Luka 11:4-27

⁴Kiŋtofa‐nâŋec behenârec, nâŋe iŋuc jaha ŋic jaŋere kiŋtofa beheŋgopeneŋ. Eesâicko mi râec‐nâpozemec.”

⁵I mutararâ moc ʒiŋuc ʒuhuckewec: “Ŋoŋeraonec moczi ŋafe ʒâʒâŋiŋko rarâ âgo‐ticne wiwickerâ ʒiŋuc âzâcneocmu: ‘Âgo‐nane, go nânâ jahec â moc mac narec,

⁶âgo‐nane moczi hata juku norao ware fisime nânâ gumezore basakopac.’

⁷Iŋuc mume fic runezi ficmaŋkoa fohuc muocmu, ‘Go guŋ wiwic wemocte enârekic, ficmotâc kine bakicne â naru motec guŋ fofâreŋgopieŋ, irec wemocko faharerâ garepemu.’”

⁸Jesu e iŋuc murâ muwec, “No mupe mananiŋ, fic rune e ââgore mi manacneocmuo ine mic ʒoɋac‐ticnere sifu faharerâ wiac mukac râcneocmu.

⁹Irec noni iŋuc jaha ŋifecne ŋazape mananiŋ: Numuku wiac roniŋmu, basaku fârine bâfuaniŋmu, motâcko heikepie aŋke‐ŋareocmu.

¹⁰Numuekaczi wiac roekac, basaekaczi fârine bâfuaekac, motâcko heickeekac e rocnezo.

¹¹Me ŋoŋeraonec mo ŋiczi ŋokâ‐ticne qowire mucneme irec okacne ɋâsu râcneocmu,

¹²me qâqâc hândâŋte mucneme omeqaqa râcneocmu?

¹³Eme ŋoŋe ŋic hehesicne iŋucnezi naru motecfâc‐ŋeŋic nânâ mafa biaŋne jare gumec eeŋgopieŋko Mamac‐ŋeŋic sambâŋko e sâc moc juekaczi Tiri Mârore numucnepie sâcne mi ŋareocmu me?”

¹⁴Ŋic moc demoŋzi ecneme nâŋguŋ ewec. Eme Jesuzi ŋic e demoŋ jâpecneme mocwâc dâŋ dâŋ ewec. Iŋuc eme ŋic jaŋe honerâ wareckembiŋ.

¹⁵Eme gâcnezi ere ʒiŋuc mumbiŋ: “Demoŋ jaŋere ŋicbomboŋ Beezebulu eki neŋgoc ŋesiŋ ŋecnehame demoŋ jâpe‐jareekac.”

¹⁶Gâcne jaŋe ine hesuahuc mumbiŋ: “Go mutec sambâŋko fuŋne qaqa mâsi fuame honenaŋ.”

¹⁷Eme eki maŋjeŋicko mana tararâ jazawec: “Mâreŋ moc ira ʒika kosa fuame hae sâc rârâsi efârepie tuhu fuaocmu.

¹⁸Sataŋzia fâuckerâ Sataŋ jâpeme gie‐ticne weniŋuc sanaŋkerâ foocmu? Ŋoŋe nore ʒiŋuc muŋgopieŋ: Beezebuluzi neŋgoc ŋecnehame demoŋ jâpe‐jareekac, irec mukopac.

¹⁹Eme no Beezebulu ere neŋgoc ŋesiŋko demoŋ jâpe‐jareekopacko, ŋaŋacne motecfâc jaŋe more ŋesiŋko demoŋ jâpe‐jareeŋgopieŋ? Jaŋe hâcne qoqoric‐ŋeŋicte fuŋne bataniŋkeniŋmu.

²⁰Noni ine Anuture tâpirizi demoŋ jâpe‐jareekopacko Anuture Wofuŋ qâreŋ ŋoŋerao fuakac hâcne.

²¹Ŋic momorizi sându maro‐ticnehec fic hae‐ticne soŋaŋkeme wiac‐ticne furu foocmu.

²²Ehame tâpiri sâkoheczi fisi hâporâ sându maro mamanac‐ticne jâoc rorâ boreŋ mafa‐ticne kâdoc qaocmu.

²³Moc e âgo mi enareocmuzi râsi enareocmu, â moc e gie‐nane hone maiŋ mi eocmuzi hetâtieocmu.

²⁴“Demoŋzi ŋickonec wefurâ ra tuhuo miti qatarac juhuc ŋeŋe hae‐ticne basaocmu. Basaku muocmu: ‘Ficnane beherâ warepo ijaha mocwâc risiepe.’

²⁵Murâ risierâ honeocmu: Ʒure emasaŋ erâ bâpiaŋkekicne.

²⁶Iŋuc fome honerâ ra demoŋ âgofâc‐ticne 7, e jahacne sâc mâcne, repipicne jâmbâŋ rocjopame ware fic ijaha ŋeŋe juju eniŋmu. Eme ŋic e mârâc sâqocne juweczi ʒâhec sâqore‐jâmbâŋkeocmu.”

²⁷Dâŋ iŋuc muhuc juhame ŋic ŋondeŋkonec ŋokac moczi wiwic jaha wiracnehuc muwec, “Rocgurâ moŋ gumec guwec ere manape ʒerine ekac.” Eme Jesuzi manarâ ʒiŋuc muwec: “I mukomec noni ine Anuture dâŋ manarâ bajueŋgopieŋ jaŋere hâcne manape ʒerine ekac.”