Lukase 1:66-77

⁶⁶Hoko pusue tamata rebe esi lene mere esi noake me lalesi be, “Tuhane Ime kaini, hoko namake kena kwetele mere ielare iono elia?” Le esi selu Tuhane Iraka kwetele mere mise!

⁶⁷Eleki Ro Misete Ikbasae Sakaria, Yohanese amai, hoko ibeteke sou bei Alla. Iombe,

⁶⁸“Mai ite isike Tuhane, beteke Eni kbasare hita titinai, Alla Israele, le Iluake kena Itapa Eni tamataru, kai Itiesi.

⁶⁹Iriluke Maka Hlamate ktiline ete ite, Irulu bei kamale Dauta. Dauta mere maka layani Alla.

⁷⁰Lulu Eni lepata bei akmena sa rebe Eni nabiaru esi betekeule,

⁷¹kena Ihlamate ite bei iteki musuaru, kai bei tamata rebe lalesi tiake ite esi kbasaru.

⁷²LaleIje nete iteki ntuana menaru hoko saisa rebe Italuke pende Iono lulue.

⁷³Italuke mere be Ila ete Abrahame be Iraka ite,

⁷⁴kai Italuke be Iono ite hlamate bei iteki musuaru, leke kena ite ono lulu Eni lepataru ite rilama kena supu susate mo,

⁷⁵leke ite ono Eni tamata nkenale rame kai ite mise titinai le dosa sae mo kena iteki hidupe roma ite mata.

⁷⁶Po auku anae Yohanese ale, tamata esi kotie ale nabi bei Alla elake titinai, le akeu akmena bei Tuhane kena aknekae lalane eteI,

⁷⁷kena beteke ete ite, Eni tamataru be ite supu hlamate sepo Alla Iampune iteki dosaru.