1Ngaatjanya tjakulpa palya Yiitju Kurayitjakuṉu. Paluru Katutjaku katja nyinanyi.
2Katutjaku wangka watjalpayingku Yaatjayalu yirriṯi yalatji wakaṉu Tjaananya ngula utirringkula tiṉarrirra nyinanytjaku. “Katutjalu yalatji watjaṉu, ‘Wati kutju panyapa, Katutjaku wangka watjarinkupayinyaṉa yurrunpa wantirriyalku, paṉakutu. Palunyatjanu ngayulu mayutju tiṉa kutjupa wantirriyalku. Palunyaṉa iyalku yankula tjananya yurrunpa nintintjaku, tjukarurrutjuya nyinanytjaku.’
3Paluru yankula ngurra kapiwiyawanangka nyinaku. Ngurra palula yaṉangu tjuṯa yankula tjungurriku palumpa wangka kulilkitja. Paluru tjananya yalatji watjalku, ‘Yiwarra tjukarurruwanaya nyinama!, mayutju tiṉa paluru nyurrangarrinya ngalyankula nintilku.’”
4Ngayulu Maakalu nyurrangarrinya watjaṉi, wangka palunya yiltarringu. Tjaananya yilta yurrunpa ngalya yanu. Paluru kapingka tjarrpatjunkula tjananya papatatjimilalpayi. Paluru ngalya yankula ngurra kapiwiyangka nyinayinangi. Yaṉangu tjuṯangka tjananya tjakultjunkupayi yalatjingku, “Nyurrangarri kuya palyalwiyangku wanti!, kapi ngaangkaṉa nyurrangarrinya papatatjimilaṉingka, Katutjalu nyurrampa kuya waṉiku palyalpinyurra palumpa nyinanytjaku.”
5Paṉa Tjuutiyanya ngurrara tjuṯaya tawunu Tjarutjalumanya ngurrara tjuṯaṯarraya Tjaanalakutu yankula yila ngarangi, palumpa wangka kulilkitja. Tjaanalakutuya kuya palyalpayi tjuṯangku tjakultjunkupayi, Katutjala kurungka. Yaṉangu kutjuṯu kutjuṯungkuya tjakultjunanyingka Tjaanalu tjananya kapingka tjarrpatjunkula papatatjimilalpayi, karru yini Tjuutanala.
6Tjaananya tjaaṯa kutjupatjarra nyinangi, kamula yinyutjanutjarra. Piilta kamula pangkitjanutjarra nyinangu. Tjiṉṯilyka ngalypuruṯarra ngalkura nyinapayi.
7Tjaanalu tjananya yaṉangu tjuṯangka watjaṉu yalatji, “Mayutju tiṉalampa ngalya yanku. Ngayulu palumpa waarrkana nyinanyi, ngayulu wiya mayutju nyinanyi. Yilta Kurayitjanya paluru mayutju tiṉa nyurrampa ngalyankula nyinaku.”
8Tjaanalu tjananya piyuku watjaṉu, “Ngayulu nyurrangarrinya kapingka tjarrpatjunkula papatatjimilalpayi, kanya mayutju paluru nyurrangarrinya Katutjaku kurrunpa tjarrpatjunku, nyurrangarri palumpa waarrka palyantjaku.”
9Palulanguru paṉa Kaliliyila tawunu Natjaritjala nyinarra Yiitjunya Tjaanalakutu yanu. Karru Tjuutanala Tjaanalu palunya kapingka tjarrpatjunkula papatatjimilaṉu.
10Palulanguru Yiitjunya kapinguru pakara nyangu ilkari alytjurarrinytjala. Katutjaku kurrunpa paaḻkara nguwanpa tjarukatingu Yiitjulakutu.
11Palulanguru ilkaringuru Katutjalu watjaṉu Yiitjunya yalatji, “Nyuntu ngayuku katja, yunytjuṉanta nyinanyi. Punturaṉanta yunypa nyinanyi, nyuntupa.”
12Palulanguru Katutjaku kurrunpangku Yiitjunya wantirriyaṉu ngurra kapiwiyakutu.
13Ngurra palula Yiitjunya rawa nyinangi, puratiyi tjikitjipala. Ngurra palula mamuku mayutjulu Yiitjunya tjuṯangara tjingapungangi, kuya palyantjaku. Ngurra palula tjikipaka tjuṯawana layina tjuṯawanaṯarra Yiitjunya nyinanyingka, ilkari ngurrara tjuṯangku yaṉṯayaṉṯaṉangi.
14Palulanguru tjuulytji tjuṯangkuya Tjaananya witira katirra tjiilangka tjarrpatjunu. Palula ngaṉṯi Yiitjulu yankula paṉa Kaliliyilawana yaṉangu tjuṯa tjananya nintirinangi, Katutjakuṉu tjakulpa palya. Yalatjingku tjananya nintirinangi,
15“Katutjalu yirriṯi watjara wantinyingka yuḻṯa palunya yilarringulpi. Kuwarri paluru tjananya yaṉangu tjuṯa ngulytjura yaṉṯayaṉṯalku. Paluru nyurrangarrinya ngulytjuntjaku nyurrangarri kuya palyalwiyangku wantirra, ngayukuṉu tjakulpa palya kulintjaku.”
16Palulanguru yuru Kaliliyila tjayiṯiwana Yiitjunya yanu. Yankula pulanya nyangu, yurungka niitingitjarrangkupula kuka piitji mantjirinangi. Wati paluru kutjarra Tjaamananya Yanturunya kaakararrapula nyinangi. Paluru kutjarrangku kuka piitji kapuṯura mantjiṉangi, yalatjipula rawa waarrkarripayi.
17Yiitjulu pulanya watjaṉu, “Tjungulaka yarra! Nyupalipulanu kuka piitji waarrkarringkula mantjilpayi. Ngayulu nyupalinya nintilku waarrka kutjupa, Katutjaku wangka nyupali tjanala nintintjaku, yaṉangu tjuṯangka, tjana kulira palumpa walytjarringkunytjaku, Katutjaku.”
18Palulangurupula niitingi palunya wantirra Yiitjulawana tjungu yanu, yurungka tjayiṯiwana.
19Tjana yankula nyangu Tjayimitjanya Tjaananya, kaakararrapula. Tjiḻpi Tjipitiyiku katja paluru kutjarra nyinangi puutangka. Tjungungkuya paluru kutjarrangku paapangkuṯarra waarrkana tjuṯangkuṯarra puutangka nyinarra niitingi palyaṉangi.
20Yiitjulu pulanya nyakula yaḻṯingu. Palulangurupula paapa yini Tjipitiyinya, palumpa waarrkana tjuṯaṯarra wantikatirra, Yiitjulawanalpi tjungu yanu.
21Tawunu Kapaniyamalakutulpiya yanu. Tawunu palula Yiitjunya yankula Tjuwuku tjaatjingka tjarrparra nintiṉu tjananya, tjiṉṯu Tjarritiyingka.
22Yiitjulu tjananya nintingku nintintjala yunypangkuya kuliṉangi, “Ngaangkulanya nintingku nintilpayi, wiya Muutjaku wangka nintilpayi tjuṯangku nintingkulanya nintilpayi, wiya.”
23Tjuwuku tjaatji palula wati mamutjarra nyinangi.
24Paluru mirrarra raapangku Yiitjunya tjapiṉu yalatji, “Yiitju, Natjaritjanya ngurrara. Nyaakitjanu ngalyanu? Ngayunyaṉinu mamutjarra pungkukitja, mamu kutjupa tjuṯaṯarra, tjunguralanyatjunu? Ngayulu nyuntupa ninti nyinanyi, nyuntu Katutjaku walytjaran nyinanyi yilta, palumpa. Nyuntu tjukarurru kutu palumpa nyinapayi.”
25Yiitjulu mamu palunya watjaṉu, “Ataṉarri! Wati palatja wantirra pakara yarra!”
26Mamu paluru wati kurrunpangka nyinangitjatjanu pakara tjalkaḻungu mirrarra. Tjalkaḻunganyingka, wati paluru punkara ngarrirra pakaṉulpi.
27Yaṉangu tjuṯangkuya nyakula yunypangku wangkangu yalatji, “Ngaangku ngangkari tiṉatjarrangku payira wantirriyalpayi. Tjinguru ngaatja wangka palyatjarra, nganaṉa kulintjaku.”
28Yiitjulu mamutjarra tjuṯa, pikatjarra tjuṯaṯarra palyarinkupayi. Yaṉangu tjuṯangku nyakula tjana tjakultjurinangi ngurra tjuṯawana, paṉa Kaliliyilawana.
29Palulanguruya Yiitjunyangarri Tjuwuku tjaatji wantirra Tjaamanaku anta Yanturuku waaḻangka yankula tjarrpangu. Tjunguya yankula tjarrpangu Tjayimitjanya, Tjaananyaṯarra.
30Waaḻa palula Tjaamanaku yumari miiṉṯa puntu wuumpi ngarringi. Tjapiṉuya palyantjaku.
31Yankula Yiitjulu mara witira pakaltjingara nyinatjunanyingka, paluru pika wiyarringu. Wulkumina paluru pakara parra ngarala mangarri kukaṯarra yungkula tjananya kanyiṉingi.
32Palulanguru tjiṉṯu tjarrpanyingka, tawunu palunya ngurrara tjuṯangku pikatjarra tjuṯa tjananya mamutjarra tjuṯaṯarra, katingu Yiitjulakutu, paluru pampura palyantjaku.
34Pikatjarra tjuṯa tjananya pampura palyaṉu. Mamutjarra tjuṯaku tjanampa mamu payira wantirriyaṉu. Yiitjulu payira wantirriyalkitjangku mamu tjuṯa marrkulpayi, wangkarraya Yiitjunya Katutjakuṉu tjakultjunkupayingkamarra. Mamu tjuṯaya ninti nyinangi, Yiitjunya Katutjakuṉu nyinanytjala. Yiitjulu kuliṉu, “Ngayulu tjananya ngula tjakultjunku ngayuluṉa Katutjaku katja, wiya mamu tjuṯangku tjakultjunkunytjaku tjanala.”
35Palulanguru Yiitjunya palumpa kutunguḻu tjuṯaṯarra ngarringu. Aaḻilingku Yiitjunya kutju pakara yanu liiḻiwana, yaṉanguwiyakutu. Ngurra palula paluru Katutjanya tjapiṉingi.
36Ngaṉṯi Tjaamanalungarriya yankutjanu pakara miṯura wanaṉu.
37Wanaralpiya Yiitjunya nyakula tjungurrirra watjaṉu, “Yaṉangu tjuṯangkuntaya ngurririnanyi. Nyuntu nyaaku kumpira nyinanyi?”
38Yiitjulu tjananya watjaṉu, “Tawunu kutjupa tjuṯakutulaka yarra!, ngayulu yankula tjananya tjakultjurinkunytjaku. Tawunu kutjupa kutjupa tjuṯawana tjanala tjakultjurinkunytjaku ngayulu paṉakutu ngalya yanu.”
39Palulanguru Yiitjulu paṉa Kaliliyilawana ngurra tjuṯawana tjakultjurinangi. Tjuwuku tjaatji tjuṯawanaṯarra tjakultjurinkula mamutjarra tjuṯaku tjanampa mamu payira wantirriyarinangi.
40Palulanguru wati kutju, pangki pikatjarrangku Yiitjulakutu yankula pupakatirra watjaṉu, “Mayutju. Nyuntu yilta yunytjurringkula ngayunyaṉi pikatjarra palyala!”
41Yaḻṯururringkula Yiitjulu marangku pampura watjaṉu, “Unytjurringanyiṉa. Kuwarrin palyarringkulpi.”
42Palulanguru wati paluru pikawiyarringu.
43Wati palunya Yiitjulu marrkuṉu, “Kutjupangka wiya tjakultjunkunytjaku, tjaatji tiṉakutu yarra!, tuḻkuku mayutjungka nintilanku!, pikawiyarringutjalpi. Tuḻkuku mayutju palumpa yuwara tjawirrilyi!, palyarringutjatjanungku. Tjawirrilyi yalatji yungkunytjaku, Muutjalu yirriṯi watjaṉu. Tjawirrilyi yalatji nyuntu yungkunytjala nyakulaya yaṉangu tjuṯangku kulilku yalatjingku, ‘Palatja pikatjarra nyinangutjangku palyarringkulalpi yunganyi, tjawirrilyi.’”
45Wati paluru yankula marrkuntja kulintjawiyangku tjakultjurinangi, Yiitjulu palyaṉutjangka. Tawunu ngurrara tjuṯangkuya tjakulpa palunya kuliṉu. Palulanguru tawunu kutjupa kutjupa ngurrara tjuṯalingkungkuya kulira tjungurrirra ngarala waṉipayi, Yiitjulawana. Yiitjulu tjananya nintira purrkarringkupayi. Palulanguru Yiitjulu puṯu kuliṉingi tawunungka kumpira tjarrparra nyinanytjakitjangku. Paluru tawunu tjuṯa wantirra maa nyinangi puutjingka aṉangu tjuṯa palulakutu yankula tjungurritjipingkamarra. Kutuya yaṉangu tjuṯa tawunu palunya tjuṯanguru yankula Yiitjula tjungurripayi palumpa wangka kulilkitja.
