Lukaj 1:5-36

⁵Ni muein Erodej nanmarki en Iudäa, jamero amen mia, kijan pwin on Apia, me mar a Jakariaj, o a paud amen jan nain Aron jeripein oko, me mar a Elijapet.

⁶Ira karoj me pun mon Kot, o ira ineneweita ni en Kaun a kujoned o tiak kan karoj.

⁷A jota naira jeri, pwe Elijapet li dapwan amen, o ira karoj likailapalar.

⁸A kadekadeo ni a kapwaiada a dodok en jamero mon Kot ni anjau o, me a pwin pwaijaneki,

⁹Duen a kin wiaui ren jamero kan, o anjau en ijik mairon lao leler, a kotilon on nan im en kaudok en Kaun o.

¹⁰A pokon kalaimun mi liki, wiawia kapakap ni klok en ijij.

¹¹A tounlan en Kaun amen pwara don i, kotikot ni pali maun en pei jaraui en potik.

¹²Jakariaj lao majani, ap lujikida o majapwekada.

¹³A tounlan o majani on i: Jakariaj, der majak, pwe om kapakap pwaidar, om paud Elijapet pan naitikeda jeri ol amen, a koe pan ki on mar a Ioanej.

¹⁴O a pan kare on uk peren o popol, o me toto pan perenki a ipwidi.

¹⁵Pwe a pan lapalap ren Kaun o, a jota pan nim wain, pil jo eu jon en joko; a pan dir en Nen jaraui nan kupur en in a.

¹⁶A me toto ren nain Ijrael akan, me a pan kawuki on Kaun ar Kot.

¹⁷A pan tion mo a ni nen o rojon en Eliaj, pwen kawuki on jeri kan monion en jam arail akan o me jopeik kan on lamalam en me pun kan, pwen kaonopadan Kaun o pwin aramaj lelapok eu.

¹⁸A Jakariaj majani on tounlan o: Da me i en ajaki me wet? Pwe i ol laudalar amen, o ai paud pil likailapalar.

¹⁹A tounlan japen majani on i: Nai Kapriel, me kin ariri Kot, o me pakadarado, en lokaia on uk, o wa don uk ronamau pukat.

²⁰Kilan, koe pan loton la, o jaja lokaia lao lel ran o, me mepukat pan pwaida, pweki om jota kamelele ai kajoi, me pan pwaida ni a anjau.

²¹A pokon o auiaui Jakariaj, puriamuiki a pwapwand nan im en kaudok.

²²A lao pedoi jan, a jolar kak majan on irail. Irail ap dedeki, me a udial manaman eu nan im en kaudok o. A olol on irail o lotonlar.

²³Kadekadeo ran akan en a dodok lao nikier, a kotin purelan jap we koieilan im a.

²⁴Murin ran pukat a paud Elijapet lijeanda o mimieta nan deu a jaunipon limau indada:

²⁵Iduen Kaun o kotin wiai on ia ni ran oko, ni a kotin majan don ia, pwen kotiki jan ia kanamenok pai ren aramaj.

²⁶Ni kawonu en jaunipon tounlan Kapriel pakadarala jan ren Kot on nan kanim en Kaliläa eu, me ad a Najaret,

²⁷Ren jeripein makelekel amen, me kijin nin on ol amen, me mar a Iojep, kijan kadaudok en Dawid; jeripein makelekel o adaneki Maria.

²⁸Tounlan o kotilon on nan deu a majani on i: Kajelelia Main, kom meid pai, Kaun o kotikot re omui! Kom meid pai nan pun en li akan!

²⁹A lao kilaner i, o ronadar a majan, ap majapwekadar madamadaua: Duen jon en ranamau o.

³⁰A tounlan majani on i: Maria, ender majak, pwe komui me konekonelar ren Kot.

³¹A kilan, komui pan lijeanda o naitikeda jeri ol amen, a komui pan ki on mar a Iejuj.

³²Nan i me pan lapalap, o a pan maraneki Japwilim en Kaun lapalap, o Kaun Kot pan kotiki on i mol en jam a Dawid.

³³O a pan kakaunda kadaudok en Iakop kokolata, o japwilim a wei jota pan imwila.

³⁴Maria ap majani on tounlan o: Daduen mepukat pan kak wiaui, aki i jaja ol amen?

³⁵Tounlan o kotin japen majani on i: Nen jaraui pan kotin ti po omui o rojon en Kaun lapalap pan kipa komui di, i me jaraui o, me pan ipwi jan komui, pan maraneki: Japwilim en Kot.

³⁶O majani, ri om Elijapet pil lijeandar ni a likailapala, a pan naitikeda jeri ol amen, a kawonu en jaunipon anjau wet; iei i me dapwan,