مَرَكِ 4:21-40

²¹عِسَ مَن نَشَ عَ مَسٍن عٍ بّ، «لَنثُي نْمَ دْشْدٍ دٍبٍ بُن مَ، شَ نَ مُ سَدٍ بُن مَ؟ عَ مُ دْشْمَ لَنثُي دْشْسٍ شَ قَرِ؟

²²بَرِ مَ سٍ نَشَن بِرِن نْشُنشِ، قٌ عَ بِرِن شَ مَكّنّن. سٍ نَشَن بِرِن قِندِشِ فُندٌ رَ، قٌ عَ بِرِن شَ سَ كّنّ مَ.

²³شَ وٌ تُلِ قٍ مّمَ، وٌ وٌ تُلِ مَتِ يِ مَسٍنيِ رَ.»

²⁴عِسَ مَن نَشَ عَ مَسٍن عٍ بّ، «وٌ وٌ حْشْ سَ ﭑ مَ مَسٍنيِ شْن. وٌ مَنِيَسٍ نَشَن نَوَلِمَ بٌورٍيٍ بّ، نَ نَن نَوَلِمَ وٌ قَن بّ، عَلَ مَن ندٍ سَ عَ شُن.

²⁵قَهَامُي كَنيِ شَ قَهَامُي شُن مَسَمَ، كْنْ قَهَامُتَرٍ، هَلِ عَ نَشَن دِ مَحْشُنشِ عَ فبٍ رَ، نَ قَمَ بَدٍ عَ يِ رَ.»

²⁶عِسَ مَن نَشَ عَ مَسٍن، «عَلَ شَ مَنفّيَ مَنِيَشِ شّمّ نَن نَ نَشَن سَنسِ شْرِ فَرَنسَنمَ شّ مَ.

²⁷شَ عَ شِقٍ، شَ عَ مُ شِقٍ، كْي نُن يَنيِ، سَنسِ بُلَمَ نّ، عَ تٍ، كْنْ عَ تَن مُ عَ كٌلٌن نَ رَبَمَ كِيٌكِ.

²⁸بْشِ نَن سَنسِ رَ مْمَ عَ يّتّ مَ. عَ بُلَمَ نّ سِندٍن، عَ تٍ، عَ تْنسْي مِنِ، عَ شْرِ قَ رَقٍ.

²⁹عَ نّقّ مْ، عَ كَنيِ عَ شَبَمَ نّ، بَرِ مَ عَ شَبَ تّمُي بَرَ عَ لِ.»

³⁰عِسَ مَن نَشَ عَ مَسٍن، «وٌن نْمَ عَلَ شَ مَنفّيَ مِسَالِدٍ مُنسٍ رَ؟ وٌن نْمَ عَ شَ قٍ مَسٍندٍ تَالِ وْيّنيِ مُندُن نَ؟

³¹عَ مَنِيَشِ كٌندٍ شْرِ نَن نَ. عَ نّ سِمَ بْشِ تّمُي نَشّ، عَ شْرِ شُرُن بْشِ سَنسِ بِرِن بّ،

³²كْنْ شَ عَ بَرَ بُلَ، عَ قِندِ عَ رَ، عَ بِلِ نُن عَ سَلٌنيِيٍ فبٌمَ دَنفِقٍ سَنسِ بِرِن نَ، شْنِيٍ نُ قَ عٍ تّي سَ عَ كْن نَ، نِينِ بُن مَ.»

³³عَ نُ مِشِيٍ كَوَندِ مَ يِ تَالِ وْيّنيِ مْولِ فبٍفبٍ نَن نَ عٍ شَشِلِ بّرّ رَ.

³⁴عَ حَن مُ نُ مَسٍنيِ يٌ تِمَ عٍ بّ شَ تَالِ دَاشِ شَ مَ رَ. كْنْ شَ عٍ نُن عَ قْشِرَبِرّيٍ دٌرٌ بَرَ لُ عَ رَ، عَ نُ عَ بِرِن تَفِ رَبَمَ نّ عٍ بّ.

³⁵نُنمَرٍ تٌ سٌ نَ لْشْي كٍرٍنيِ، عِسَ نَشَ عَ قَلَ عَ قْشِرَبِرّيٍ بّ، «وٌن شّي نَاكِرِ مَ.»

³⁶عَ قْشِرَبِرّيٍ نَشَ كٍلِ حَمَ شُن، عٍ عِسَ شَنِن كُنكُي كُي عَ نُ نَشَن كُي. عٍ نَشَ كُنكُي فبّتّيٍ قَن شَنِن.

³⁷قٌيٍ بٍلٍبٍلٍ نَشَ كٍلِ بَا مَ، مْرْنيِ نُ قَ سَ كُنكُي كُي.

³⁸كْنْ عِسَ تَن نُ نَ شِقٍ كُنكُي شْرّ رَ، عَ شُنيِ سَشِ شُنسَسٍ مَ. عَ قْشِرَبِرّيٍ نَشَ قَ عَ رَشُنُ، عٍ عَ قَلَ عَ بّ، «كَرَ مْشْ، عِ مُ كْنتْقِلِشِ وٌن قَشَقٍ رَ؟»

³⁹عِسَ تٌ شُنُ، عَ نَشَ شَاحّ قٌيٍ مَ، عَ قَ بَا يَمَرِ، «دُندُ! عِ رَشَرَ!» قٌيٍ نَشَ عِتِ، بَا نَشَ رَشَرَ يٍن!

⁴⁰عِسَ قَ عٍ مَشْرِن، «وٌ فَاشُشِ مُنقٍ رَ؟ هَن يَ دَنشَنِيَ مُ نَ وٌ بّ؟»