Irokashi 18:20-43

²⁰Pogotakerotari magatiro itsirinkakotanakerira Moiseshi okanti: ‘Gara piatashitiro tsinane, gara poganti, gara pikoshiti, gara pitsoeventari pitovaire, pimpinkatsaigakerira piri ontiri piniro gara pipugatsanaigari.’

²¹Irirori ikantiri: —Arioniroro nokañotari maika notsititanakero notsatagasanotanakerora notyomiakyanira ovashi maika.

²²Ikemavakerira Jeso ikantiri: —Maika ontivani piatakera pimpimantagetakerora magatiropage pashintagetarira pagantakemparora koriki pimpaigakerira kogakoigankicharira, impo pimpokake pogiavagetanakenara. Impogini ariokya inkavintsaavagetakempi Tasorintsi enoku.

²³Kantankicha ikemutatyo ikantakerira ogatyo ikenake ikenkisureavagetanaka, intitari shintavagetacharira.

²⁴Yogari Jeso ineavakerira ikenkisureanakara ikanti: —¡Okomuvagetaratyo kara irogavisaakoigakenkanira shintavageigacharira impegakempara Tasorintsi Igoveenkariegite!

²⁵¿Matsi ario iragaveake kameyo inkianakera otsempokiku kitsapi iravisakerora aikyara? Garatyo yagaveimati. Irirompasanotyo shintavagetacharira intasanotakemparorika yashintagetarira garatyo yogavisaakotagani.

²⁶Ovashi ikantaigake kemaigakeririra ikantakera maika ikantaigiri: —Iroroventi ¿tyanimpatyora irogavisaakotakenkani?

²⁷Yogari Jeso ikantaigiri: —Gara tyani gavisaakotumatacha tsikyata, intaganitari Tasorintsi gaveatsi yogavisaakotantira, teranika tatoita komutapitsatumatemparine irirori.

²⁸Impo inianake Perero ikantiri: —Notinkami, naroegi nokaiganakero magatiro nashintaigavetarira nogiavageiganakempira.

²⁹Ikanti Jeso: —Maika nonkamantasanoigakempi, tyanirika okanakerone ivanko ontirika itsinanetsite intirika irirentiegi, iritsiroegi, iriri, iriniro intirika itomiegi, iriatakera inkamantaigakerira pashini tyara inkantaigakempa kameti irogavisaakoigakerira Tasorintsi impegakempara Igoveenkariegite

³⁰impakenkani pashini aka kipatsiku pairotyo avisavagetakero yashintagevetakarira, impogini inkantakani intimake gara ineimatairo igamane.

³¹Impogini ikaemaigakeri irogamereegi iriroku ikantaigiri: —Maika aiganakai Jerosarenku ontsatagagetanakempara magatiro itsirinkaiganakerira kamantantaigatsirira pairani itsirinkakoigakerira Kañotasanotakaririra Matsigenka.

³²Iragakagantakenkanitari iramanakenkanira inaigakera terira iriroegi jorioegi isamatsanatakenkanira, intsoenkanatakenkanira, intoatoanatakenkanira.

³³Impo impasapasatakenkani ovashi irogakenkani, kantankicha omavatanakempara kutagiteri iranianaetyo.

³⁴Kantankicha iriroegi teratyo irogotumaige tatoita iniakotake teranika inkemaigavakerinika. Tyampatyo inkantaigakempa irogoigakera, okomutapitsaigakaritari.

³⁵Panikyara irogonketapaakempa Jeso Jerikoku, ario ipitake kara onampinapokiku paniro terira inee inevitantavagetakera koriki.

³⁶Ikemaigavakerira yavisaiganakera tovaini matsigenkaegi ikanti: —¿Tatatyo oitara?

³⁷Ikamantunkani ikantagani inti pokapaatsi Jeso Nasarekunirira.

³⁸Ikaemamatanaketyo: —¡Jesoo, Iyashikitanakerira Iravi, tsarogakagavagetenakario!

³⁹Yogaegiri ivaigapaakeririra Jeso ikantaigiri: —¡Atsi kemisantenityo! Kantankicha irirori teratyo inkeme, ariompatyo ikaemasanotanakeri: —¡Viro, Iyashikitanakerira Iravi, tsarogakagavagetenakario!

⁴⁰Yogari Jeso asatyo yaratinkapaake ikantake iramakenkanira. Impo yamunkanira aiñoni ikantiri:

⁴¹—¿Tata pikogake? Inianake irirori ikanti: —Notinkami, onti nokogake noneanaera.

⁴²Ikantiri Jeso: —¡Iroroventi maika neanake!, pogotaketari nagaveakera noneakagakempira.

⁴³Irorotyo ikantakerira ogatyo ikenake ineanai ovashi iatake yogiatanakerira, ishineventakarityo Tasorintsi kara ikanti: —¡Pairo ikavintsaavagetakena Tasorintsi! Ario ikañoigaka maganiro neaigakeririra ishineventaiganakarityo Tasorintsi.