Luk 18:20-43

²⁰Keik kokilea mengkatien keil onen Ahi tuai, ‘Minakurtei ahin vuo meatin onen hanu sav. Minouastei meatin namat. Minahenantei tounah. Minoumontei luvosien naha kat isen meatin sav. Mihehouhou min tata ka mama onami keil.’”

²¹Hetamen enek vit kesi mini vit, “En avong koa navi ehon mai rokol kosa, narrali kotehtei etai mengkatien keil ekek.”

²²Navong Iesu longe mukok, kei viteni mini vit, “Tounah tamun kormumontei veah. Kiha kisalem en tounah vasi keil onom ka kititi mani teni heha ven koakeil tounah one tovuol. Hesakini, en out nesa, tounah onom keil hemai hehi houlu tamun. Hevus, kimai kusil kat inau.”

²³Navong hetamen enek long selusien keil onen, kei longe tisa, veni tounah keil onen houlu ramat.

²⁴Navong Iesu lesi keke hetamen enek mul longe tisa, kei viteni min meatin keil vit, “Keih ramat keke koakeil tounah one houlu avamaen Ahi vamai vahi asuv houlu en moulien one.

²⁵Keih ramat keke mari kamel vakirisil en meten nidil tai. Ka keih tamun emau keke meatin koa tounah onen houlu vamaen Ahi vamai vahi asuv houlu en moulien onen.”

²⁶Koakeil alonge amutimanin ka avis Iesu avit, “?Hemukonek, isei varei kilea vakur moulien koa sakras vavus?”

²⁷Ka Iesu vit kesi min keil vit, “Anatin keke meatin keil asakras avoumon etai tounah vasakin keil avakur moulien koa sakras vavus, ka Ahi kilea vahiten isei kilea vakur moulien koa sakras vavus.”

²⁸Evus, Pita viteni mini vit, “?Ka mukave suk en komai? Melokovein tounah keil onomai ka memul memusil katuk.”

²⁹Iesu viteni vit, “Nakilea. Anatin eli naviteni min kami keke Ahi hesan uite teni min koakeil vasi alokovein teim one, vuo ahin one, vuo tue keil, vuo tata one, vuo mama one, vuo titiali keil one emun keke avousil kat Ahi ka avasakin hiasuvien onen vamai vamarite mok en moulien onen meatin keil.

³⁰Anatin, Ahi hesa kesi min keil hehi houlu tamun en out netan ekek. Ka en out nesa mun, keil ikur moulien koa sakras vavus.”

³¹Iesu kur seh en teindan elu onen ran meatin sav keil. Evus, viteni min keil vit, “!Mihelong nau! Kosa, romul rovaha en out Serusalem. Ka en out enek, tounah vasi keil koa provet keil telamu avit luvati usil Natin Meatin hemai hekistal hehi anatin.

³²Tei en meatin keil imaen kei heha en hen koakeil koa arvitei Siu keil. Keil umon tohtohien heha kati, keil umon tounah keil tatisa mini, ka itiv kati.

³³Keil utetahi, ka u vini hemat. Ka navong avong etel heli, kei hemoul eris ran matien.”

³⁴Ka meatin keil onen areingeingen asa koa Iesu mul selus usili, veni aneite ten selusien keil onen mul suai ran keil.

³⁵Navong Iesu ral min koakeil amul amusili umai vesesal en taon ten out Seriko, meatin tai koa meten keilu luvar mul rondan en vali sise ka mul viram en mani.

³⁶Navong kei long vangi meatin keil amul amual amuli, vis keil vit, “?Asa ke?”

³⁷Ka avit kesi mini avit, “Iesu ten out Nasaret mul mual muli va.”

³⁸Navong metovar longe mukok, kei viso keih vit, “!Iesu, natin asuv houlu Deved! !Em hemahis inau li!”

³⁹Navong kei viteni mukok, meatin keil koa amual mulamu aselus keih mini avit, “!Kito raeng!” Ka avaseini, kei viso keih tamun vit, “!O natin asuv houlu Deved! !Em hemahis inau li!”

⁴⁰Ka navong Iesu long hisoen onen, kei vati ka viteni min meatin keil vit, “Mihelamun meatin enek hemai.” Ka navong mai vesesal veni, Iesu visi vit,

⁴¹“?Em vati moumon sa minuk?” Ka metovar enek viteni vit, “Asuv, ek vati li malele ris.”

⁴²Ka Iesu viteni mini vit, “!Tahos, kilele ris! Ven demkatien onom keih, metom keilu lumai ris lutahos.”

⁴³Hatte tas, metovar enek kilea valele ris. Sakini kei san masmasien min Ahi ka musil kat Iesu. Navong vangi meatin keil alesi, keil vasi amasmas Ahi veni.