Luk 18:20-43

²⁰U tasman a warkuraila: ‘Gong u tol a toltol laulau ana ta hane anuna tik o ta barsan anuna tik, gong u umkol tik, gong u kinkinau, gong u artitiu asasongo, ur hanrawai e tamam pa e tnam.’”

²¹A barsan ning i kelesi mang, “Turpasi ning a kaklik ot tuk tar onone, a sira longor ana warkuraila rop ne.”

²²Ning e Iesu i longori, i atongi tana, “Ning a utna ot u kapan suri. Ur siuran sen anuma ututnala rop, pa a mani onoi ur tabar a kapan a taraila ono. Ning ur toli larning, anuma wakak a ululeng saot na langit. Lamur ur han ute pa ur mur iau.”

²³Ning i longor a warwara ne i bal maris kol, anasa anuna ututnala i galis kol.

²⁴E Iesu i tai teteki pa i atongi mang, “I ngangaten kol tetek a gongon a tarai sur lar kas ana matanitu ane God!

²⁵I ngangaten tetek a kamel sur ir kas ana mosol a sur a susuk, ika i ngangaten kol tetek a gongon a barsan sur ir kas ana matanitu ane God. Momolna, bel ir tolsot pasi.”

²⁶Ning la longor a warwara ne, la deke mang, “Manglarning, esi ma ning dir alauni?”

²⁷E Iesu i keles la mang, “A utna ning a tarai bel lar tolsot pasi, e God ir tol asoti.”

²⁸E Pita i atongi tana mang, “Oroi, mila ka han kusun anumila na ututnala rop, pa mila mur u.”

²⁹E Iesu i atongi tanla mang, “A atong momoli ta mulo, ning tik ir han kusun anuna rumai, o kusun anuna hane, o na tastasnala, o kusun e tana, o e tamana, o na natnatnala, kamkamna ana matanitu ane God,

³⁰ana lalaun onone ir kibas a galis kol ana tarai pa utna i ka han pas kusuni. Pa ana lalaun lamur dir tabari ana lalaun tikin.”

³¹E Iesu i ben maskan pas anuna ning a bonot pa naur a kakak a asaer, pa i atongi tanla mang, “Oroi, onone dalar han usaot e Jerusalem, pa dir tolsot pas a ututnala rop ning a propetla la ka tumus tari ana Nat a Barsan.

³²Anasa dir saran tari tetek la ning belsur a tarai Juda. Lar morot laulau onoi, lar atong laulau i, lar namisi, lar mirasi, pa lar umkoli.

³³Pa ana atol a pukakiar ir laun ot ulak.”

³⁴A kakak a asaerla bel la talapor ana ututnala rop ne. A kamkamna i kes mumun kusun la, pa bel la tasman asaning i warwara ono.

³⁵Ning e Iesu i han milau e Jeriko, ning a barsan a kut i keskes ting na ris a ngas, i nununung utna.

³⁶Ning i longor a kunum a tarai la han milau amon, i deke mang, “Asa ning?”

³⁷Pa la atai i mang, “E Iesu a te Nasaret ne i han bolos dala.”

³⁸Pa i kukuk mang, “Iesu, a Nat e Dewit, ur maris iau.”

³⁹Pa la ning la nigo la sairasi sur gong i agaia. Ika i arkabah rakrakai ot mang, “Nat e Dewit, ur maris iau.”

⁴⁰E Iesu i tur, pa i arsune sur dir ben pasi teteki. Ning i ka han milau teteki, i dekeni mang,

⁴¹“Asa ning u mang sur ar toli hom?” I kelesi mang, “Leklek, a mang sur ar tai.”

⁴²Pa e Iesu i atai i mang, “Ur palpalas matam! Anum a tortorot ka alangolango pas u.”

⁴³Aiap ka i palpalas matana, pa i mur e Iesu, pa i atong aitna pas e God. Pa tarai rop otleng ning la oroi, la rakan aleklek e God.