LUUKA 18:20-43

²⁰/e mishi gwoŋḵan kun ’kwarkunu mo kun o gwo mo ki: Dhalku/ c̱al ki mii mii mo ma, dhali, Dhalka ’kosh ki mii ’kosh mo ma, dhali, Dhalku/ to ki mii ḵwal mo ma, dhali, Dhalki gwonthus ki mii aḵ mo ma, dhali, Taḵi cim dhali kwan mo ma.

²¹Dhali a’di ki thoḵ a’di gwo mo ki: Aris to gwansan dhukika/ mo ’peni yil pem jin taka/ dhuru’c mo be.

²²Dhali ka Yesus ciḵki a’di mo tani a’di ki o a’di gwo mo ki: Ton ṯal ’deŋ kamu/ di’d jin aṯẖa /e mo be. Yoli aris to gwansan kun tana /e mo ma dhali c̱iki uni gwansan kun hatha’ko’d mo dhali /e mini gam mo jin isha to ḵumma/ e momis mo dhali yayu/ mo dhali baṯẖaa/ isho’k mo.

²³Hili ki a’di ciḵki gwo gwansan mo tani a’di warkina bwa ki diṯ mo haali/ a’di ta wathi/ jin ta pa ki pa mo be.

²⁴Yesus hilki a’di mo dhali o gwo mo ki: Mii wa’di diṯa/ gom uni gwansan kun ta pa ki pa mo mmocic̱ Bampa/ ma Arumgimis mo be.

²⁵Haali/ a’di ’ka’da mii gom kalman mo mmoya ki solol e jisa ’dip̱ira/ mo mmodhal wathi/ jin ta pa ki pa e i is mo mmocic̱ Bampa/ ma Arumgimis mo be.

²⁶Uni gwansan kun ciḵki a’di mo tani o gwo mo ki: Waḵki/ wakan mo tani ija iminu iwoṯẖ mo sa/?

²⁷Hili a’di o gwo mo ki: To jin molu mii ki ’kwani mo tani a’di mishu mii ka Arumgimis mo be.

²⁸Dhala Buṯerus ki o a’di gwo mo ki: Hili mo mo ma, am dhalkina gu’b bam ’pen mo dhali baṯẖ /e nsho’k mo be.

²⁹Dhali a’di ki o uni gwo mo ki: Ka jiŋ gana/ aha/ ona um gwo mo ki: wathiŋ kamu/ yisa di’da jin dhalki gu’b piti ’pen mo walla ashim piti mo walla ikam piti mo walla icom mo walla uc̱im piti mo gom gway gi Bampa/ ma Arumgimis mo

³⁰a’di jin midi diki gam to jin maru is ki nyanye/ ki mo yansan mo dhali ki she/ yil jin midi p̱u’du/ mo tani a’di midi gam mondiki/e ki sule/ ya ye ’ba/ mo be.

³¹Dhali a’di ki sus uniŋ ’kume’d i’ce’dka su/ mo dhali a’di ki o uni gwo mo ki: Hili mo mo ma, ana iina ka gagamis mo e Pa Urushaliim mo be dhali aris to kun ’kwarkunu mo gom Ya/ gi ’Kwani mo ki imanc̱i gwo ma Arumgimis kadhamo/ mo tani minu thim mo be.

³²Haali/ a’di minu c̱i ’kwani kun ’koki ta ’Kwani Yahuuda/ mo dhali uni mini mii a’di ka maḵ mo dhali kar a’di ki mon’the is jin shi/ashi/ mo dhali ’taḵ a’di manya/ i is mo.

³³Dhali uni mini dor a’di mo dhali ’kosh a’di mo, dhali ka cim kwara mo tani a’di midi cuyi mis mo be.

³⁴Hili uni ’koki mish gwo ’ban gom gwo gwansan mo. Haali/ gwo yansan bagkunu mo ’peni uni mo dhali uni ’koki nyiṯẖ gwo jin okina a’di mo be.

³⁵Dhali ki a’di ’dishki Pa Ariiha is mo tani wathiny ja’daŋ kamu/ c̱a’bki’d e shemen bway tur mo mmo’tho to mo be.

³⁶Dhali a’di ciḵki’da waambuhany ’kwani mmo/iikina uni ki iim pe mo. A’di ki doṯ gwo mo ki: Ii yan ta’da tinta mo?

³⁷Dhali uni ki ṯor a’di gwo mo ka: Yesus gi Pa Naasira a’di yaki’d ki yampe mo be.

³⁸Dhali a’di cuu’d ki: Yesus Ya/ ma Dawuu’d, miiyi mii ap̱o/ aha/ mo ma.

³⁹Dhali uni gwahan kun ’koni buŋ’kup̱ mo tani ḵucurki a’di ki gwo mo mmoṯor a’di gwo mo mmoc̱a’b ki shwam mo. Dhali hili a’di cuu’d kagahara doḵ/e ki nyanye/ ki: Ya/ ma Dawuu’d, miiyi mii ap̱o/ aha/ mo ma.

⁴⁰Dhala Yesus doshki’d mo dhali ḵan a’di gwo mo ki a’di minu susu mo e a’di mo. Dhali ki a’di ’dishki a’di is mo tani a’di ki doṯ a’di gwo mo ki:

⁴¹Atinta o /e bwa ki aha/ mina mii gom /e mo? A’di thoḵ a’di gwo mo ki: Tap̱a, dhalki aha/ budha momish mo mo.

⁴²Dhala Yesus ki o a’di gwo mo ki: Budhi momish mom pini mo ma. Moŋgam gwo is pini a’di woṯẖki /e mo be.

⁴³Dhali ki jahanne/ a’di bu’thki momish mo mo dhali a’di ki baṯẖ a’di nsho’k mo mmokara Arumgimis ki ca mo dhali aris ’kwani, ki uni p̱arki a’di e mo tani uni c̱ina Arumgimis momaŋ mo be.