Luka 1:18-43

¹⁸I o Zaharija pučlja e anđele: “Sar me te džanav da čače ka ovel adava so phenđan? Me injum purano hem mli romni da beršali.”

¹⁹A o anđeo phenđa lese: “Me injum o Gavrilo, o anđeo kova terđola anglo Devel te kandel le. O Devel bičhalđa man te vaćerav tuja hem te anav će akava šukar lafi.

²⁰I ače, ka ove laloro, na ka šaj te vaćere sa đi o dive ked adava ka ovel. Ađahar ka ovel adalese so na verujinđan mle lafonenđe save ka pherđon ko pravo vreme.”

²¹Sar o anđeo vaćeri ine e Zaharijaja, o manuša adžićerde e Zaharija te ikljol pučindoj pumen so edobor ačhilo ko sveto than e hramesoro.

²²A ked o Zaharija iklilo, našti ine te vaćeri olencar. O Zaharija ćerela ine nesar te mothoj lenđe vastencar hem ačhilo laloro. O manuša xalile da o Devel mothovđa lese nešto ko sveto than e hramesoro.

²³Ked pherdile o dive oto lesoro kandiba ano Hram, o Zaharija dželo čhere.

²⁴Na nakhino but, i lesiri romni i Jelisaveta ačhili khamni. Pandž masek na iklili avri taro čher. Phenđa:

²⁵“O Gospod ćerđa te šaj ačhovav khamni. Akana mothovđa maje pli milost hem cidinđa mli lađ anglo manuša.”

²⁶Ked i Jelisaveta inele šofto masek khamni, o Devel bičhalđa ple anđele e Gavrilo ki tikori diz e galilejakiri palo anav Nazaret.

²⁷Adari valjanđa te legari o lafi e devicaće palo anav Marija. Oj inele verime e muršese palo anav Josif, kova inele oto pleme e carosoro e Davidesoro.

²⁸Ked alo o anđeo, phenđa e Marijaće: “Radujin tut! O Gospodi but milostivno premala tute!”

²⁹A i Marija but uznemirinđa pe taro e anđeosere lafija, i pučlja pe so šaj te ovel adava pozdrav.

³⁰A o anđeo phenđa laće: “Ma dara, Marije! O Devel mothovđa će plo šukaripe!

³¹Ače, ka ačhove khamni hem ka bijane čhave, i ka de le anav Isus.

³²Ov ka ovel baro hem ka vičini pe Čhavo e Najbare Devlesoro. O Devel o Gospod ka del le autoritet te vladini sar caro, sar so vladinđa lesoro pradad o David.

³³Ka carujini upro pleme e Jakovesoro zauvek; zako lesoro carujiba na ka ovel kraj.

³⁴Tegani i Marija pučlja e anđeo: “Sar šaj te ovel adava ked me pana injum čhaj?”

³⁵A o anđeo phenđa laće: “O Sveto Duho ka huljel upra tute hem o zoralipe e Najbare Devlesoro ka učhari tut. Adalese adava čhavo, kole ka bijane, ka ovel sveto hem ka vičini pe Čhavo e Devlesoro.

³⁶Eče, ti bibi i Jelisaveta da, ko purane berša, ačhili khamni hem ka bijani murše. I oj, kolaće sare džande da našti te ačhol khamni, akanai šov masek khamni.

³⁷Jer o Devel sa šaj te ćerel!”

³⁸Tegani i Marija phenđa: “Ače, sluškinja e Gospodesiri injum. Nek ovel maje palo klo lafi.” I o anđeo dželo olatar.

³⁹Adala dive i Marija spreminđa pe hem siđarđa ko bregalo krajo e judejakoro.

⁴⁰Ked resli adari, đerdinđa ko čher e Zaharijasoro hem pozdravinđa e Jelisaveta.

⁴¹I ked i Jelisaveta šunđa e Marijakoro pozdrav, o čhavoro oti radost zorale mrdinđa olaće ano vođi, a oj pherdili e Svetone Duhoja.

⁴²I bare glasoja phenđa e Marijaće: “Najblagoslovime injan maškaro đuvlja hem blagoslovime o čhavoro kole akhareja ano vođi!

⁴³Akavai bari čast maje so tu, mle Gospodesiri daj, aljan kora mande.