Mak 4:21-40

²¹Ana Yesu pisa sina pan la, pisape “Ita yeririna lala, visae tesilan kap vivaga, yoko ve telawan re to vatanon paket. Peraga, monar tetelan to metava e kana lele nena vena tegoli punu yo.

²²Sanene, nanagane nasup̃enena kiena ne Ntewa sane kapi te ga nene, nap̃a nanagane na molmolue ke e ita narui, vena tegoli sur punu ga, ana sur lala punu ga nap̃a apisawo sike na, a visena wan lala, monar akakate e yomerarava.

²³!Ana amiu punu ga kiligamiu sike na, popon sa aloge kilia kiau visena nini!”

²⁴Ana Yesu naga pis si pan la, pisape “Amiu monar ayagogan ruru kiau visena, asitom ruru la lia. Yaru nap̃a mloge, ana pe taveve re poli, naga yoko tap̃atete loge kilia ruru si narui. Ana yar nap̃a mlogear kiau visena la, naga kilia loge kilia ruru m̃ena kiau navianena la moki nap̃a sa imi si sirau.

²⁵Ana yar nap̃a kiena suri moki pa rui, yoko war ve moki laa va laa sane, ana yar nap̃a pe kiena sur re poli, p̃isi na naga kilalu narin sur nap̃a mla ke.”

²⁶Ana Yesu pisa ke sina ga pisape “Nasup̃enena kiena ne Ntewa naga sa nap̃a kona nap̃a yar tai naga peven ke e kiena porotano.

²⁷Pogos nap̃a peven pae na, pe kila re si sur tai e kurus nene poli. Naga mom̃a momalio ga, tavilo, momalio, tavilo, sum̃alu, salue ga nene yemalo a legiena, ana kurus nen sur nene, naga ga sus plamolue, kapuru ke sanene. Kapuru m̃a pano-o, ana yar nene naga kiliar re kurus nen sur nene kapur ke sanape poli.

²⁸Yar nene kilia re sur tai poli, pano-o korowas la kian pa perina piavi re na p̃ar vinasia, p̃isi na tau.

²⁹Ana pogos nap̃a kinas la menmene ruru po, yar nene siar si miyum̃ae narui, p̃ar kiena playu pa te plan mrasnena lala. “Ana navesup̃enena kiena ne Ntewa naga kapur tekak ga sanene, telivi ke e yomarava wetelu nagane, ana e legiena tai yoko tekirawal pupia mrasnena vam metava.”

³⁰Ana Yesu pisa sina, pisape “P̃elaga navesup̃enena kiena ne Ntewa naga pe tap̃ena ga sike na, naga m̃arera pap̃isi nap̃a nekilia nekirawal si p̃akaiwa tai nap̃a vena visaen sape naga sanape.

³¹Sa nap̃a kurus nen purpa tai yo, nap̃a naga tekaki ga miyuve kurus nen sur tap̃ena la nap̃a temapila la ke e kata lokove lala, naga tekaki na tekaki.

³²Ana pogos nap̃a kapuru keviu, purp̃esia naga pimi keviu miyuve make ga kinanena tap̃ena la nap̃a sike e kata lokove lala. Ana pupia korowas la pap̃isi, nap̃a manu la akilia ava ase ea, vanon kana wamal po, yomanin ea.”

³³Ana Yesu pian ke yeririna la e Lologena Wo e p̃akaiwa la moki sanene, nap̃a sane torokin yoko akilia aloge kilia.

³⁴Visena la punu ga nap̃a pian lania, p̃akaiwa teke loyum̃a, ana pogos nap̃a naga ga sike amio kiena nalogena la, e pogos nene narui na naga sun pisa meraravan kinas nen p̃akaiwa la nene pan la.

³⁵Ana Yesu sum̃a ke e waa nap̃a naga totano e pian yeririna lala, ana ko yepekilavi, naga pisa pan kiena nalogena la, pisape “Ei, ita tokusro teva komp̃as nen lapa vano.”

³⁶Ana kiena nalogena la amligan yeririna la asike na, apa e waa nap̃a Yesu naga teke pa e rui apano. Ana narin waa si lap̃asia asiraun la.

³⁷Narin waa la nene apato m̃a pano-o, pupia lagi tai naga molue, miyu lapa nap̃ane kila pupia sive naga kekela ke e waa, kila na pulen ke e sive narui, lavisi talilu.

³⁸Ana Yesu naga miyulugan ke e yulugana tai e p̃eren waa, monon momalio m̃aga. P̃isi na lala apa apiop̃egeia, ana apisa pania, asape “!Navianena! ?E, sanape pe ositom̃al ita re na lavis tetalilu ne po?”

³⁹Ana Yesu sum̃alu, pis m̃arera pan lagi, a pis m̃ena pan pupia sive la nene, pisape “!Amiu ava ruru amiu!” P̃isi na lagi molue re si poli, yo mare ga m̃eke na.

⁴⁰Ana Yesu pisa pan la, pisape “?Komin ya ne amiu amarau sanene? ?Amiu pe amlelaga re e in poli yo?”