5Heroda ani Iudea habaꞌa kiniḡa reiroteꞌe madaḡano, Badiꞌa dibuꞌo hauꞌeteꞌe vazeḡa ꞌahoga niḡa Zakariaꞌa radiunu. Aniꞌe Abia urabo vazeḡa ꞌahoga ebu Abia rae raꞌetaꞌaꞌe Badiꞌa dibuꞌo hauꞌeteꞌe azaḡa urabo ꞌahoḡa. Ani ebu inuga niḡa Elisabetaꞌe Arona mariga azaḡa.
6Zakaria zu Elisabetaꞌe Badiꞌa goro ḡoeꞌa haḡaiḡa niduꞌa faifaine haḡaido zu mene veꞌonido. Eꞌanoꞌo zeꞌe Badiꞌa zamao duduḡa rae reiro.
7Rehano ze ubudeze oꞌoꞌa, mazaḡa Elisabeta aniꞌe gabani zuni anianineꞌe ufeta vouriro.
8Mada ꞌahogano Abia urabo azaḡaniꞌa gauꞌeteꞌe madaḡa meiro. Eꞌanoꞌo Zakaria ani zuni kuru neḡano ane urabo azaḡa teite Badiꞌa dibuꞌo hauꞌeteꞌe gauḡa haḡainu.
9ꞌOugirotene zeꞌe zeḡe haḡai idunaḡano, kuru neḡano diuḡadu uvahu hohoḡa hufiteꞌe vazeḡa vaḡiro. Ebu eꞌe veize kaḡusi arahoḡa haḡairotene, Zakaria meiro.
10Ebu Zakariaꞌa uvahu hohoḡa hufiꞌeteꞌe habaꞌa zamaḡa diuḡiro zu vaze ḡuḡuvaḡaꞌe kuru neḡa enoneo kurau radiunu.
11Eꞌe zamaḡano Zuhiꞌa Boro tuḡure vigaꞌa* Zakaria mazao fureraro. Aniꞌe uvahu hohoḡa hufiꞌeteꞌe fataḡa edaꞌe moneo edaro.
12Ebu Zakariaꞌa eꞌe horonirotene, viga deꞌoniro zu rihau rudaro.
13Rehano tuḡure vigaꞌa niro, raenaꞌa, “Zakaria! Ago rihanoꞌi! Badiꞌaꞌa ḡae kuru igiro, eꞌanoꞌo ḡa inugo Elisabetaꞌe ubugo ꞌahoga fureniꞌuma. Ebu niḡaꞌe Ioane rae turahoꞌi!
14Ḡaꞌe ani uꞌano matuꞌe rudaꞌuma, ebu vaze ḡehaḡa zuni aneꞌa fureranateꞌe moneo matuꞌiꞌuma.
15Mazaḡa aniꞌe Zuhiꞌa Boro zamao niḡa boro reꞌuma. Ebu vaini vuḡa zu vu sauꞌa mene gagiꞌuma. Zu viꞌa isi zamaḡanonoꞌo Vine Zaḡoḡaniꞌa ani ibito haꞌuma.
16Aniꞌe Isaraela azaḡa ḡehaḡa sauꞌazeonoꞌo mae ḡihuzadu Zuhiꞌa Boro zeḡe Badiꞌa vaḡe tutuze onaiꞌuma.
17Ani viga zu gigiꞌaḡaꞌe peroveta vazeḡa Elia teigiꞌuma. Aniꞌe Zuhiꞌa Boro izema onaogano onaiꞌuma. Ebu Moga zu ubuḡa zamaze mae tibuzifine danaziꞌuma. Zu Badiꞌa mene hegoteꞌeteꞌe azaḡaꞌe duduḡa azaḡa horozadu Badiꞌa hegotifine tutuziꞌuma, ebu vazeꞌa Zuhiꞌa Boro veize ruhibifine ihoziꞌuma.”
18Zakariaꞌa tuḡure viga niro, raenaꞌa, “E voureha ebu eḡe roḡae zuni voureha. Ḡae ḡoereꞌa fureraꞌumaꞌe, e nougenouge ederiꞌuma?”
19Ebu tuḡure vigaꞌa naenaeninaꞌa, “Eꞌe Gabiriera. Eꞌe Badiꞌa zamao edauꞌenaꞌa, tuḡure igiꞌeteꞌe aneruḡa. Badiꞌaꞌa ḡae hari manoḡa ꞌadi ḡouga radu eḡe tuḡuheha.
20Ḡianoꞌi! Madaḡaniꞌa onaine, eḡeꞌa rateꞌe ḡoeꞌa huganiꞌa fureraꞌuma. Mazaḡa ḡaꞌe eḡe ḡoere mene mae ḡihinateꞌe uꞌano, ḡaꞌe ḡoeroga mene idaraꞌuma, onamo ḡae ubugoꞌa fureraꞌuma.”
21U vaze ḡuḡuvaḡaꞌe enonao Zakaria guhiniꞌenaꞌa, ani nougadu kuru neḡa zamaḡano faḡahune radiuꞌohe rae zamarinu.
22Ebu Zakaria kuru neḡanonoꞌo buarotene, ani ze ḡorezoga mene idararo. Ani ꞌevore hina daꞌo ḡorezido, zu hebeꞌaꞌe adudaro. Eꞌanoꞌo zeꞌe aniꞌa kuru neḡa zamaḡano iḡunu teiḡe horoniroteꞌe ederiro.
23Ebu Zakaria kuru neḡano Badiꞌa mazao gaueꞌeteꞌe madaḡa hauḡirotene, Ierusalema habaꞌa modadu neḡa onamiro.
24Eꞌe enogano ani inuga Elisabetaꞌe ene tiro, ebu bato fuꞌo ani neo radiunu.
25Ani raenaꞌa, “Zuhiꞌa Boroꞌa danahadu e ene teha! Ene mene meiroteꞌe mazagaroḡa izidi Zuhiꞌa Boroꞌa mae vaḡineha!”
26Elisabetaꞌa ene tiroteꞌe enogano bato 6 radirotene, Badiꞌaꞌa tuḡure viga Gabiriera Galilea habaꞌa Nazareta neḡano Maria vaḡe ovoe tuḡuniro.
27Mariaꞌe ohoze teite ize mene baziroteꞌe nogobaḡa. Aniꞌe Davida mariga vazeḡa ꞌahoga niḡa Iosefa teite iraꞌauniro.
28Gabirieraꞌa Maria vaḡe onairotene, ani niro, raenaꞌa, “Badiꞌaꞌa manoḡa ḡanateꞌe roḡaeḡa! Matuꞌoꞌi! Zuhiꞌa Boroꞌe ḡae teite radiuꞌohe.”
29Maria ani eꞌe igirotene, zaguzagaro zu adaꞌadaniro, ebu 'Ḡoere ꞌadi hugaꞌe nagini?' rae zamarinu.
30Ebu tuḡure vigaꞌa ninaꞌa, “Maria! Ago rihanoꞌi! Mazaḡa Badiꞌaꞌe ḡae mazao matuꞌeꞌohe.
31Ḡianoꞌi! Ḡaꞌe ene teꞌadu ubugo ꞌahoga fureniꞌuma ebu niḡaꞌe Iesu rae turahiꞌuma.
32Aniꞌe niḡa boro reꞌuma ebu vazeꞌa aniꞌe Badiꞌa ḡihiꞌa ubuga rae reꞌuma. Ebu ane vouḡa kini Davida teige, Zuhiꞌa Boro Badiꞌaꞌa aniꞌe kini rae reꞌuma.
33Aniꞌa Isaraela azaḡa kiniḡa tugutuguḡa re onamiꞌuma, zu ibito ziniꞌeteꞌe mene hauḡiꞌuma.”
34Ebu Mariaꞌa tuḡure viga ninaꞌa, “Eꞌe ohoze teite bazoga ize aḡuꞌa. Nougenouge uguḡaniꞌa fureraꞌuma?”
35Ebu tuḡure vigaꞌa naenaeninaꞌa, “Vine Zaḡoḡaniꞌa ḡae vaḡe ovaiꞌuma, zu Badiꞌa ḡihiꞌa gigiꞌaꞌe ḡae zauha ḡadiꞌuma. Eꞌanoꞌo fureraꞌuma tahiꞌaḡaꞌe zaḡoḡa reꞌuma zuni Badiꞌa ubuga rae huniꞌuma.
36Ḡianoꞌi! Ḡa nabugo Elisabeta zuni vouḡa ebu aniꞌe gabani rae huniro. Rehano ene ohozeḡa teadu izidi bato 6 ꞌai maha.
Luka 1
Luka 1:5-36