LUKA 1:18-43

¹⁸Sakaria ese hari aneru e hamaoroa, eto, Ina na ede baina diba toma? Lau na iahu; adavagu danu vada e buruka.

¹⁹Aneru e helada hato, eto, Lau na Gabriel, Dirava vairanai na gini; ihereva-henimu bona ina harina namona ihamaorolaimu totona e siaigu.

²⁰Benaini, vada ba mu, basio hereva diba, ela bona ina hereva anina baine vara dinana, badina be egu hereva na tome abia dae; to, ena nega korikori ai do baine momokani.

²¹Taunimanima ese Sakaria e naria mase, bena e hoa, badina be gabu helaḡana ai e halahe.

²²Bena e raka lasi ai na asi hereva dibana. Bena lalodia e parara, ia na gabu helaḡana ai vada e mata hanai. Bena ia ese toa amo e hadibadia, vada e mu.

²³Ena ḡaukara dinadia e haḡuḡuru, bena ena ruma korikori ela.

²⁴Gabeamo, ia adavana Elisabeta vada e rogorogo, bena hua ima e noho hehuni;

²⁵eto, Lohiabada ese ini vada e karagu toma, ena ura negana vada eme haḡeregu, egu hemarai taunimanima vairadiai vada eme abia oho.

²⁶Hua ihatauratoina, Dirava ese aneru ladana Gabriel e siaia, Galilea hanuana ta ladana Nasaret ela.

²⁷Haneulato ta be unuseni ai, ia na David ena iduhu tauna ta, ladana losef, maohenina; haneulato ladana be Maria.

²⁸Aneru na ia dekenai e raka vareai, eto, Ba mauri, e lalokau henimumu hahinemu! Lohiabada ese baine bamomu.

²⁹Una hereva dainai ia na kudouna e hetaha, bona lalona e haguhi, una hahenamo anina be dahaka.

³⁰A aneru ese e hamaoroa, eto, Maria e, asio gari, badina be Dirava ena harihari ome abia.

³¹Oi na do ba rogorogo, mero ta bavabia, ladana ba hatoa IESU.

³²Ia na baine herea dae, Herea Mikamika Natuna bae gwauraia; Lohiabada Dirava ese tamana David ena terono na baine henia;

³³Iakob ena iduhu baine halohiaia hanaihanai; ena basileia na basine doko.

³⁴Maria ese aneru e hamaoroa, eto, Lau na tau asi dibagu, ina be ede baine vara toma?

³⁵Bena aneru na e haere, eto, Lauma Helaḡa na latamu ai baine diho, bona Herea Mikamika ena siahu ese baine hakerukerumu; bena oiemu amo baine vara merona helaḡana na Dirava Natuna bae gwauraia.

³⁶Ba diba danu, oi varavaramu Elisabeta na burukana ai vada e rogorogo; gabani e gwauraia, to ena hua ihatauratoina binai.

³⁷Badina be Dirava na ḡau iboudiai ikaradia mai dibana.

³⁸Maria eto, Lau na Lohiabada ena hesiai hahinegu; emu hereva heḡereḡerena ai egu ai baine vara. Bena aneru na iena amo e raka oho.

³⁹Unu dinadia ai Maria e tore isi, e raka haraḡa Iuda ororodia hanuana ta ela,

⁴⁰Sakaria ena ruma ai e dae Elisabeta e hanamoa.

⁴¹Elisabeta ese Maria ena hahenamo herevana e kamonai negana ai na natuna na bogana ai vada e marere; bona Elisabeta na Lauma Helaḡa ese a rohea.

⁴²Bena e hereva badabada, eto, Hahine iboudiai bogaragidiai oi mo sibomu namo herea, bona bogamu anina danu namo herea.

⁴³Egu namo be dahaka bena egu Lohiabada sinana dekegu vada ema?