San Lucas 18:20-43

²⁰Ya itconixmati in tlanauatil: “Amo itmocalaquis iuan naquin amo iuan itnamiqueh, amo ittemictis, amo ittlachtiquis, amo itteistlacatlalis, ittlacachiuas mopapan uan momaman.”

²¹In tlacatl ocnanquilih: —Nochi non, ihcuac oc inconetl onipeu incualchiutiu.

²²Ihcuac Jesús oquicac non, oquiluih: —Se tlamantli oc mitzonpoloua: Ixconnamaca nochi tlen itconpia, uan ixquimonxilui naquin amitlah icpiah. Uan ohcon itich in iluicac itconpias mic tlen moaxca. Uan xouiqui uan xoni notlasalohcau.

²³Ihcuac ohcon oquicac in tlacatl, simi otlaocox, nic yeh simi ocpiaya mic tlen iaxca.

²⁴Jesús oquitac quen simi otlaocox, uan oquihtoh: —¡Simi oueh calaquisqueh campa motlanauatilia Dios, naquin icpiah mic tlensaso!

²⁵Tlamilauca, ocachi amo oueh panos se camello ic itich nicuitlapil se acoxah, uan amo se tominehqui calaquis campa motlanauatilia Dios.

²⁶Naquin ompa otlacactoyah octlahtlanihqueh: —Tla ohcon, ¿aquih uilis momaquixtis?

²⁷Jesús oquinnanquilih: —Tlen amo uilih icchiuah in tlacameh, Yehuatzin Dios mouilitia.

²⁸Ihcuacon Pedro oquiluih: —Ixconmotili, tehuan otcauqueh tlen otpiayah, uan mouantzin ityahtoqueh.

²⁹Jesús oquimiluih: —Tlamilauca innamechoniluia, nochi naquin oquicau ichan, noso isiuau, noso icniuan, noso itahuan noso iconeuan, ipampa ictematiltis nitiquiuahcayo Dios,

³⁰icsilis itich ninqueh tonalmeh ocachi tlailiuis mic uan amo tlen oquicau, uan itich in tlalticpactli tlen ualahtoc icsilis in yolilistli tlen ica in sintitl nochipa.

³¹Jesús oquinnotz sican in mahtlactlamome itlasalohcauan, uan oquimiluih: —Ixconitacan, tixtlehcotoqueh ityahtoqueh Jerusalén, uan ompa mochiuas nochi tlen oquihcuilohqueh in teotlanauatanih de niConeu in Tlacatl.

³²Ictemactisqueh inmac naquin amo judíos, yehuan ica uitzcasqueh, tlensaso quihiluisqueh, uan icchihchasqueh,

³³ictacapitzosqueh, uan satepan icmictisqueh. Masqui ohcon, ipan yeyi tonal yancuicayolis.

³⁴Pero yehuan amo ocahsicamatqueh tlen oquimiluih, uan nochi nin queh otlatiutoya para yehuan, ica non amo ouiliah cahsicamatih nitlahtol.

³⁵Ihcuac yoahsitayah Jericó, ompa ocatca se tlacatl popoyotl otolohtoya itenco in ohtli ocmihtlanihtoya tomin.

³⁶Ihcuac oquicac opanotoyah miqueh tocniuan, octlahtlan tlenoh omochiutoya.

³⁷Uan oquiluihqueh nic ic ompa panotoc in Jesús de Nazaret.

³⁸Ihcuacon yeh octzahtzilih: —¡Jesús, Ualeuani de David, ixnechonicnomati!

³⁹Tlen oyayah tlayacapan ocahuayah masintlacaqui, masqui ohcon yeh ocachi chicauac octzahtzilaya: —¡Ualeuani de David, ixnechonicnomati!

⁴⁰Ihcuacon Jesús omonactih uan otlatiquitih macualiquilican inauac. Ihcuac yoehcoc inauac octlahtlanih:

⁴¹—¿Tlenoh itconniqui manchiua mopampa? Yeh otlananquilih: —NoTecotzin, inniqui intlachias.

⁴²Jesús oquiluih: —Ixconsili motlachialis, motlaniltoquilis yomitzonpahtih.

⁴³Sanniman otlachix uan opeu iuan yaui in Jesús icuehcapantlalihtiu Dios. Uan nochtin in tocniuan, ihcuac oquitaqueh tlen omochiu, noiuqui ocuehcapantlalayah Dios.