SAN MARCOS 4:21-40

²¹A Jesús in uchayechic: ―Auxe’ max ca paxq’uiyat i lec’utsith tajablab c’al i poc’te’ o max ca c’uajba tin alam i huaytalab tsey. Iba. U c’uajbab jun ti t’ec’at abal quin tala’ tajbay alta ti al an ata.

²²Patal jahua’ xohue’ u tsincacayab c’al i jalpith cau, talbel ne’ets ca tala’ tejhua’methanchat ani ca tala’ lejquinchat an inicchic.

²³Jitats junat in ichich c’al nana’ u ichich, quin lej alhua’ bina’ in xutsun c’al axe’ xi cau.

²⁴A Jesús in uchayechic: ―Ca lej t’aja’ ti cuentachic ca alhua’ bina’ a xutsun c’al in cahuintal a Dios. Max hue’ ta ca bina’ a xutsun ca ats’anchi, tocat lej hue’ ne’ets ca ejtiy. Max jum putat ca bina’ a xutsun ca ats’anchi, ne’ets ca alhua’ ejtiy lej yan ani a Dios ne’ets ti pithaye ca más exla’.

²⁵Jitats in lej bats’umalits tin ichich in cahuintal a Dios, jats axi ne’ets ca pithane más. Jitats tocat eblim im bats’umalits hue’ in cahuintal a Dios, jats axi ne’ets ca tixc’anchat.

²⁶A Jesús in uchayechic: ―Jant’ini’ ca t’ayan jun i iyalab ithith ti tsabal ani ca cale ani ca puhuey, antsana’ tin t’ajal a Dios ti Ts’ale tin ichich an inic.

²⁷Patal an acal u huayal ani patal a q’uicha u ejtsinal nixe’ xi inic ax in t’ayamal an iyalab. An iyalab u cuete’ calel ani u puhuel, ani yab in tso’ob an inic jant’ini’ tu calel ani tu puhuel.

²⁸C’al in huinat alhua’ an tsabal jats tu calel ani jats tu puhuel an ithith. Ne’ets puhuehuel in xequel ani tam quim baju in q’uijil, tam u t’uchbinal. Tam talbel u c’oc’tsinal.

²⁹Tam ca payeyits an huay’, tam ne’ets an c’ojol quin tamcuy.

³⁰A Jesús in uchayechic: ―Nan ne’ets tu olchiyechic i jalpith cau jant’ini’ tin t’ajal a Dios ti Ts’ale.

³¹Ca t’ayan i iyalab mostaza ti tsabal, pel xe’ axi más tsipichic c’al patal an iyalab.

³²Tam t’ayathits ani calejits ani puhueyits, in atal axi patal an ts’ojol t’ayablab. U pactha’bel in c’ue’elchic, ma an ts’itsinchic u che’el quin ts’ejca’ in c’util taja’ ejtil max pel i te’.

³³Antsana’ a Jesús in exobchalchic an inic c’al yan i jalpith cau ma ju’tam huichat u ejtohuab ca ejtinchat.

³⁴Expith in taunal c’al i jalpith cau axi yab pel in exobalilchic, ani axi pel in exobalilchic jats in lejquinchal an jalpith cau jant’o in le’ quin ulu.

³⁵Tameq’ui nixe’ xa q’uicha tam ti aclejits, a Jesús in ucha’ in exobalilchic: ―Cu c’alechic tihua’ jum poq’ue’ am pulic lejem.

³⁶Tam tixc’an in exobalilchic c’al an mulcunel, ta c’alechic junax c’al a Jesús al an tan jum poq’ue’ am pulic lejem. C’uajat jaye más q’ue’at i tanchic axi ne’ets c’al a Jesús.

³⁷Tam thayc’an jun i ic’ lej tsapic al am pulic lejem. U lej lanq’uil an ja’ c’al an tsapic ic’, ma ne’ets t’uchichilits an tan c’al an ja’.

³⁸Ani a Jesús huayamath al i lachic’lab tin cux an tan. Tam ejtsintha c’al in exobalilchic ani uchan: ―¿Exobchix, jale’ yab a t’ajal ti cuenta max cu uc’tsin?

³⁹Tam ts’aquiy a Jesús in c’uiyath tauna’ an ic’ ani an ja’ antse’: ―Quit cubiy ani yabats quit lanq’uilats. Ani tam t’ajat cubiyits an ic’ ani yabats lanq’uil an ja’.

⁴⁰Tam a Jesús in conoy in exobalilchic: ―¿Jale’ it lej jiq’uelchic? ¿Jale’ yab tim belal?