SAN MARCOS 8:17-36

¹⁷Pana ngua tii Jesús chaꞌ ná ngua cuayáꞌ tiꞌ nguꞌ biꞌ. ―¿Ni chaꞌ laca ndube tiꞌ ma̱ chaꞌ ná ntsuꞌu na cacu ma̱? ―nacui̱ yu jiꞌi̱ nguꞌ biꞌ liꞌ―. ¿Ha ná jlo tiꞌ ma̱? ¿Ha ná nchca cuayáꞌ tiꞌ ma̱? ¿Ha ndyacu̱ꞌ hique ma̱? ―nacui̱ yu―.

¹⁸Ntsuꞌu siꞌyu cloo ma̱, ¿ha ná nchca ñaꞌa̱ ma̱? Ntucua jyaca̱ ma̱, ¿ha ná nchca cuna ma̱? ¿Ha ná ndyiꞌu tiꞌ ma̱ tsiyaꞌ ti?

¹⁹Nu loꞌo ngusaꞌbe naꞌ caꞌyu tyaꞌa xlyá tejeꞌ ndyacu nu caꞌyu mil tyaꞌa ñati̱ biꞌ ni, ¿ni lcua tyaꞌa chcubi ntsuꞌu yuꞌbe xlyá nu cua nguxutiꞌi̱ ma̱ liꞌ? ―nacui̱ Jesús jiꞌi̱ nguꞌ. ―Tii tyucuaa tyaꞌa chcubi ―nacui̱ nguꞌ jiꞌi̱.

²⁰―La cuiꞌ juaꞌa̱ loꞌo ngusaꞌbe naꞌ cati tyaꞌa xlyá tejeꞌ ndyacu nu jacua mil tyaꞌa ñati̱ biꞌ, ¿ni lcua tyaꞌa chcubi ntsuꞌu yuꞌbe xlyá nu cua nguxutiꞌi̱ ma̱ liꞌ? ―nacui̱ yu jiꞌi̱ nguꞌ. ―Cati tyaꞌa chcubi ―nacui̱ nguꞌ jiꞌi̱.

²¹―¿Ha bilya caca cuayáꞌ tiꞌ ma̱ lacua? ―nacui̱ Jesús jiꞌi̱ nguꞌ biꞌ liꞌ.

²²Loꞌo liꞌ ndyalaa nguꞌ ca nde quichi̱ Betsaida. Hora ti ñaa loꞌo nguꞌ quichi̱ jiꞌi̱ sca nu cuityi̱ꞌ slo Jesús. Ndijña tsa nguꞌ jiꞌi̱ yu chaꞌ sta yaꞌ yu hique nu quicha, ngua tiꞌ nguꞌ.

²³Biꞌ chaꞌ ndayaꞌ Jesús yaꞌ nu cuityi̱ꞌ, ndyaa loꞌo yu jiꞌi̱ ca toꞌ quichi̱. Ngutuꞌu hitya sañiꞌ Jesús cloo nu quicha, ngusta yaꞌ yu cloo nu cuityi̱ꞌ biꞌ liꞌ. ―¿Ha cua ñaꞌa̱ nuꞌu̱ sca na? ―nacui̱ Jesús jiꞌi̱ nu quicha.

²⁴Cua ngulane ñaꞌa̱ nu quicha cacua ti liꞌ. ―Cua nchca ñaꞌa̱ naꞌ xi ―nacui̱ nu quicha―. Tsa lyiji tsa tyaca̱ꞌ ñaꞌa̱ naꞌ, ñiꞌya̱ ñaꞌa̱ yaca ñaꞌa̱ nguꞌ loꞌo ndyaꞌa̱ nguꞌ ―nacui̱ nu quicha biꞌ jiꞌi̱ Jesús.

²⁵Xaꞌ ngusta yaꞌ Jesús cloo nu quicha biꞌ. Loꞌo nguxñaꞌa̱ tsoꞌo nu quicha chaca quiyaꞌ, liꞌ cua ngua ñaꞌa̱ tsoꞌo jiꞌi̱ lcaa ñati̱; cua ndyaca tsoꞌo cloo liꞌ.

²⁶Pana ngulo Jesús cña jiꞌi̱ chaꞌ tyaa toꞌ tyi: ―Ná tsaa nuꞌu̱ nde lquichi̱ juani, ná cachaꞌ nuꞌu̱ jiꞌi̱ ñati̱ na ca nu ngua jinuꞌu̱ ―nacui̱ Jesús jiꞌi̱ nu ngua quicha biꞌ.

²⁷Tya ndyaa la Jesús loꞌo nu nguꞌ nu ndyaca tsaꞌa̱ jiꞌi̱, ndyaa nguꞌ tyu̱u̱ tyaꞌa quichi̱ sube ti ca loyuu su cuentya Cesarea de Filipo. Laja loꞌo ndyaꞌa̱ nguꞌ tyucui̱i̱, liꞌ nchcuane Jesús jiꞌi̱ nguꞌ: ―Loꞌo nchcuiꞌ ñati̱ jnaꞌ, ¿tilaca laca naꞌ, ntiꞌ nguꞌ? ―nacui̱ Jesús jiꞌi̱ nguꞌ nu ndyaca tsaꞌa̱ jiꞌi̱.

²⁸―Ntsuꞌu nguꞌ nu nchcuiꞌ chaꞌ jyoꞌo Juan nu ntyucuatya jiꞌi̱ nguꞌ tya tsubiꞌ la laca nuꞌu̱ ―nacui̱ nguꞌ―. Xaꞌ la ñati̱ ni, nchcuiꞌ nguꞌ chaꞌ jyoꞌo cusuꞌ Elías laca nuꞌu̱; loꞌo xaꞌ la ñati̱ ni, nchcuiꞌ nguꞌ chaꞌ sca jyoꞌo cusuꞌ nu ngua tuꞌba jiꞌi̱ ycuiꞌ Ndyosi saꞌni la laca nuꞌu̱.

²⁹―Loꞌo cuꞌma̱ ni ―nacui̱ Jesús―, ¿tilaca laca naꞌ ntiꞌ ma̱? ―nacui̱ yu jiꞌi̱ nu nguꞌ nu ndyaca tsaꞌa̱ jiꞌi̱. Hora ti nguxacui̱ Pedro chaꞌ jiꞌi̱ yu: ―Cristo laca nuꞌu̱ ―nacui̱ Pedro liꞌ.

³⁰Ngulo Jesús cña jiꞌi̱ nguꞌ liꞌ, chaꞌ ná cachaꞌ nguꞌ chaꞌ biꞌ jiꞌi̱ xaꞌ la ñati̱.

³¹Loꞌo liꞌ nguxana Jesús nguluꞌu yu jiꞌi̱ nguꞌ ndiꞌya̱: ―Ntsuꞌu chaꞌ ca̱a̱ quiñaꞌa̱ tsa chaꞌ tiꞌí nu caca jiꞌi̱ ycuiꞌ naꞌ, masi ycuiꞌ Ndyosi cua nda Ni ꞌna lijya̱a̱ chaꞌ caca naꞌ ñati̱ ―nacui̱ Jesús jiꞌi̱ nguꞌ―. Nde loo la chcuiꞌ tsa nguꞌ cuentyu jnaꞌ; loꞌo nu nguꞌ cusuꞌ, loꞌo sti joꞌó nu laca loo, loꞌo mstru chaꞌ joꞌó ni, lcaa nguꞌ biꞌ chcuiꞌ nguꞌ chaꞌ nu cuiñi laca naꞌ. Loꞌo juaꞌa̱ cujuii nguꞌ jnaꞌ liꞌ; pana loꞌo tyuꞌu scua sna tsa̱, liꞌ tyuꞌú naꞌ chaca quiyaꞌ.

³²Liñi nguluꞌu Jesús chaꞌ biꞌ jiꞌi̱ nu nguꞌ nu ndyaca tsaꞌa̱ jiꞌi̱; biꞌ chaꞌ ngusñi Pedro yaꞌ Jesús liꞌ, nchcuiꞌ loꞌo yu chaꞌ ngua tiꞌ cuaꞌa jiꞌi̱ yu, chaꞌ ngaꞌaa chcuiꞌ Jesús juaꞌa̱.

³³Liꞌ nguxtyacui Jesús su ndu̱ ti, nxñaꞌa̱ yu jiꞌi̱ nu nguꞌ nu ndyaca tsaꞌa̱ jiꞌi̱; ndacu̱ꞌ yu tsiyaꞌ ti chaꞌ nu nchcuiꞌ Pedro liꞌ. ―Tyuꞌutsuꞌ nuꞌu̱ ꞌna, Satanás ―nacui̱ yu jiꞌi̱ Pedro―, chaꞌ ngaꞌaa tacu̱ꞌ loo nuꞌu̱ chaꞌ ꞌna. Siꞌi ñiꞌya̱ nu nclacua tiꞌ ycuiꞌ Ndyosi nclyacua tiꞌ nuꞌu̱ juani, sca chaꞌ nu ndyaꞌa̱ tyiquee ñati̱ chalyuu ti nclyacua tiꞌ nuꞌu̱ ―nacui̱ Jesús jiꞌi̱ Pedro.

³⁴Loꞌo liꞌ ngusiꞌya Jesús jiꞌi̱ nu nguꞌ nu ndyaca tsaꞌa̱ jiꞌi̱, loꞌo jiꞌi̱ nu quiñaꞌa̱ tsa ñati̱ nu lcaꞌa̱ jiꞌi̱ chaꞌ tya̱a̱ nguꞌ slo yu. Nchcuiꞌ yu loꞌo nguꞌ liꞌ: ―Si ntsuꞌu nguꞌ nu chañi chaꞌ ntiꞌ nguꞌ tsaa nguꞌ loꞌo naꞌ ―nacui̱ yu―, ngaꞌa̱ chaꞌ xtyanu nguꞌ biꞌ lcaa chaꞌ nu ntsuꞌu tsa tyiquee nguꞌ biꞌ jiꞌi̱, chaꞌ tyaꞌa̱ nguꞌ loꞌo naꞌ lcaa tsa̱, masi cujuii ñati̱ jiꞌi̱ nguꞌ biꞌ cuentya ꞌna.

³⁵Chcunaꞌ chalyuu jiꞌi̱ nguꞌ si xcuiꞌ nclyacua tsa tiꞌ nguꞌ ñiꞌya̱ caca jiꞌi̱ ycuiꞌ ti nguꞌ; pana quije chalyuu nu ná ngaꞌa̱ chaꞌ tye jiꞌi̱ nguꞌ si tyajaꞌa̱ nguꞌ, masi cujuii ñati̱ jiꞌi̱ nguꞌ cuentya ꞌna, xquiꞌya chaꞌ nchcuiꞌ nguꞌ chaꞌ tsoꞌo jnaꞌ loꞌo xaꞌ ñati̱.

³⁶Ná tyanu chaꞌ tsoꞌo jiꞌi̱ nguꞌ, masi nguaꞌni tsa nguꞌ ngana nde chalyuu nquichaꞌ; loꞌo cajaa nguꞌ, liꞌ chcunaꞌ lcaa chalyuu jiꞌi̱ nguꞌ.