LUKA 2:13-51

¹³Panthawe ibodzi-bodziyo padawoneka mthithi wa wanthu wakudzulu akhadaima na anjoyo acimbatumbiza Mulungu, aciti:

¹⁴Mbiri kuna Mulungu wakudzulu! Mtendere pantsi kuna wanthu wankhombo

¹⁵Pomwe anjo wale adabwerera kudzulu amakabusawo adapangana aciti: “Mbatiyendeni kuBeleeko tikawone ninga momwe watiuzira Mbuyamu.”

¹⁶Ndipo iwo adayenda na kamkulumize, acikamuwona Maliya na Zuze, na mwanayo adagonesa mthangamo.

¹⁷Pomwe adamuwona adayamba kuwuza wanthu ninga momwe adauzidwira bza mwanayo.

¹⁸Ndipo wanthu wentse adadabwa na nkhani ya amakabusawo.

¹⁹Tsono Maliya adanyamala nabzo bzentsenebzo, acimbabzikumbukira mumtima mwace.

²⁰Ndipo amakabusa wale adabwerera, acimbakuza na kupasa mbiri Mulungu pabzentse bzomwe adabva na kubziwona ninga momwe akhadauzidwira.

²¹Pomwe mwanayo adapfitsa ntsiku zisere, adacita msinda wakucosa mcikuta, acimupasa dzina kuti ni Jezu lomwe anjo akhadam'pasa kale pomwe mamace akhanati kutenga mimba.

²²Panthawe ya msinda wawo wakutsukidwe ninga momwe ukhalewera mtemo wa Mozeji, azibaba wa Jezu adayenda naye kuJeruzalema kuti akamupereke kuna Mbuya,

²³(ninga momwe udanembedwa mtemo wa Mbuya kuti: “mwana wakuyamba kubadwa wacimuna bzin'funika kuti adzaperekedwe kuna Mbuya.)

²⁴acipereka pomwe ntsembe ninga momwe ukhalewera mtemo wa Mbuya kuti: “njiwa ziwiri ayai nkhangaiwa ziwiri.”

²⁵Akhalipo munthu m'bodzi kuJeruzalema, dzina lace Simiyau omwe akhali wakulungama na wakulemekeza kuna Mulungu. Iye akhadikhira Mulungu adzapepese Ijirayeri. Ndipo Mzimu Wakucena ukhana iye.

²⁶Mzimu Wakucenayo ukhamudziwisa kuti an'dzafa lini acisaya kudzawona Krixtu wa Mbuya.

²⁷Mzimu udamuyendesa kunyumba ya Mulungu. Pomwe adabwera azibaba wa Jezu kudzacita msindayo

²⁸ndipo Simiyauyo adamutesa mmanja acitenda Mulungu aciti:

²⁹“Mbuya, tsapano mulekeni nyabasa wanu ayende na ufulu ninga momwe limbalewera fala lanu!

³⁰Nakuti ndaciwona kale cipulumuso canu na maso yangu,

³¹comwe imwe mudatumiza kumadzindza yentse ya pantsi.

³²Ni ceza kuna wanthu wakunja, mbiri kuna wanthu wanu wa kuIjirayeri.

³³Ndipo azibabace adadabwa na bzomwe bzikhalewedwa kwa mwanayo.

³⁴Pamwepo Simiyau adawasimba aciuuza Maliya mamace kuti: “Mwanayo an'dzagwesa ndipo acidzamusa pomwe wanthu azinji wa kuIjirayeri. An'dzakhala cizindikiro cakuti wanthu azinji an'dzalewana naco kuipa.

³⁵Na tenepo ndzeru za wanthu azinji zin'dzazimbuka padeca ndipo acidzaphayambo pomwe mtima wako ninga cisenga.

³⁶Akhalipombo mpolofeta wacikazi m'bodzi nkhalamba, dzina lace Yana, mwana wa Fanwere wa dzindza la Aseri. Iye akhadalowodwa acikhala magole manomwe yokha na bayace kucokera paudende bwace, ndipo akhali mamsiwa mpaka kupfitsa magole makumi masere na manai.

³⁷Ndipo iye akhacoka lini mnyumba ya Mulungu, acimbabzimana kudya na kumbacita mikumbiro nthawe zentse.

³⁸Panthawe yomweyo adafenderambo pamwepo acitenda Mulungu acilewa bza mwanayo kuna wentse omwe akhakhulupirira kudzawona ufulu bwa Jeruzalema.

³⁹Pomwe adakamala kucita bzentse bzomwe bzikhalewa mtemo wa Mbuya, iwo adabwerera kumui kumzinda wa Nazalee cigawo ca Galileya.

⁴⁰Ndipo mulumbwanayo akhakula acilimbika, acikhala na ndzeru ndipo Mulungu akhamusimba.

⁴¹Ndipo azibabace akhambayenda kuJeruzalema magole yentse kucikondweso ca Paxikwa.

⁴²Pomwe iye akhana magole khumi na mawiri, adayendambo nawo kuJeruzalemako ninga momwe ukhali msambo wa cikondwesoco.

⁴³Pomwe cidamala cikondwesoco, iwo adabwerera kumui. Tsono mwanawo Jezu adasala kuJeruzalema. Ndipo iwo alibe kudziwa kuti iye wasala.

⁴⁴Iwo akhakumbuka kuti ali kubwera mmambuyo na andzace, ndipo adafamba ntsiku yentse. Adamunyang'ana kuna azibaba winango na anantsi,

⁴⁵tsono adamusaya, ndipo adabwerera pomwe kuJeruzalema.

⁴⁶Pomwe zidapita ntsiku zitatu, iwo adakam'bulukira mnyumba ya Mulungu. Iye akhadakhala pana apfundzisi wa mtemo acimbawatetekera na kuwabvundza.

⁴⁷Wanthu wentse omwe akhamubva akhadabwa na matawiriro yace na ndzeru zace.

⁴⁸Pomwe adamuwona, adasusumwa naye. Ndipo mamace adamubvundza kuti: “Nandi mwanangu, thangwe ranyi wacita tenepayu? Ine-pano na babakoyu tikhana thupo ndipo tikhakunyang'ana kwene-kwene!”

⁴⁹Ndipo iye adawatawira kuti: “Thangwe ranyi mukhandinyang'ana? Kodi mun'dziwa lini kuti bzin'funika kuti ndikhale mnyumba mwa Babangu?”

⁵⁰Tsono iwo alibe kubvesesa bzomwe adawauzabzo.

⁵¹Pamwepo adapolika nawo kuNazalee. Ndipo iye akhambawabvera. Tsono mamace akhabzikoya bzentsenebzo mumtima.