Markus 4:21-40

²¹A kotin masani ong irail: Kandel pan wisikedo, pwen ko ong pan kasak de pan men wendi? A sote koda wong nin deun kandel?

²²Pwe sota me rir kot, me so pan sansalada, pil sota me okiok kot, me so pan lok sili.

²³Meamen me salong a mia men rong, i en rong!

²⁴A ap kotin masani ong irail: Komail kalaka, me komail rong! Pwe men song, me komail songki iduen a pil pan song, ong komail. O omail tungol pan laud.

²⁵Pwe me a mia, ekis pan ko ong; a me sota a mia, me ekis mi re a, pan katia sang.

²⁶A kotin masani: Iet duen wein Kot, ras ong aramas amen, me kamoredi ong nan pwel war en tuka.

²⁷Ap mairela, pirida, pong ran; a war o wosada ap kakairida a ap sota asa due.

²⁸Pwe pwel kin pein kawosada tuka. Mas katoka, mur mpok, mur war en korn nan mpok ap pwarada.

²⁹A ni wa ma, a ap madang ki ong men lepukedi, pwe rak mier.

³⁰A pil kotin masani: Da me kitail en karasai ong wein Kot? De da me kitail en kasosong ong?

³¹A rasong wan tuka, me pan kamoremoredi ong nan pwel, me tikitik sang war karos, me mi nan sap.

³²A lao kamoredi, ap wosada laude sang dip karos, ap kasang pasang laud; manpir en pan lang ap kin wendi pan mot a.

³³I song en karaseras akan toto a kotiki ong irail ni a kawewe ong irail masan o duen ar weweki.

³⁴Sota a masan, ma so karaseras. Ni arail kelepala, a ap kotin kadede ong sapwilim a tounpadak kan meakan.

³⁵Ni ran ota, lao sautik penaer, a kotin masani ong irail: Kitail daulul wong palio!

³⁶Ari, ni ar kadar pasang pokon o, re kamasalada nin sop o. Pil akai kisin sop mi re a.

³⁷Melimel ap koda, iluk ap pungedi ong nan sop o kadirela.

³⁸A a kotikot nan murin sop o, saisaimok pon ulunga. Irail ap kaopada potoan ong i: Saunpadak, kom sota kupurai kit, pweki at pan mela?

³⁹I ari kotin kipada, angiangida melimel, o kotin masani ong sed o: Moledi! Ang ap dukedi o molela kaualap.

⁴⁰A ap kotin masani ong irail: Da me komail masapwekeki? Iadue, sota omail poson?