Luk 18:20-43

²⁰U tasman a kum Warkurai: ‘Gong u pam a sakino nam tu ino anun taio o nam tu musano anun taio, gong u um doko taio, gong u wolong, gong u etakun torotoro, un ru o tamam ma o nam.’”

²¹A musano ra i balu i lena, “Turpasi ra a natlik utmakai tuk uniri, a ser mur a kum Warkurai rop ri.”

²²Ra o Iesu i longoro i, i watungi tano lena, “Ara utna mukut ra kabaut u pami. Un siuru ru anum a kum utna rop, ra a mani taguni, un tabor a kum sibo na taro nami. Ra un pami lenra, anum a wakak na ululeng kusapat una langit. Numur un nan urin ma un mur iau.”

²³Ra i longoro a wasiso ri i tupunuk doko, uni i a tene gongon sakit.

²⁴O Iesu i tama i, ra i watungi lena, “I ngangitin doko torom a kum tene gongon sur det in ruk una matanitu anun o God.

²⁵In ngangitin sur a kamel in ruk una mato na sur na susuk, ikut, i ngangitin doko ut, sur a tene gongon in ruk una matanitu anun o God.”

²⁶Ra det longoro a wasiso ri, det iting lena, “Ra i lenra, osi mo ra din ulauni?”

²⁷O Iesu i balu det lena, “Asau ra a taro ka det pet lar pasi, o God in pet lar pasi.”

²⁸O Pita i watungi tano lena, “Tama i, met sa wan gusun anumet a kum utna rop, ra met mur ui.”

²⁹O Iesu i watungi tandet lena, “A inanos mot nama lingmulus: Ra taio in nan gusun anun a rumu, o gusun anun a ino, o a kum tistisino, o gusun o nano, o gusun o tamano, o a kum nutnutunu, kibino una matanitu anun o God,

³⁰una nilaun ri, din tabori nama susut na utna lenri ra i sa wan pas gusuni. Ma una nilaun numur din tabori nama nilaun tukum.”

³¹O Iesu i ben gisen pas anun a noino ma aru nat na ususer, ra i watungi tandet lena, “Tama i, iri dat wan nanan usapat o Jerusalem, ma din pam sot pas a kum utna rop ra a kum poropet det sa tumus tari una Nutun a Musano.

³²Uni din pitar tari torom det ra awu sur a taro Juda. Det in urongon laulau uni, det in ban laulau i, det in ibisi, det in mirasi, ma det in um doko i.

³³Ra a tulu bung in rop, in katutur melet.”

³⁴A kum nat na ususer ka det talapor una kum utna rop ri. A kukuraino kura i parau, ma ka det tasman asau ra o Iesu i wasiso uni.

³⁵Ra o Iesu i wan milau o Jeriko, ara musano a pulu i kis taru una papor ina kisapi, i ser saring utna.

³⁶I longoro a kunur na taro det wan nanan milau, ra i iting lena, “Asau ra?”

³⁷Ra det inanosi lena, “O Iesu a te Nasaret ri i wan sakit dat.”

³⁸Ra i kakabo sapat lena, “Iesu, a Nutun o Dewid, un maris iau.”

³⁹Det ra det mugu, det turbati sur in kis wowowon. Ikut i kakabo dekdek makai usapat lena, “Nutun o Dewid, un maris iau.”

⁴⁰O Iesu i tur sikot, ra i itula sur din ben pasi toromi. Ra a pulu i sa wan milau i, i tingi lena,

⁴¹“Asau ra u nemi sur an pami un ui?” I balu i lena, “Labino, a nemi sur an tamtama.”

⁴²Ra o Iesu i watungi tano lena, “Un tamtama! Anum a nurnur i sa utamtama pas ui.”

⁴³Uniutra i tamtama, i mur o Iesu, ra i watung ulabo pas o God. Ma a taro rop kai ra det tama i, det watung ulabo pas o God.