Maakakuṉu 4:21-40

²¹Yiitjulu tjananya yara kutjupa piyuku watjaṉu yalatjilu, “Laampa tilira wiya turaamangka tjarrpatjunanyi, wiya piitangka unngu tjayiṯi tjarrpatjunanyi, yuti waralytjunanyi, tilingaranyingka yaṉangu tjuṯangku nyakunytjaku.”

²²Yara kutjupa tjananya yalatjingku watjaṉu, “Yulytjapaka yarrkatjunutja, ngula yutitjarriku. Wangka yarrkatjunutja, ngula kutju yutitjarriku.

²³Yara palunya nyurrangarri purinypangku kulira tjukarurru nyinanytjaku.” Yiitjulu tjananya yara palunya watjaṉu yalatji nintilkitjangku. Yirriṯi yaṉangu tjuṯangku Katutjaku wangka puṯu kulira wantipayi. Kuwarri yaṉangu tjuṯangku wangka Yiitjunyatjarra kulira nintingku kuliṉi, Katutjalu tjananya ngulytjuṉutjangka. Katutjaku ngurrpa tjuṯangku palumpa walytja tjuṯa tjananya nyakula kulilpayi, “Yilta Katutjalu yaṉangu palunya tjananya ngulytjura kanyiṉi.”

²⁴Piyuku tjananya Yiitjulu watjaṉu, “Katutjaku wangkanyurra purinytju kulintjaku. Wangka palunya yunypangkunyurra kulintjala, Katutjalu nyurranya yunypangku wangka kutjupa nintilku.

²⁵Yuwa, Katutjaku wangka nyurrangarri kulira tjukarurru nyinanytjala, yilta Katutjalu nyurrangarrinya wangka puntu kutjupa nintilku. Tjinguru yaṉangu kutjupa tjuṯangku wangka palunya kulira wantinytjala, Katutjalu tjananya kawaṉtjingalku, palulanguruya munupinalpi nyinaku Katutjaku wangkaku.”

²⁶Yara kutjupa Yiitjulu tjananya watjaṉu, “Katutjalu palumpa walytja tjuṯa ngulytjura kanyilku. Ngurra kutjungka paluru palumpa walytja tjuṯalku. Yalatji tjana tjuṯarrinytja nguwanpa yara ngaatjanya ngaranyi. Watingku tjiiṯa mantawana waṉirinkula,

²⁷ngurrangkalpi yankula ngarriku. Ngarrirra pakara waarrkarringkula piyuku ngarriku. Yalatji paluru nyinanytjala yukiri wiima tjiiṯatjanu pakara ngarala waṉiku. Yankula nyakula paluru puṯu kulilku, yalatji pakaṉutjangka. Wati paluru kulilku, ‘Yaalytjiyaalytji pakaṉu?’

²⁸Walytja pakaṉi mantanguru yukiri wiimatjarra. Palulanguru yukiri tiṉa pakara ngarala waṉiku. Palulanguru mangarritjarralpiya ngarala waṉiku.

²⁹Yalatji ngarala waṉinyingka, wati paluru tjuuḻa kaḻikaḻitjarrangku muṯura yurrara mantjilku.” Yiitjulu tjananya yara palunya watjaṉu, yalatji nintilkitjangku. Katutjalu kutju yaṉangu tjuṯa ngulytjura nyinatjunanyi palumpa walytja tjuṯa nyinanytjaku, yaṉangungku puṯu kuliṉi yalatji, “Yaalytjiyaalytji ngayulu nintilku yaṉangu palunya Katutjaku walytja nyinanytjaku?, Katutjalu kutju nintilku.”

³⁰Yiitjulu tjananya watjaṉu yalatjingku, “Katutjalu palumpa walytja tjuṯa ngulytjura kanyilku. Yurrunpa Katutjaku walytja maṉkurrpa nguwanpa ngurra kutjungka nyinanytjala paluru yaṉangu kutjupa tjuṯa ngulytjulku, tjuṯalingkulpi tjana nyinanytjaku. Yalatji tjana tjuṯarrinytja nguwanpa yara ngaatjanya ngaranyi.

³¹Watingku tjiiṯa yiṯaratjanu mantjira tjawara tjunkuku pakantjaku. Tjiiṯa palunya wiima ngarrinyi, kanya watiya kutjupa tjuṯangka tjiiṯa tiṉa ngarrinyi.

³²Tjiiṯa wiimatjanu tjawara tjunutja pakara tiṉalpi ngaraku. Tjuḻpu tjuṯangkuya yankula pinytjunpa watiyangka palyalku. Palyaraya nyinaku yiṯara palula.” Yiitjulu tjananya yara palunya watjaṉu, yalatji nintilkitjangku. Ngurra kutjungka yurrunpa Katutjaku walytja aapa kutjuya nyinaku. Palunyatjanu Katutjalu yaṉangu kutjupa tjuṯa ngulytjura nyinatjunku. Palulanguru palumpa walytja tjuṯalingkulpiya nyinaku.

³³Yiitjulu yara palunya nguwanpa tjuṯa tjananya watjaṉingi, Katutjaku wangka nintilkitjangku. Wangka wiima nguwanpa kutju tjananya nintiṉingi, wangka tiṉa tjana puṯu kulilpayingkamarra.

³⁴Yaṉangu tjuṯalingkuya tjungurringanyingka, Yiitjulu tjananya yara tjuṯa kutu watjara nintiṉangi. Paluru tjana ngurrakutu yananyingka, Yiitjulu palumpa kutunguḻu tjuṯanya yarawiya nintilpayi, wangka yarrkatjunutja.

³⁵Tjiṉṯu panyapangka mungarrtjirrirra tjananya Yiitjulu watjaṉu palumpa kutunguḻu tjuṯangka, yalatjingku, “Yarralaka!, manta kutjupakutu yurungka wirriḻi.”

³⁶Yiitjunya puutangka nyinanyingka palumpa kutunguḻu tjuṯangku katingu. Yaṉangu tjuṯa tjananya wantikatirraya yanu. Yaṉangu kutjupa tjuṯaṯarraya puuta kutjupa tjuṯangka Yiitjulawana tjungu yanangi.

³⁷Puutangkaya Yiitjunyangarri yankunytjala ngururrpa waḻpa tiṉangku puuta pirrtjipirrtjitjingaṉu. Kapi tiṉa puutangka tjarrparra nguwanpa tjarrpatjunu. Tjarrpatjunkunytjala, yaṉangu tjuṯaya mirrirringamara.

³⁸Yiitjunya yanku ngarringu puutangka ngaṉṯitjayiṯi katamalangka. Nguḻurrirraya yankula kanara watjaṉu, “Nintilpayi, pakala!, nganaṉatju ilupayingkamarra. Nyuntu kulilwiyakampa ngarrinyi.”

³⁹Kanarringkula pakara waḻpa, yuru marrkuṉu yalatjingku, “Ataṉarri!” Palulanguru waḻpa rungkalwiya wiyarringu, yataṉpa ngarangu, yuru pirrtjiwiya ngarangu.

⁴⁰Paluru tjananya marrkuṉu, “Nyaatjanunyurra nguḻurringu? Ngayunya Katutjakuṉu ngangkaritjarranyurra kulinmara.”