San Lucas 18:20-43

²⁰Te tikinmixmati n tlanawatílisteh: “Amo ximomekati; amo xitemikti; amo xitlachteki; amo xixolopijti; xiktlakita mota iwa n mona.”

²¹N tlakatl okili: —Ninteh tlanawatílisteh nikinchijtiwits desde ni telpotsintli.

²²Ijkuak Jesús ijkó okikak, okili n tlakatl: —Ok mitspoloa tikchiwas itla: xiknamaka nochi tlan tikpia iwa xikinxejxelili n próbesteh, ijkó tiktlawelpias kan ilwikak; tlamis xiwiki nowa.

²³Pero ijkuak n tlakatl ijkó okikak, satlawel omoyolkoko, porke okitlawelpiaya tomi.

²⁴Ijkuak Jesús okitak omoyolkoko, iwa okijto: —¡Owi kalakiskeh kan Dios tlanawatijtok akimeh kitlawelpiah tomi!

²⁵Okachi amo owi panos se “kameyo” kan ik iixtololo se akuxa, iwa amo se non kitlawelpia tomi makalaki ilwikak.

²⁶Yika akimeh ijkó okikakeh okijtojkeh: —Tla ijkó, ¿akin kalakis kan Dios tlanawatijtok?

²⁷Jesús okinmili: —Tlan amo weletih kichiwah n tlakah, Dios weleti kichiwa.

²⁸Ijkuakó, Pedro okili: —Tejwah otikkakajtejkeh nochi tlan otikpiayah, iwa otiwalajkeh mowah.

²⁹Ijkuakó Jesús okinnankili: —De milajka nomechilia, akin kikakajtewa icha, itajwah, ikniwah, isiwa, noso ipilwah, para kichiwas tlan Dios kinawatia,

³⁰noni kiselis okachi miak itech nin tlaltíkpaktli; iwa itech n tonatijmeh non sikin witseh, yolitos nochipa.

³¹Satepa, Jesús okinmoololo n májtlakteh iwa ome itlamachtijkawah iwa okinmili: —Xikkakikah, axa tiawih Jerusalén, Ne Non onimochi ni tlakatl nechtoktiskeh nochi tlan okijkuilojkeh n profetas.

³²Ompa nechtemakaskeh inmak non amo judíojteh, nechpijpinawiskeh, nechwijwikaltiskeh iwa nechchijchawiskeh.

³³Nechwitekiskeh, tlamis nechmiktiskeh. Iwa ipan eyi tonati nimoyolitis.

³⁴Itlamachtijkawah mach itla okajsikamatkeh, nion okimatiah tlan okintlapowiaya.

³⁵Ijkuak Jesús ya onajsia kan altepetl de Jericó, se tlakatl non amo otlachiaya omijtlanijtoka inakastla n ojtli.

³⁶Ijkuak n tlakatl non amo otlachiaya okinkak panotokeh miakeh tlakah, otlájtlanki tlan otlamochijtoka.

³⁷Okilijkeh Jesús de Nazaret ik ompa opanotoka.

³⁸Ijkuakó non tlakatl otsajtsik chikawak iwa okijto: —¡Jesús, Ikone n David, techiknomati!

³⁹N tlakah non oyayah tlayakapa okajwakeh para makitsakua ikamak. Pero ye okachi chikawak otsajtsik: —¡Ikone n David, techiknomati!

⁴⁰Ijkuakó Jesús omóketski iwa otlanawati makualikilikah n tlakatl; iwa ijkuak okualikilijkeh, Jesús okitlajtlani:

⁴¹—¿Tlan tikneki manimitstokti? N tlakatl non amo otlachiaya otlanankili: —Noteko, nikneki nitlachias.

⁴²Jesús okili: —¡Xitlachia! Por motlaneltokalis yotipajtik.

⁴³San nima n tlakatl non amo otlachiaya owaltláchixki, iwa oyá iwan Jesús kiweyijkachijti n Totajtsi Dios. Iwa nochteh n tlakah ijkuak ijkó okitakeh, noiwa okiweyijkachijkeh Dios.