Mak 8:17-36

¹⁷Jisasgo koneama, tama agai augwalibolo te po wali, “Magi baso dagego te tiwai po duga hasi mibawe, ‘Dago te bret menio,’ te magi baso obawe? Te dagego homude kone palai elalubo meniwe? Te dage homu kolesaga meni yai elalubawe? Te dagego homu puna paliwe?

¹⁸Dagego gedu elalubo, tama dagego te nai subo meni da, agawe? Dagego olo elalubao, tama dagego te po odobo meni da, agawe? Dagego homugo te bretde gegeda palai dawe?

¹⁹Eno te a naga bret te bidi sese hauwa umabo 5,000 bidi te nai pebedama mani sogo, dagego te nisu naga bonou wa basket te me badu munaluali bretgo pągąwai dawe?” Tama augwaligo te po wai, “Te nogo si olama sągągo si da,” wali.

²⁰“Tama eno te bidi sese hauwa umabo te 4,000 bidi te nai bret te bidi meni yai bulude pebedama mani sogo, dagego te nisu naga bonou wa basket te me badu munaluali naigo pągąnai dawe?” Tama augwaligo te po wai, “Te a naga olama me badu si dao,” te po wai.

²¹Tama agai augwalibolo te po wai, “Tama dagego me konesiąma ebawe?”

²²Tama augwali te Betsaida hanu teba sabolali. Tama te we bidi augwaligo bidi me deli te agaba selasa asali, te aga gedu widai. Tama augwaligo Jisasbolo weyu, te bidiba nogo muao po walio.

²³Tialima, Jisasgo te gedu widai bidigo nogo tola selama, tama agai aga te buluba odasa soali. Tama agai te bidi geduba pesa sąnama, tama aga geduba te nogo ugwadu munama, tama agabolo hanalu wali, “Nago te nai me deli subowe, ma meniwe?”

²⁴Tama te bidigo tonono bilama, tama agai te po wai, “Awe, eno te bidi meba suali. Eno augwali te ni tiwai suali, tama augwali bilaluali,” te po wai.

²⁵Tama Jisasgo nogo aga geduba ma muai. Tama te bidigo bomo elama tonono bilali, tama agai gedu wiegi yai pedelama, tama aga tigidali nai hania sula silai.

²⁶Tama Jisasgo te bidi aga te aga beba tagala palu, tama te po wai, “Nage te bidi dabe bidibo be nani tomoba ma pigio, naga beba dolo pao,” te po wai.

²⁷Te Jisas aga te aga wali pabo bidi dabe dali hogodama, tama augwali te tǫ pedai Sisaria Filipai teba pali. Tama te sunumidu peladu te agai aga wali pabo bidi dabe augwaliba hanalu, te po wali, “Te we bidi dabe augwaligo ena de nogi ebo dawe?”

²⁸Tama augwaligo agabolo te po wai, “Te meba augwaligo nage te we bidi baptais mani bidi Jon nogi ebao. Tama mebago nage te polobadu bidali bidi Elaija nogi ebao. Tama mebago te po weyu, nage te Godigo po pusali polobadu bidali profet bidi me deli da po obao.”

²⁹Tama Jisasgo te augwalibolo hanalu wali, “Duga digi te ena de nogi ebo dawe?” Tama Pitago agabolo po wei ponoyu, te po wai, “Nage Krais dao, e we bidi tau somainu Godigo nage sa muyu asaiba wali bidi dao,” te po wai.

³⁰Tama agai augwali habu seleyu, te augwaligo bidi me delibolo olamu da po wai.

³¹Te Jisas agai te aga wali pabo bidi dabe augwalibolo te tiwai po ola mabo gagalali, “Te Godigo Bidi Mu te aga dene hauwa tolomainu yaibao, tama te Juda dabego tobolu bidi dabe, me te genuai pris bidi dabe, me te Juda dabego bomai po page koneai bidi dabe augwaligo te aga tudiba munama, tama aga ela muaibao. Te nosali sela sogo bidama te aga ma hodaluaibao,” te po wai.

³²Agai te po augwalibolo hania haninama wai. Tama tibaso, Pitago Jisas te sesege badu odasa solama, tama aga dali te tobage po wagio po wali.

³³Tiali goli Jisasgo begelama, tama aga wali pabo bidi dabeba tononalu, tama agai Pitabolo wado iliyu, te po wai, “Satan, nage ena tudi badu soao! Nago te Godigo homu kolesaga wali me pabo menio. Te meni. Nago te tǫde bidigo ebo homu kolesaga naga te wali pobao,” te po wai.

³⁴Tama agai te we bidi agaba asomainu i weyu, te aga dali wali pabo bidi dabe me asomainu yai. Tama aselama, tama agai augwalibolo te po wai, “Te bidi me deligo ena wali asainogo da, te aga digi aga aiyaba elaluama, tama agai e homu yao, aga ena wali pobadi aga dene sobaso da, teda te usu da, te homu ebo bidigo agai aga ni pedai tolasa pabo tiwai eyu, aga ena wali asao.

³⁵Magi baso meni, te bidi me deligo aga digi aga bidabo ula bugagia tonalubo homu ebaso da, te aga bidabo ula te hagawaibao. Tiali goli te bidigo enade te Godigo wiegi yai gesi pode te homu kone palama, tama aga bidabo ula tagalu da, te aga bidabo ula mu saibao.

³⁶Te bidigo te tigidali tǫde doado bage siyu, te aga digi aga bidibo ula tagaluyu da, teda te bidigo genuai wiegi yai nai tama saliwe? Te meni.