Maaku 4:21-40

²¹Yesu ònɛ́: Wìli filia na wà pɛ̃na kùlɛwào. Wìli dilɛ lii zíɛo. Bábana ↄ̃ wì diwào lò?

²²Pↄe ku ulɛa kɛ́ à gí bↄi gupuauo. Asiie ku kɛ́ wà gí maio.

²³Gbɛ̃́ pↄ́ nↄ̀sɛ vĩ, aà swã́kpa yã́pi ma.

²⁴A ònɛ́ lↄ: À laaidↄ yã́ pↄ́ álɛ mawa. Zaa pↄ́ á dàunɛ́, bee Lua a dauɛ́ sↄ̃, i ɛa kã́fĩɛ́.

²⁵Gbɛ̃́ pↄ́ pↄ́ vĩ ↄ̃ Lua a ɛa kã́fĩɛ̀. Gbɛ̃́ pↄ́ pↄe vĩo, baa a yↄↄna pↄ́ a vĩ Lua a siwàɛ.

²⁶À mɛ̀ lↄ: Kpala pↄ́ bↄ̀ Lua kĩ́i dɛ lán pↄ́wɛna pↄ́ gbɛ̃́ kɛ̀ɛlɛ buawaɛ.

²⁷Gwãasĩna ń fãanɛo àlɛ i'on nò, a bɛ̃́ɛn nò, pↄ́wɛnapi ì bↄlɛ ì zↄ̃ↄkũ, gbɛ̃́pi líↄ dↄ̃ lá ì kɛo.

²⁸Tↄↄlɛ mɛ́ ì to à nɛ'i ń azĩao. Ì kakpa gĩaɛ, a gbɛa ì nↄsi, a gbɛa ↄ̃ ì pia.

²⁹Tó à mà, ↄ̃ wì kɛ̃́ ń kↄmao, asa a kɛkɛgↄↄ mɛ́ kà we.

³⁰À mɛ̀ lↄ: Kpala pↄ́ bↄ̀ Lua kĩ́i dɛa ni? Bↄ́ wa lɛɛũòi?

³¹Doe ku lán ɛfↄwa. A tↄ̃gↄↄ a wɛ́na kele dɛ pↄ́wɛna pↄ́ kú dṹnia guuↄla píi.

³²Tó wa tↄ̃̀ sↄ̃, ì bↄlɛ à zↄ̃ↄkũ dɛ dò buiↄla píi. Ì gↄ̃n gèeleↄ pápa, bãↄ iↄ kaka a láu.

³³Yesu Lua yã'ònɛ́ dasi ń yãlɛɛũa bee taaↄ lá aa fↄ̃ ma lɛ́u.

³⁴I yã'onɛ́ yãlɛɛũsaio. Tó à gↄ̃̀ ń a ìwaↄ ńtɛ̃ɛ, ↄ̃ ì yã́pii bↄↄlɛkɛnɛ́.

³⁵Gↄↄ doũpi zĩ́ oosi Yesu ò a ìwaↄnɛ à mɛ̀: Wà bua baale.

³⁶Lá Yesu kú gó guu, aa gɛ̃̀uaànↄ aa dàzɛu màa, aa bíla tò we. Gó pãleↄ gɛ̀ńnↄ.

³⁷Ɔ̃ zàa'ĩan gbãa fɛ̀lɛ. Í lɛ́ gó zãampapa, àlɛ ká a guu e a ye pai.

³⁸Yesu kú gò pↄ̀ↄkpɛ, àlɛ i'o, aà mi di mìbↄↄwa. Ɔ̃ aà ìwaↄ aà vù aa òɛ̀: Mɛtulu! Kɛ́ wálɛ gaga, àlɛ kã̀adanlao lé?

³⁹Ɔ̃ Yesu fɛ̀lɛ gì ĩ́anaɛ, a ò íɛ à mɛ̀: Nílɛ! Zùukɛ we! Ɔ̃ ĩ́ana kpàlɛ, gu kɛ̀ kílikili.

⁴⁰Ɔ̃ à ń lá à mɛ̀: Àkɛa á sea vĩ màai? Asi álɛ ma náaikɛ e tiaoa?