Luk 2:13-51

¹³Pəwon fɛ, kɔ kənay ka mɛlɛkɛe ma dareŋc kəmɛpnɛ katina mɔcɔkɔ-cɔkɔ kəkor-koru ka Kanu, moc-loku:

¹⁴«Debeki da Kanu deyi dareŋc, bəkəc yɔfɔr akɔ ŋayi dəntɔf ak’ ɔmbɔtər ŋa mɔ!»

¹⁵Ntɛ mɛlɛkɛe mɛsak ŋa kɔ mɛmpɛ dareŋc mɔ, kɔ akɛk ŋalokɛnɛ: «Awa, paŋkɔn haŋ Betlɛhɛm, pakɔ panəŋk tɔkɔ teyi mɔ, ntɛ Kanu Kəpɔŋ kəsɔŋɛ su kəcərɛ mɔ.»

¹⁶Kɔ akɛk ŋambɛlkər kəkɔ, kɔ ŋaŋkɔ ŋabəp Mari kɔ Isifu, kənaka kəfəntərɛ taŋku pɛbɛrɛ pa yɔcɔl yeri.

¹⁷Ntɛ ŋalip kənəŋk ti mɔ, kɔ ŋalɔm tɔkɔ analoku ŋa teta wan kakɔ mɔ.

¹⁸Akɔ ŋanacəŋkəl moloku mɔkɔ akɛk ŋaŋc-lɔmər ŋa mɔ fəp, kɔ meŋciyanɛ ŋa.

¹⁹Kɔ Mari ɛmɛŋkərnɛ moloku mamɔkɔ fəp, pəc-cɛm-cɛmnɛ mi dɛbəkəc.

²⁰Kɔ akɛk ŋaluksərnɛ sɔ nde ŋanayɛfɛ mɔ, ŋac-cam debeki da Kanu, ŋaŋc-kor-koru Ki teta moloku mɔkɔ mɛlɛkɛ mɛnaloku ŋa, a kɔ ŋanəŋk sɔ mi mɔ.

²¹Ntɛ kəkom ka wan kəsɔtɔ mata camət-maas mɔ, k’aŋkəŋc kɔ, k’awe kɔ Yesu, tewe ntɛ mɛlɛkɛ mɛnaboŋcər ŋa, ta antabɛkəs kɔ mɔ.

²²Ntɛ mataka maŋan ma kəsɔkəsnɛ melip pəmɔ ntɛ sariyɛ sa Musa səloku ti mɔ, kɔ ŋaŋkekərɛ kɔ Yerusalɛm kəkɔ-mentər kɔ Wəbɛ Kanu.

²³Ŋanayɔ mɔyɔ mɔkɔ aŋcic buk ba sariyɛ sa Wəbɛ disrɛ mɔ: «Awut arkun acɔkɔ-cɔkɔ aŋɛ aran ŋaŋkom mɔ fəp, pəmar pasɔŋ ŋa Wəbɛ Kanu ŋayɔnɛ acempi.»

²⁴Pəmar sɔ akombəra a wan wəkakɔ ŋaloŋnɛ Kanu «mɔpay mɛrəŋ, kɔ pəyɔnɛ fɛ ti-ɛ, ntantoriya yowut mɛrəŋ,» pəmɔ tɔkɔ aloku ti sariyɛ sa Wəbɛ disrɛ mɔ.

²⁵Tɛm tatɔkɔ fum wəlɔma ɛnayi Yerusalɛm pac-we kɔ Simɔŋ. Fum wəlompu ɛnayi pəcəmɛ dɔpɔ da Kanu darəŋ, pəc-kar nwɛ endeyac Yisrayel mɔ, Amera Ŋecempi ŋa Kanu ŋɛnayi kɔ kəroŋ.

²⁶Amera Ŋecempi ŋaŋɔkɔ ŋɛnasɔŋɛ kɔ kəcərɛ, a ɔfɔfi ta ɛnəŋk Krist, wəbɛ nwɛ Kanu Kəpɔŋ kəyɛk-yɛk mɔ.

²⁷Kɔ Amera Ŋecempi ŋa Kanu ŋɔŋcɔŋəs kɔ, k’ɔŋkɔ nde kəlɔ kəpɔŋ ka Kanu. Ntɛ akombəra a Yesu ŋaŋkekərɛ kɔ kəkɔ-yɔnɛ kɔ tɔkɔ sariyɛ səloku mɔ,

²⁸kɔ Simɔŋ ɛlɛk wan dəwaca k’oŋkor-koru Kanu pəc-loku:

²⁹«Wəbɛ, məntam oŋ kəsak wəcar kam pəfinɛ abəkəc ŋoforu pəmɔ tɔkɔ mənaloku ti mɔ,

³⁰bawo fɔr yem yati yɔ inəŋkɛ ntɛ məyɔ kəyac ka afum am mɔ—

³¹Nwɛ məlompəs afum fəp fɔr kiriŋ mɔ—

³²endeyɔnɛ pəmɔ pəmot mpɛ pendesɔŋ afum a tɔf ya doru fəp pəwaŋkəra it’ ɔŋsɔŋɛ ŋacərɛ Kanu. Nwɛ endeyɔnɛ pəlel pa afum am, aka Yisrayel.»

³³Kɔ pəŋciyanɛ akombəra a Yesu ntɛ Simɔŋ oŋc-loku teta Yesu mɔ.

³⁴Kɔ Simɔŋ ontolanɛ ŋa, k’oloku Mari iya wəka Yesu: «Kanu kəŋkɛrɛ wan wəkawɛ kədesɔŋɛ aka Yisrayel alarəm kətɛmpɛnɛ, pəyekti sɔ alarəm. Paka pa Kanu pɔ mpɛ pendesɔŋɛ afum kəgbɛkəlɛnɛ mɔ.

³⁵Endebɛr pəwaŋkəra bəkəc ya akɔ ŋayɔ mɛcɛm-cɛmnɛ mɔgbɔpnɛ mɔ. Kɔ məna Mari, pəcuy pendefut’əm abəkəc pəmɔ tɔkɔ kəŋgbasar kəŋfutu mɔ.»

³⁶Wədəŋk wəran wəlɔma ɛnayi pac-we kɔ Hana, wan ka Panuyɛl, wəka kusuŋka ka Aser. Wəran wəsikər ɛnayi. Ɛnalɔ nda wərkun meren camət-mɛrəŋ kəyɛfɛ ntɛ anagbaŋnɛ kɔ mɔ.

³⁷Kɔ wos ende pəfi, k’eyi oŋ ta ɔyɔ wərkun-ɛ. Hana pəsɔtɔ meren 84 k’eyi, ta ɔmbɔlɛ kəlɔ kəpɔŋ ka Kanu-ɛ pəc-bəc mɛfaŋ ma Kanu daŋ kɔ pibi kəlok-lokər Kanu kɔ kəsuŋ disrɛ.

³⁸Kɔ nkɔn ɔŋkɔ sɔ pəbɛrɛ di tɛm tatɔkɔ Simɔŋ oŋc-loku teta wan pəc-kor-koru sɔ Kanu mɔ; pəc-yif Kanu nəwali, pəc-loku teta wan akɔ ŋaŋc-kar Kanu kədeyac Yerusalɛm mɔ.

³⁹Ntɛ akombəra a Yesu ŋalip kəyɔ ka mɔyɔ mɔkɔ aloku sariyɛ sa Kanu Kəpɔŋ disrɛ mɔ, kɔ ŋalukus nde ndaraŋan Kalile, nde dare da Nasarɛt.

⁴⁰Awa, wan pəc-bɛk, pəc-sɔtɔ fənɔntər. Pəlarɛ kəcərɛ ka pɔkɔt, kəmar kəfili ka Kanu kəyi kɔ kəroŋ.

⁴¹Kəren o kəren, akombəra a Yesu ŋaŋc-kɔ Yerusalɛm kətəŋnɛ kəsata ka aSuyif ka Kəcepər.

⁴²Ntɛ Yesu ɔsɔtɔ meren wəco kɔ mɛrəŋ mɔ, kɔ akombəra ɔn ŋasolɛ kɔ kəkɔ-təŋnɛ kəsata ka Kəcepər dəndo Yerusalɛm pəmɔ tɔkɔ ŋaŋc-yɔ ti kəren o kəren mɔ.

⁴³Ntɛ mataka ma kəsata melip mɔ, kɔ akombəra a Yesu ŋasumpər dɔpɔ kəlukus ndaraŋan, mba kɔ wan Yesu nkɔn eyi Yerusalɛm, ta akombəra ɔn ŋaŋcərɛ ti-ɛ.

⁴⁴Akombəra ɔn ŋanacɛm-cɛmnɛ a Yesu ŋasol kɔ alukus, kɔ ŋaŋkɔt tataka tin. Kɔ ŋantɛn Yesu akomɛnɛ kɔ acərɛnɛ aŋan dacɔ.

⁴⁵Mba ŋananəŋk fɛ kɔ. Kɔ ŋaluksərnɛ sɔ Yerusalɛm ŋac-tɛn kɔ.

⁴⁶Mata maas disrɛ, kɔ ŋaŋkɔ ŋanəŋk kɔ nde kəlɔ kəpɔŋ ka Kanu disrɛ, pəndɛ atəksɛ dacɔ pəc-cəŋkəl ŋa, pəc-yifət ŋa moloku.

⁴⁷Aŋɛ ŋaŋc-cəŋkəl kɔ mɔ fəp, cusu cənawos ŋa dosoku domp dɔn, kɔ moloku mmɛ oŋc-luksɛ ŋa mɔ.

⁴⁸Ntɛ akombəra ɔn ŋanəŋk kɔ mɔ, kɔ pəŋciyanɛ ŋa. Kɔ kɛrɛ eyif kɔ: «Wan kem, ta ake tɔ məyɔnɛ su tantɛ-ɛ? Papa kam kɔ ina, bəkəc yɛlɛcɛ-lɛcɛ su kətɛn kam!»

⁴⁹Kɔ Yesu eyif ŋa: «Ta ake tɔ nəntɛn’em-ɛ? Nəŋcərɛ fɛ a mɛnɛ isumpər yɛbəc ya Papa kem?»

⁵⁰Mba akombəra ɔn ŋanacərɛ fɛ tedisrɛ ta toloku tatɔkɔ.

⁵¹Kɔ Yesu ɛyɛfɛ kɔ ŋasol kɔ akombəra ɔn kəkɔ ka Nasarɛt, bawo Yesu ɛnaleləs ŋa. Kɔ iya kɔn ɛmɛŋkərnɛ dɛbəkəc mes mamɔkɔ fəp.