Mak 4:21-40

²¹Jisösnöŋ keu kun kewö jiyök, “Kunŋan lambe me kiwa memba ohotiriba kimbut me dum bapŋe alma me qahö? Mi waniŋe alma? Mi mönö miaŋgö dum tatatnöŋ aukŋe alma.

²²Mewöŋanök yuai kun asambötket ahözawi, mi mönö aukŋe asuhum tiŋgitmapköra ahöza. Yuai kun köl turuget ahözawi, mi mönö luluŋget kötulmapköra aka ahöza.

²³Kunŋan urukezapŋambuk malja ewö, yaŋön mönö dopkeu ki kezap ala möt kutuma.” Mewö.

²⁴Jisösnöŋ keu kewö jii mötket, “Keu mötzei, mi mönö möt aŋgön köla urukönimŋine ala köl guliba malme! (Mewö malgetka uruŋini diŋgiiga mötmötŋinan qariiga möt kömume.) Iŋini tosatŋi yeŋgö keuŋini kewöta jim tekömei, Anutunöŋ mönö jimkutukutuŋini mohot miaŋgö dop nanŋini keuŋini kewöta jim teköma. Dop mi mönö oŋgita likepŋi meleŋ eŋgima.

²⁵Miaŋgö könaŋi kewö: Kunŋan mötkutukutuŋambuk maljawi, Anutunöŋ mönö mi toroqem waŋgiiga malmapmö, kunŋan mötkutukutuŋi qahö maljawi, Anutunöŋ mönö mötmötŋi moröŋi ahözawi, mi mewöyök qeköba waŋgitma. Mewö.

²⁶Jisösnöŋ dopkeu kun kewö jiyök, “Anutugöreŋ bemtohoŋi mi kiaŋgö dop: Azi kunŋan nuwe anda nene kötŋi qesiŋda gilma.

²⁷Qesiŋda gila anda suŋgem silim ahöba wahöta ahöba wahöriga nene kötŋaŋgö korapŋi jula korakze. Denöwö jula korakzei, mi nanŋak qahö möt kutuza.

²⁸Gölmenöŋ nanŋök nam köli ölŋi asuhumakza: Mutuk ipŋi, könaŋgep ölŋi aka miaŋgö andöŋe ölŋaŋgö kötŋi mi körek asuhuba qarim teköme.

²⁹Ölŋi qarim teköba öliiga ölŋi memegö nalöŋi aiga welenqeqeurupŋi melaim eŋgiiga souŋini kapeŋkapeŋgöŋi jitŋinambuk memba ölŋi membingöra nupŋe anme.” Mewö.

³⁰Jisösnöŋ dopkeu kun kewö jiyök, “Anutugö bemtohoŋi mi wanatpuk dop albinak me wanat söpsöp keu jiba jim asaribinak?

³¹Mi nejoŋ kötŋaŋgö dop kewö akza: Kötŋi mi morö közözömŋi. Mi gölmegö nene köt pakpak mieŋgö eretŋini akza. Mewö aiga nup gölmenöŋ esize.

³²Esizemö, jula wahöta yöha pakpak eŋgoŋgita qariba böröŋi ketaŋi gili anje. Mewö gili angetka könakembagö neiŋi neiŋi mieŋön aipŋini miaŋgö aumŋe alakze.” Mewö.

³³Jisösnöŋ dopkeu mewöŋi mewöŋi mi gwötpuk jiba mala Buŋa keu jiiga mötket. Möt kutugeraŋgö dop mi jiiga möta malget.

³⁴Nalö dopkeuŋi pakpak mi dopkeunöŋ jiba malök. Keuŋi kun öne kude jiyökmö, gwarekurupŋi yembuk nanŋinök malgetka keu pakpak mieŋgö könaŋini mi jim asarim eŋgiba malök. Mewö.

³⁵Wehön miaŋgöreŋ mare aiga Jisösnöŋ gwarekurupŋi kewö jii mötket, “Mönö mosöta aŋgö kutuba likepŋe aŋgotpin.”

³⁶Mewö jiiga ambazip kambu eŋgömosöta Jisös waŋgigetka waŋgenöŋ tari anget. Waŋge tosatŋi mi mewöyök yembuk awataŋ anget.

³⁷Angetka raidimbom ketaŋan ömtöröp (töröpŋanök) giliga sirinöŋ waŋge uruŋe gegetka waŋge numbuŋe qemamgö ahök.

³⁸Mewö aiga Jisösnöŋ waŋge teteköŋe tata qömböŋnöŋ nariba gaun ahöyök. Gaun ahöiga gwarekurupŋan anda möndöba jiget, “Hei böhi! Nini aŋgönöŋ ayuhubingöra akzin. Miaŋgö waimanjatŋi kun mötzan me qahö?”

³⁹Mewö jigetka imbiŋi möta luhut aka siri kewö jim qetal etkiyök, “Mönö bököba öne ahönöŋ!” Mewö jiiga luhutnöŋ döŋgöiga sirinöŋ nöŋ qeba ahöyök.

⁴⁰Mewö aka kewö jim eŋgiyök, “Iŋini mönö wuanöŋgöra keŋgöt mötmöt azia akze? Denöwögöra aka Anutu qahö möt narize? Sömbuŋini mönö öne mötze.”