San Lucas 9:50-60

⁵⁰Jesús mantimini yaca tsantitulajona! tinue. Chiquilachi contra itominla chiquilachi parte jolajoe tinue.

⁵¹Junni Jesuri jamochi manlono ma quelo inasa, Jerusalenca jinonan joyoe tinue.

⁵²Junni jinaminnan tsachilaca caquenan erenue yape pueblobi wito tile catsontsan jonunca neyalaquinasa. Ya pueblori Samaria tobi jominue.

⁵³Junni jun pueblobi chumin tsachila jera meralaquinue Jesula Jerusalenca jilainaeque. Junni junca meráto, israelítala jolajoeque tenhito, junto israelítalaca pa joto, yalachi pueblobi pocatulajonue.

⁵⁴Pocatulajonan, Jesube penenaminla paluca itsanlatinue: —Miya, matu to Elías Diosibe rocainue jamochi nechi ninca ereto seitonlaca jera nin posa. ¿Chiquilanan in seiton Samaria tsachilaca jun tsannan quintsan jotun? latinue. Jacóbobe Juanbe tsantilatinue.

⁵⁵Junni Jesús yalaca quirato, itsantinue: —Te, tsanlaquitude! Nulari tenhituto yucanchi mite palaquinae tinue.

⁵⁶Lari tsachi ica jun joto, tsachilaca totebi jatucayoe tinue. Tsachilaca se laribi jacayoe tinue. Junni tsantitobi, uyan puebloca jito polelainue.

⁵⁷Aman minute jilainato, tsachi manca Jesube itsantinue: —Nube penenamin ino muquee tinue. Nunchitiya nube pejinoyoe tinue.

⁵⁸Junni Jesuri beco manpato itsantinue: —Soronantiya foro tanmanhe catsochun. Pichunan tasen tamanhe. La mantimini tsachi ica jun joto, tilenantiya chuno itoyoe. Junni labe penenamin ino muquinari, casale duque tenca cano joe tinue.

⁵⁹Tsantitobi, manca tsachica labe penenana! tinue. Junni ya tsachiri itsantinue: —Miya, casale lachi apachica manjino joyoe tinue. Lachi apa puyanan menalaquetobi, lari nube penenabi manjanae tinue.

⁶⁰Jesús mantimini ya tsachibe itsantinue: —Yala puyaca cuwenta joto, yala tala menailaichunae. Nuri junca tennatuto, Diosi ya mantananun tsachi bolon suwanaeque micaribi jina! tinue.