Luk 1:66-77

⁶⁶Ae naenko, arop ponankor am kar waria nɨnɨk tokwaeaka arakrá sér, “Wakmwaek am táráp te mokope arop yak naenámpono?” Am fárákap te wae mér, Tokwae Karamp kárákáre te mént yak námpono.

⁶⁷Aerapo maok, Yiki Kor Spiritao ékia maomp naropwar Sekaraiamp pourouk woukoupeyakánko maok, Sekaraia profet kar fek sérrá,

⁶⁸“Nomo Israelomp Kwar Tokwaeramp e sámpea sakap mwaro. Am te apaeria námpanápe mao náráp fi koumteouráp arop nomwan koropea yaewour riaka nomwan warko éréképea fwapia kák námpon.

⁶⁹Kwaromp tére arop Devit yakámp fi mek kárákáre kor arop ankárankamp nomwan warko éréképanoria pap námpon.

⁷⁰Kwaromp e tokwaeráp profet fákárerao maomp kar wariaka am táman sérrá:

⁷¹‘Mao te nomwan younkwe sɨrarrá yopornap arop fákáreramp yaekamp warko érékép naenámpono.’

⁷²Am takámp te, Kwar te nomp ouyaenápén aropompiaka yaewourimpon. Mao wokwaek kar ‘Yiráp por tak nanamp’rá sérimp kontrak kárákáre te oukoumwan nɨki-samp yak námpon.

⁷³Mao nomp ounáp Abrahamén kare kar sérimp te, oukoumwan kor wokwaek sérimpnámp taknámp kare kar nomwan yaewour naenámpon.

⁷⁴Mao te nomwan yopor aropamp yae kwae mekamp érékép námpara, nomo te apáp mono, ankár man loturá yakáp mwanámpono.

⁷⁵Nomo yiki yakápnámp ke fek ponankor mao nke námp fek, yiki kare nɨnɨk fek yae-párák kare térerá paokop mwanámpon.” Sekaraia Kwarén warákarea pwarará náráp tárápan sérrá,

⁷⁶“Onomp táráp e! Wakmwaek te arop ponankor amwan ‘Narek Kari Yaknámp Kwaromp profet’rá sér mwanapon. Amo mekia akwapria Tokwae Karamp mwae nánap nanapon.

⁷⁷Amo maomp koumteouráp arop fárákapan ‘Kwaro yiráp kwatae nɨnɨk tirá épéria, warko érékép naenámp’rá farákáp nanapon.