Mak 4:21-40

²¹O Iesu i watungi tandet lena, “Katutaio in los pas tu lam ma in wop bat tari nama paket, o in ubek tari kai nago utuntudu ina kabulu. Awu! Din ubek tari ut netes una nun a turtur.

²²A kum utna rop ra i kis eno, numur in nanpat puaso. Ma a kum utna rop ra kura i parau, numur in kis talapor, ma din tasmani.

²³Osi ra arin talngano kura, i wakak sur in longoro nami.”

²⁴O Iesu i wasiso liklik utmakai ra i lena, “Mot nuknuk wakak un asau ra mot longoro i. Ra mot in longoro wakak, o God in pitar a labino tastasman torom mot. Mot in utur ukai a tastasman ra i labo sakit.

²⁵Osi ra i longoro anung a kum etowo, o God in pitar a labino tastasman toromi. Ikut osi ra ke longoro, din rakon ru i utkai asau lik ra kura i pam ukai i.”

²⁶O Iesu i watungi kai lena, “A matanitu anun o God i elar nam ara musano ra i sapro a kum wino wit una piso.

²⁷I ser inep una mirum ma una waspi i ser tuangun ma i papam, ra a kum wino wit det lubung pat ma det labo, ikut a musano ke tasmani ra det lubung pepetlai.

²⁸A piso ut i ser ulubung a kum wit lenri: Numugu in ubek in gomono, numur in nanai ino in labo tito, ra numur in ubek in gilino tomo nama wino.

²⁹Ra a kum wino det sa taka, a musano ra, in nan tomo nam anun in totok, ma in pirat pas det, uni a kalang sur din pasong a wit i sa sot.”

³⁰O Iesu i watungi lena, “A matanitu anun o God i elar nama sau? Ma asi na wasiso elelar ra an utalapori nami?

³¹I elar namin pitino mastad. I natino taun a kum pitino duwai rop, ra di maruti una piso.

³²Ikut ra di sa marut tari, ma i lubung, i labo taun a kum duwai na inangon rop. I ubek a kum lamlabino kanokano, ma a kum piko det ser pam pios una kum kanokano ra kura una kabosoro ino.”

³³O Iesu i ususer det nama susut na wasiso elelar kai, ra i elar nam anundet a tastasman.

³⁴Ke wasiso torom det nam tu se wasiso, a wasiso elelar rop kut. Ikut, ra i mukut tomo nam anun a kum nat na ususer det kis, i utalapori maragom a kukurai ina kum wasiso elelar.

³⁵Una bung na lirop ut ra, o Iesu i inanos anun a kum nat na ususer lena, “Dat nan utong una ara papor tasi.”

³⁶A kum nat na ususer det kas utiro una pot ra o Iesu kura uni, ra det wan gusun a kunur na taro. A ramano kum pot utkai det wan tomo nam det.

³⁷A dekdek na wuwu doko i ragoti, ma a top i tapak sapat netes una pot, ra i milau sur in bukus nama tasi.

³⁸O Iesu i inep dumun nago numur una pot, ma i ulalong taru una pilo. A kum nat na ususer det wangun pasi ma det inanosi lena, “Tene Ususer, dat na iru! Ko nuk pas met mo?”

³⁹I katutur, i turbat a wuwu ma i turbat a top lena, “Mana, un mililo.” Ra a wuwu i rop ma i mililo mut.

⁴⁰Numur i watungi torom a kum nat na ususer lena, “Sur asau ra mot ngara? Awai kuti anumot a nurnur?”