Maki 8:17-36

¹⁷Nehazageno Jisasi'a antahino keno nehuno, nahigeta breti omane'nea zankura huge antahige nehaze? Tamagra ketma antahi amara osu'nazafi? Tamagri tmagu'amo'a eriginefi?

¹⁸Tamavurga me'neana ke so'e nosazafi? Tamagesama me'neana antahi so'e nosazo? Tmagrira tamage'kaninegahie.

¹⁹Ko'ma 5fu'a breti tamanasina, 5 tauseni'a vahe zami'noge'za nene'za atrazama'a, nama'a eka eka kupi erivite'naze? 12fu'a eka eka kupi zogiri'none hu'naze.

²⁰Hagi 7ni'a bretireti tamnasi'na 4tauseni'a vahe zami'noge'za nene'za atrazama'a, nama'a eka eka kupi zogiri avite'naze? Hige'za 7ni'a kupi zogiri'none hu'za hu'naze.

²¹Anante Jisasi'a anage huno zmasami'ne, e'ina'ma hu'noazankura menina tamagra tamagesa antahi'ama nosazafi?

²²Zamagra Bedsaita kumate azageno, mago'a vahe'mo'za avusu hu'nea ne' avare'za Jisasinte e'naze. Avurgare avako hinkeno so'e huntenogu hanaveti'za Jisasi antahige'naze.

²³Ana nehzageno, Jisasi'a avusu hu'nea ne'mofo azante avazu huno kumara atreno megi'a vuteno, Jisasi'a avufi avetu ahenenteno, azanu avako nehuno, mago'azana negano? Huno antahigene.

²⁴Kesga huno avua negeno, vahera vano nehazagena zmagoanagi, zafamo vano nehiaza nehige'na nezmagoe huno hu'ne.

²⁵Anante Jisasi'a mago'ene azanu avurgare avako higeno, ana ne'mofo avurgamo'a hari higeno, ke ankereno negeno maka'zana keama huno ke'ne.

²⁶Anante Jisasi'a hunenteno, kumapina ufrege efrege osunka, fatgo hunka nonkarega vuo huno asami'ne.

²⁷Jisasi'a amage nentaza disaipol naga'ane Sisaria Filipai kumatamimpi vu'naze. Kantegama nevu'za Jisasi'a anage huno zmantahige'ne, Nagrikura vahe'mo'za iza'e hu'za neheze?

²⁸Mago'amo'za, hu'za mono ti frezamante'nea Joni'e hu'za nehze. Hagi mago'a mo'za, kasnampa ne' Ilaija'e hu'za nehze. Hagi mago'amo'za korapa kasnampa vahepinti mago'zmimo'e hu'za neheze.

²⁹Anage hzageno Jisasi'a zamagri zmantahigeno, hagi tamagra iza'e hutma Nagrikura neheze? Higeno Pita'a kenona huno, kagra Kraisige, Anumzamo'ma huhamprino vahe'ama zmavregahanema hu'nea nere hu'ne.

³⁰Agra hu hankavetino mago vahera ana naneke huama hutma ozmasmiho huno zamasmi'ne.

³¹Anante Jisasi'a erigafa huno amage'ma nentaza disaipol naga'a rempi huzamino, Vahe'mofo Mofavremo'a rama'a ata e'nerisigeno, mono kva vahe'mo'zane, ugagota kva vahe'mo'zane, kasegere ugagota hu'naza vahe'mo'za zmefi humiza ahefrisageno, tagufagna maseteno otigahie huno zmasami'ne.

³²Huama huno amate zmasamigeno, Pita'a nentahino Jisasina avaregantiteno, agafa huno e'inahu kea osuo huno kesu'ne.

³³Hianagi Jisasi'a rukrahe huno, amage nentaza disaipol nagatega nezmageno Pitana kesuno, Sataga manignenka namefiga'a evuo, Anumzamofo antahintahi novaririnanki, vahe'mofo antahintahi nevaririne.

³⁴Anante Jisasi'a maka veamokizmi ke hige'za, amage'ma nentaza disaipol naga ene emetru hazageno, anage huno zmasami'ne, mago vahe'mo nagri namage'ma antenaku'ma hanuno'a, agra'a avesi'zana netreno, keka zafa'a erigofino namage egahie.

³⁵Na'ankure iza'o, agra'a manizama'a eri so'e huku hanimo'a, asimu'a atregahie. Iza'o nagriteku'ene knare musenkere'ma asimu'a atresimo'a, manizama'a erigahie.

³⁶Mago vahe'mo'ma ama mopafi fenoza eri atruma nehanigeno, agu amema'a fnanema haniana, nankna aza hu'za erigahie?