Lokasu 18:20-43

²⁰Wa Yokanatkaluru Tokanchi pumata: Gi pumopatlewatanu. Gi puylalewatanu. Gi pchowguwatanu. Gi wa maleshawaka pupgujtalewashatanu. Pkagwakpiratanru puru ga wa punro.”

²¹Ponikolu wane china, “Pejnuruko tyekaka nkamrutatka nmaklutinwakawa.”

²²Ga wa Geso yijnakotlu tye. Wane china, “Satupje pmagatya. Pushankanru ptowruko wane pixle. Penekanna wa kwamonurune. Waneyapyi ponikole tengogneyapa. Punanu. Pomkagitanno.”

²³Giyagni ponikolu, walepirana yijnakotinitka, wamonuwnapotutatka gi rixanu ponikolpotni.

²⁴Retinri Geso, wane china, “¡Gi pakyaprenunanuktalu Goyakalu pogirewatyawaka jiglokinripna wa kserojiprojirune!”

²⁵Geso wane china koxa, “Myapretmakni kameyo tsapujripna tjiglokinripa wa ponikolu pnute jiglokyaplu Goyakalu pogirewatyawaka.”

²⁶Ga wa yijnakonatachine wane china, “Giyagni ¿katu gimkata gognetkaakotanu?”

²⁷Geso wane china, “Wa yineya mumkatanutu, wale rumkata Goyakalu.”

²⁸Giyagni Petro wane china, “Petanu. Wixa giknokamtlu wane wixle. Ga wa womkagitatkayi.”

²⁹Wale wane chinna, “Galikakni wane nchingi, girukokta giknokapjimta, ga wa ganunro, ga wa gimolene, ga wa rurune, ga wa wugenene Goyakalu pogirewatyawaka chinanu,

³⁰wale yoptotanru gixo kata pnute xani tyegognekaka, ga wa pagognesha ginachripa waneyaplu ruwekinri mnikawnakatupa.”

³¹Wa Geso ganikna pamole gepi. Wane chinna, “Xani Gerosale wkanikanutka, poyagkakikolupa pejnuruko Goyakalu tokanu geneklewatachine chinyongatyawaka wa Gita Yineru Wgennopirana.

³²Gi rixanu samyookalurupno payine yegi. Gapnokatkalurupno. Gektutetkalurupno. Ga wa gitskagjetkalurupno.

³³Kochipjetannona. Ruylatannona. Ga wa mapgogne chininri nyotunotanu.”

³⁴Ga wa wanna gi gimata jemlu tyepirana. Wanna yogimatika tyepirana. Gi rumatluna wa chinyawaka.

³⁵Wane rixatka. Gerikostsi rapokinitka, waneru satu maygaletu. Gatnugapostsi tuplanatachri. Sroschi gagjijetachri.

³⁶Wale yijnako giknogletinna gixolune yine. Repomlewata klunerni.

³⁷Runkakluna wa Geso Nasare Gajeru giknogamta.

³⁸Giyagni saplewjeta. Wane china, “Geso, Tawiklopisha, petwamonutanunno.”

³⁹Wa kosekamtachine chigetjetlu pochke rixinripa. Seyni wanepnute saplewjepotuta, “Tawiklopisha, petwamonutanunno.”

⁴⁰Giyagni Geso tunwata. Rawapjixlu Wale yegi. Wa rapyegitinitkalu, repomgalu.

⁴¹Wane chinru, “¿Klu palukatka wa nixyapyi?” Wale wane china, “Gitsrukaachi, netinripa.”

⁴²Ga wa Geso wane chinru, “Petanutka. Palixle gitskalakyi.”

⁴³Waneklu retatka. Romkagitatkalu. Rumalwumtlu Goyakalu. Ga wa pejnuruneko yine getinri rumalwutluna Goyakalu.