Marka 4:21-40

²¹Caggal ɗum, Iisaa wii ɓe: —Won fuu kuɓɓoowo lampa so hippa hen saawal, naa soorna ɗum ley leeso? Wanaa sinndan ɗum naa?

²²Walaa fuu ko ɲooɓi ko ɓanngintaake, walaa ko suuɗii ko yaltintaake sella.

²³Jom nowru fuu yo nanu!

²⁴O wii ɓe kasen: —Tiiɗee e no nanirton haalaaji am ɗii nii! Sabi no etirton nii, non etirante-ɗon on ɓeydante duu.

²⁵Sabi jogiiɗo fuu ɓeydante, kaa mo walaa oo, fay seeɗa mo jogii oo teetete.

²⁶O wii kasen: —Laamu Laamɗo ana wa'i no neɗɗo cankuɗo aawdi e ngesa mum nii.

²⁷Caggal mum, ɗaanoo jemma daroo ɲalooma, no laatii fuu aawdi ndii fuɗan, mawna, tawa joomum anndaa no ndi mawniri.

²⁸Leydi ndii e hoore mum fuɗinta ndi, ndi waɗa gulle, wutaandu jokka hen, caggal ɗum, gabbe njokka hen.

²⁹So ko aawaa koo ɓenndii, o ɓaman wawdu makko o hetta, sabi wakkati mum yottike.

³⁰O jokkini hen: —Koɗum nanndinten e Laamu Laamɗo oo? Banndol hongol mbanndirten mo?

³¹Laamu Laamɗo ana nanndi e ngeeƴu buyaage. Kaɲum ɓuri geeƴi ɗii fuu famɗude.

³²Kaa so mo aawaama, mo mawnan faa mo laatoo lekki mawki sanne, ki waɗa caɓe mawɗe faa pooli mbaawa ɲiɓude cuuɗi e ɗowdi makki.

³³Iisaa haalaniri yimɓe ɓee konngol Laamɗo ngol e banndi keewɗi baaɗi non, ko waarata e faamu maɓɓe.

³⁴O waajortaako so wanaa e banndol. Kaa nde o teeldi e taalibaaɓe makko ɓee fuu, o firritanan ɗum'en banndi ɗii fuu.

³⁵Kiikiiɗe oon ɲalooma, Iisaa wii taalibaaɓe mum ɓee: —Lummben, keedoyen ootoo bannge.

³⁶Ɓe njoppi jamaa oo, ɓe tawti mo e laana ka o wonnoo e mum kaa, ɓe ndeerti. Laanaaji goɗɗi duu ana njokki e makko.

³⁷Henndu sattundu immii, bempeeje immii ana piya laana kaa, faa ka hosi heewde ndiyam.

³⁸Kanko, omo ɗaanii to laaci laana too, omo wawlii mbawlu. Ɓe pinndini mo, ɓe mbii mo: —Moobbo, tama ko min kalkotoo koo wemmbaali ma?

³⁹O immii, o jahii e henndu nduu, o wii weendu nduu: —Deƴƴina! Wii teen! Henndu nduu deƴƴinii, fuu wii teen.

⁴⁰Caggal ɗum, o wii ɓe: —Ko saabii so kul-ɗon? Faa hannde on ngalaa hoolaare naa?