Luka 1:5-36

⁵Herodezi Judia mâreŋte ŋicwofuŋ juwec, dameŋ ira taha bapa moc juwec ʒâŋene Zakaria, e Abia ere gie birionec. Ŋonâŋ‐ticne Elisabete e Aroŋte tucne tofane.

⁶Jahe Anuture maio bahac fâsâc juhuc sâcmutâc dâŋticne aiakic jaha reŋke‐fârehuc jupic.

⁷Eme Elisabete hufiŋ juwecte jahe ɋâric tâmiric juku ŋic ŋokac qizec epic.

⁸Eme Zakaria juwec ŋic biri i jaŋe taha ufuŋko bâzi ririke gie baniŋte dameŋ‐jeŋic maickeme

⁹fisirâ gie‐jeŋic ru sâc ehuc Zakaria hosâc bâzi rikeocte mucnepie taha ufuŋ maŋnao raʒiwec.

¹⁰Raʒirâ hosâc bâzi rikehame ŋic ŋokac omane jaŋe sapamaŋko Wofuŋ numecnehec jumbiŋ.

¹¹Ehame Wofuŋte aŋelozi fuarâ hosâc bâzi ririke alata ŋifecnao fâreopec domawec.

¹²Domame Zakariazi honerâ fâfârerâ hemâtâckewec.

¹³Iŋuc eme aŋelozi ʒiŋuc âzâcnewec: “Zakaria, go mi hâwicguoc, Wofuŋzi nunumuge manawecte ŋonâŋge Elisabete motec kiweckerâ roocmu, ere ʒâŋe Johane muzemec.

¹⁴Go ʒeri ehuc bubiaŋ manacmu, â ŋic bocjahazi fufua‐ticnere aŋac‐jopaocmu.

¹⁵E Wofuŋte maio kâcɋene erâ juocmu; â waiŋ me opâ momori irec sowa juocmu. Erâ e neŋgoc bumaŋko fohame Tiri Mârozi maŋticne bâfuseocmu.

¹⁶Eme Israe ŋic bocjaha bârisiec‐jopame Wofuŋ Anutu‐jeŋic maickeniŋmu.

¹⁷Elia maŋʒoɋac â tâpiri focnewec sâc focneha Wofuŋte biŋedâŋ mumuŋic erâ juocmu. Ehuc kâcɋene jaŋere maŋ bârisieme ɋiene jaŋerao iticneocmu, â râŋgeŋne jaŋe ejareme tiŋne jaŋere mamana birire hazec râeniŋmu. Eme ŋic jaŋe mâmâc sâko Wofuŋte ʒawierâ juniŋmu.”

¹⁸Aŋelozi iŋuc mume manarâ Zakariazi dâŋ ʒiŋuc bârisiecnewec: “No â ŋonâŋ‐nane nâhe ŋic ŋokac qizec, irec dâŋge wemocko manape fârine eocmu?”

¹⁹Mume aŋelozi ʒiŋuc âzâcnewec: “Manakic, ʒâŋe‐nane Gabirie, no Anuture maio domaekopac. Eki sorecnume waharâ biŋedâŋ biaŋ gazakopac.

²⁰Irec manac, dâŋnane mi mana ʒakiekomec irec okacne nâŋguŋ erâ dâŋ tâmiric juhaŋtec dâŋ gazakopac fârinehec eocmu. Dâŋ mukopac i racne mi eocmu.”

²¹Zakaria e ufuŋko boc jume ŋic ŋokac woŋec‐ticne ŋeku manafecne manambiŋ.

²²Iŋuc ehapie ʒâhec jaŋerao waharâ dâŋ jazaocte eipiewec. Eipieme jaŋe ʒiŋuc manambiŋ: E taha ufuŋko wiac ʒâŋe furu moc honejec. Eme eki mezi sâsâc sawa ejarewec, dâŋ ine wemocko jazazac.

²³Iŋuczi iŋuc juhame gie bapa dameŋ‐ticne tarame haeo risie rawec.

²⁴Eme ʒâhecko ŋonâŋ‐ticne motec kiweckewec. Erâ mosa 5 soŋke soŋke juwec. Ehuc ʒiŋuc muwec:

²⁵“Wofuŋ e dameŋ bawec i maickeme ehâmo‐narerâ mimi bâsuec enarewec.”

²⁶Mosa 6 tarame Wofuŋzi aŋelo Gabirie soreme Galilaia mâreŋko Nazarete haeo rawec.

²⁷Ira naru ŋokac moc juwec ʒâŋene Maria, e ŋic moc Dawidire oso gitecne, Ʒâŋene Josefe, ere biŋe mukicne.

²⁸Eme aŋelo e Mariarao fuarâ muwec, “Wofuŋte joroc biaŋ, go ʒeri ec, Wofuŋzi gohec jukac.”

²⁹Aŋelozi dâŋ iŋuc mume maname quŋkeme maŋnezi ʒiŋuc manasuwec: Weniŋucte mu ʒeri enarekac?

³⁰Eme aŋelozi ʒiŋuc âzâcnewec: “Maria go mi hâwicguoc, Anutuzi honecgume biaŋkekac.

³¹Manakic, go motec kiweckerâ rocmu, ere ʒâŋe Jesu muzemec.

³²E kâcɋene jâmbâŋ jume Fekicne sâko ere Ŋokâ mucneniŋmu, â Wofuŋ Anutuzi apa‐ticne Dawidi ere ŋeŋetacko râeocmu.

³³Eme Jakobore ɋâricfâc guriŋne bajarehuc jume Ŋicwofuŋ juju‐ticne foraʒihuc juocmu sanaŋ.”

³⁴Mume Mariazi ʒiŋuc âzâcnewec: “No ŋic tâmiric jukopacko dâŋ mukic i weniŋuc erâ sanaŋkeocmu?”

³⁵Mume aŋelozi dâŋ ʒiŋuc bâtikiecnewec: “Tiri Mârozi faigao wahaocmu â Fekicne sâko ere tâpirizi neŋgoc ŋesiŋ ŋegareocmu. Eme irec motec rocmu e tiri mucnezo, Anuture Ŋokâ hâcne.

³⁶Erâ moc gazape manac: Âgoge Elisabete e ŋokac qizeczi motec kiweckerâ juhame mosa 6 ekac, e hufiŋ ŋokac mucneeŋgopieŋzi iŋuc ekac hâcne.