Luk 1:66-77

⁶⁶Ding longgalo dilungu naxuyanga ba dahatumhatum mana, saing duxusunga ding ba, “Gara ba bagula sok bila lipua na bila baru?” Daharua bila ba namua na Toxoratamona haringinganoa wa rangua.

⁶⁷Tibuna Sekaraya baxagi mana Urana Aningonoa saing xap Urana suxungunoa, saing baxanga muga mana axamang teladi bagula disok kimuya ba:

⁶⁸“Taiti Toxoratamona, Urana Isreliam, yanoa, namua na ri ma saing xap kira lipuxindi muli sangua bixuaradi rimadingia ba.

⁶⁹Liwe mana lipuxing oxatama Xaitamoxi Debit bakbaginoa ba, rang lipu haringing tela mali bu xap kira muli.

⁷⁰Waleu sibuna mana lipuxing suxunguxunguamdi mogudi naina, ina harua ba,

⁷¹bagula xap kira muli sangua bixuaradi xaung lipudi hauxading sibuna makira rimadingia,

⁷²bu hatanga usingangua na mugangaradi, saing hatumia muli ba hau haruangang maringina,

⁷³haruanga maxunamga ba harua maxuna na mugangaroa Ebraham ba:

⁷⁴bagula xap kira muli sangua bixuaradi rimadingia, baing libu kira hatumingara dimaxuwa te bu tatuxu oxatanoa,

⁷⁵bagula libu kira tawa iniadi sibuna, saing hauli kira ba talibu kubolu maringina maxania mala mana walingara longgalo.

⁷⁶“Baing ung ba, garagua, bagula duxung ba, Urana Eta Loam Sibuna lipuxing suxunguxunguama, namua na bagula umuga mana Toxoratamona bu uxauxau daxangua mana,

⁷⁷bu sina xabianga mana xabinga muli na lipuxindi, bungina Urana yunga kuboluding diandi,