Luk 9:50-60

⁵⁰Pe Yesu ipa, “Wawu mbuna akasingori yiy. Hiyeh mepo kintasisingat ana wawu pwi, ara yiy para susura wawu.”

⁵¹Pwen lenge Yesu iropo isa pakeh para nakiya kol paingan yang, pwen lohongan itiy pwokeyan para kiya Yerusalem.

⁵²Pwen ipwandrisa hu ndramat para sapiya nongan huro mu kili yiy, pe huya nondriya kol hakol mendreheh ita nondriya kol Samariya, para hu kaya ramwaniyani hu melit koro mwoimwoi para yiy kiya aliy.

⁵³Hapeko yihu ndramat huro kol ara, ara hu kantawulohani yiy pwi, paratesah, yiy ara nakiya mwonen kiya Yerusalem.

⁵⁴Iro mwonen ndramiran hilu, Yamis pe Yohanes hilnime kultuwayi hu Samariya, pwen hilsok yiy, hilpa, “Yapan, wou anamiliy para yowu kayoh mwan kiyau kol paingan yang kisa pwan, pe kitimwi hu, ndre?”

⁵⁵Hapeko Yesu ipaiwani yiy iya kili hilu, pe ipomate hilu.

⁵⁶Pwen huyau huya kol hakol mendreheh i.

⁵⁷Iro mwonen huro tokai sai huropo huya, ndramat hamou ipwai iya kili yiy, ipa, “Hape aleheh naya aliy, ara andre kuho ndruwam.”

⁵⁸Pe Yesu ipwai iya kili yiy, ipa, “Yihu mwiy puyap, ara mangarehu, pe hu norukan para wohowoh, ara mayumwahu. Hapeko Noru Ndramat, ndrohonokun para matiliu, ara pwi.”

⁵⁹Pwen Yesu ipwai iya kili ndramat hamou i, ipa, “Asa pe oho ndruwo.” Hapeko ndramat ara isomwi yiy, ipa, “Yapan, atali yo kuya roni tomo na.”

⁶⁰Pe Yesu ipwai iya kili yiy, ipa, “Hu ndramat para kimat, ara hu koro roni ndramirahu mbukenahu mepo humat. Hapeko wou aya, pe aya pohowe nongna kolo King Ngindrai.”