Luka 9:50-60

⁵⁰Mume Jesuzi ʒiŋuc âzâcnewec: “Mi qataracnezo. Gie‐ŋeŋic mi hetâtiecmuzi âgo babafic‐ŋeŋic eocmu.”

⁵¹Jesu e sambâŋko risiocte dameŋ bembeŋkezo ehame Jerusalem haeo raocte mupaŋkewec.

⁵²Mupaŋkerâ kiŋaŋ sorec‐jopame bâniembiŋ. Bânierâ raku Samaria ŋic jaŋere hae mocko fisirâ Jesure biŋe fic moc bâfuaniŋte jazambiŋ.

⁵³Eme Jesu e Jerusalem haeo raocmu, iŋuc manarâ fic sakarembiŋ.

⁵⁴Fic sakarepie motec jahec‐ticne Jakobo â Johane jahe i manarâ Jesu wiocnerâ mupic: “Wofuŋ, go manatec mupere sambâŋkonec ʒoc waharâ ʒacjopazejec me?”

⁵⁵Mupire forisierâ qatara‐jactewec.

⁵⁶Eme hae mocko rambiŋ.

⁵⁷Rahapie ŋic moczi bâfuac‐joparâ Jesu ʒiŋuc âzâcnewec: “Go ira me ira razo mutecne bâjâpecgupemu.”

⁵⁸Mume Jesuzi ʒiŋuc âzâcnewec: “Qowi jaŋe hawec‐jeŋichec, â sawa wipe jaŋe sareŋ‐jeŋichec, Ŋic Fâri Wâtuŋne e ine fofo roŋgâŋ basaekac.”

⁵⁹Eme Jesuzi ŋic moc bâfuarâ ʒiŋuc âzâcnewec: “Go ware bâjâpecnuc.” Mume ŋic e ʒiŋuc âzâcnewec: “Wofuŋ, manatec qanaŋ rarâ mamac‐nane duckezepac.”

⁶⁰Eme Jesuzi ʒiŋuc âzâcnewec: “Behec‐jopatec qâŋɋâŋzia qâŋɋâŋfâc‐jeŋic buc ducjopanʒepieŋ. Go ine rârâ Anuture uucmaŋ irec dâŋ muromackezemec.”