Marko 4:24-34

²⁴Au, kala mengen iria asukang ke, “Mi lomon akit a sa mitala longong ia. Ki abis singimi angkokoai palau val lau ang mita abis ia, kuvul ve ngaupap lava.

²⁵Using man a si kapo atogon, ki ngaupap ia, na man a si kapo atogon men lik, io, men lik ang kapo atogon ia, ki luk suai vang ania.”

²⁶Na kala mengen ta, “Vainagoan si God kapo asukang val igenen kapo sukal nei kana matang.

²⁷Na kanla matav na katui ang kala sokopolok na kala polok alava. Parik kapa nas ta kapo saka polok an.

²⁸Roe papalik kapo pakangai ani katui asi kana polok na ka uai. Ainoai ina ka kovkov, le na tis. Akamusai ina kala vaba ta uai.

²⁹Sikei, taun kala matukal, nang palau kala rok ia using kalapo taun ina.”

³⁰Na kala antok, “Au, tara alalangtongai ani vainagoan si God ta sa? Vo tara mengen atokngai ania ta sa?

³¹Kapo asukang val katui i sinapeo. Kapo liklik luai ani keve katui aongos e kuli rina,

³²sikei man ki sukal ia ka polok na ka ngakanan ani keve sukalan aongos, angkoai si ri mani kime ting si marmarip ina.”

³³Si keve kankanuai i mengen duk asukang ke kata akus a ri vap, angkoai si kari nas.

³⁴Keve taun katapo mengen iria si kankanuai i mengen papalik. Sikei man ninia papa ve kana keve nat i akalit, kapo atatai aro iria.