, in Maro ole igutak lo galanga kasin yo iken ye ngan le iyepe sokorai.”

²⁶Motong la Yesu iwete pang di lapau nen, “Dada yo Maro be matan kala di tooltool ki ye i, in dawa ben tool atu yo ikap dingding patunu ke kaningi be la ipe ye kumu ki i.

²⁷Le kanakana nga be iken mata bong, too imadit muntu a iyei urata ki nga, ngan dingding patunu tina ngan supadi tisup a tise. Bong tool tani in lon galanga ye dada yo iyei belei a le tisup ye, in tiap.

²⁸Tana ya taunu la iyei dingding patunu tina le tisup a tipu le titar puadi i. Ngan kulkulunu be tisup a tise ngan titar kaidi, motong la titar kuludi, lo ngan be puadi pombe ye nga.

²⁹Inbe ye kene yo puadi tina ngan be imede a imatu nga, ngan ole ikaua sele ki yo matana koene in la isaput ye. Yesoo, lal ke winokanga dingding puana ke kaningi in pombe oo.”

³⁰Motong la Yesu iwete pang di mulu nen, “Ole tawete dada yo Maro be matan kala di tooltool ki ye i, in dawa ben soo so? Too, soo betanga yo be takatte ngan tawete nini ye i?

³¹Dada tani in dawa ben kai yo ene mastet in patunu. Ngan kai patunu kapala yo kupe nga maimai, bong mastet in mitiap.

³²Bong ye kene yo be kupe ye in ngan, ngan ole isup le somai le illos so le imot yo kape kumu lono nga. Inbe ole lo itar baene somaimai le di man yo tiro lang katene nga, ngan ole tire giniu kidi ye inbe tiko ye rur ki.”

³³Ngan tina Yesu iwetewete pang di tooltool ye betanga ke Maro nga, ngan ikatte betanga gaongo leu alunu kaiye pang di. Inbe kumata le be lodi galanga ye betanga ki nga, ngan la be isootoo betebetanga pang di ye dada yo nen in nga.

³⁴Nen le ye kene yo iwetewete betanga ke Maro pang di tooltool ye in nga, ngan ikatte betanga leu. Bong ye kene yo iye di galiunu leu tiyepe ye in nga, ngan iwete nin betanga tina yo ikatte ngan punu le imot pang di a be lodi galanga ye.