Luka 11:4-27

⁴Ma ôsuc aêacma sec ôkwi, gebe aêac tauŋ asuc launêŋ tôp ôkwi amboac tonaŋgeŋ. Ôwê aêac asa lêtôm atom.’”

⁵Ma Jesu kêsôm gêdêŋ êsêac gebe “Amacnêm ŋac teŋ embe êndêŋ nê gwadê êna ên êŋ êmbêcauc êna lugeŋ naêsôm êndêŋ eŋ gebe ‘Gwadêc, ôkêŋ mo têlêac êndêŋ aê,

⁶gebe ŋoc ŋac teŋ kêtu intênaŋageŋ mêŋgêô lasê gêdêŋ aê, ma ŋoc gêŋ gebe jakêŋ êndêŋ eŋŋa masi,’

⁷ma embe nê gwadê tonaŋ êmoa nê gamêŋ ŋaŋlômgeŋ ma êjô eŋ awa gebe ‘Ôlênsôŋ aê amboac secgeŋmaŋ. Katam ŋajaŋa kêsa ma aêac to ŋoc gôlôac sauŋ êu tauŋ jaaêc sugac. Aê katôm gebe jandi sa jakêŋ gêŋ teŋ êndêŋ aômŋa atom,’

⁸go amboac ondoc. Aê jasôm êndêŋ amac gebe Ŋac tau embe êndi sa mêŋêkêŋ êndêŋ eŋ êtu ênê gwadê eŋŋa atom, mago oc êndi sa naêkêŋ gêŋ, taŋ kêpô lêna naŋ, êtu eŋ keteŋ gêôc aucgeŋŋa.

⁹Amboac tonaŋ aê jasôm êndêŋ amac gebe Ateŋ gêŋ, oc akôc ŋanô. Ansom gêŋ, oc atap sa. Amandi katam, oc êlêc su êndêŋ amac.

¹⁰Gebe ŋac, taŋ eteŋ gêŋ naŋ, êkôc ŋanô. Ma ŋac, taŋ ensom naŋ, êtap sa. Ma ŋac, taŋ êmandi katam naŋ, katam oc êlêc su êndêŋ eŋ.

¹¹Tama asa aŋga amacnêm naŋ latu eteŋ mo êndêŋ eŋ ma êkêŋ poc, me eteŋ i ma êkêŋ moac êjô i êndêŋ eŋ,

¹²me eteŋ ŋakecsulu ma êkêŋ alidêbu êndêŋ eŋ.

¹³Amac lau sec ajala akêŋ geŋ ŋajam-ŋajam êndêŋ nêm gôlôac ŋasec-ŋasec, ma abe Tamemi undambêŋa êkêŋ Ŋalau Dabuŋ êndêŋ lau, taŋ teteŋ eŋ naŋ atom me.”

¹⁴Jesu kêtiŋ ŋalau sec toawamê kêsa gêja. Ŋalau tonaŋ kêsa gêja su, go awamê tau kêsôm biŋ lasê, ma lau samob sêŋac lemeŋ.

¹⁵Tec êsêacnêŋ lau ŋagêdô sêsôm gebe “Eŋ kêtiŋ ŋalau sec ŋa Belsebul, taŋ kêtu ŋalau sec nêŋ kasêga naŋ.”

¹⁶Ma ŋagêdô sebe sênsaê eŋ, tec sêsôm gêŋtalô undambêŋa aŋga ênê.

¹⁷Jesu kêjala biŋ, taŋ êsêac taêŋ gêjam naŋ, ma kêsôm gêdêŋ êsêac gebe “Gamêŋ teŋ embe êwa tau êkôc, oc êtu gasaŋ, ma gôlôac teŋ oc senseŋ gôlôac teŋ.

¹⁸Ma Sadaŋ to nê lau embe sêwa tauŋ êkôc, go nêŋ gamêŋ ênêc amboac ondoc. Amac taŋ asôm gebe aê kêtiŋ ŋalau sec ŋa Belsebul naŋ, taêm ênam biŋ tonaŋ.

¹⁹Aê embe jatiŋ ŋalau sec ŋa Belsebul, go amac latômi têtiŋ ŋa asa. Kêtu tonaŋŋa êsêac tauŋ ocgo sêmêtôc amac.

²⁰Ma aê embe jatiŋ ŋalau sec ŋa Anôtônê ŋaclai, go êwa sa gebe Anôtônê gôliŋ wacêpi amac.

²¹“Ŋactêkwa teŋ embe lêma tokêmgeŋ ma ejop nê gamêŋ êmoa, oc nê waba ênêc teŋgeŋ

²²Mago ŋac siŋsêlêc teŋ embe êndac eŋ, oc êku eŋ tulu ma êjaŋgo ênê laukasap, taŋ taê kêka naŋ su, ma ênac sam ênê waba.

²³“Ŋac taŋ êwiŋ aê atom naŋ, enseŋ aê. Ma ŋac taŋ ejoŋ ŋanô sa êwiŋ aê atom naŋ, êtê saliŋ-saliŋ.

²⁴“Ŋalau ŋatêmui embe êsa aŋga ŋamalac teŋ nê, oc eo êmoa gamêŋ kwalam ma ensom gamêŋ êlêwaŋ tauŋa, e embe êtap sa atom, go êsôm gebe ‘Aê jamu jana ŋoc andu, taŋ kasa gamêŋ naŋ êtiam.’

²⁵Ma embe naêô lasê, oc êlic sêkajo sa to sêgelôŋ.

²⁶Go naêkôc ŋalau 7, taŋ nêŋ sec kêlêlêc ênê su naŋ, mêŋsêsô nasêŋgôŋ. Go ŋamalac tonaŋ êmoa naeo ŋanô êlêlêc gêmuŋŋa su.”

²⁷Jesu kêsôm biŋ tonaŋ gêmoa ma awê teŋ aŋga lau tau nêŋ gêôc awa sa ma kêsôm gêdêŋ eŋ gebe “Aê aoc êôc têtaclêlôm, taŋ kêkêkam aôm to su, taŋ aôm gônôm naŋ.”