Lucas 18:5-16

⁵meneng keilangan tebangan ko se bayi balo seini, so gayed a din egbuyungen. Megkelomay a kwani aw gayed sikandin meglikò-likò.’”

⁶Minikagi heman se Pengolo, “Na, eneng-enengi niyo se inikagi te howis, so pengkey kenà egpenimanem, meneng tebangan din se otaw gayed egpemoyò.

⁷Labi pa metoman se Timanem egpenabang te otaw pinemallì din aw egpengenganay dan diyà kandin te kelikit te aldaw aw delem. Eked sikandin peg-alà-alà,

⁸meneng metoman menabang kandan te eked kenamay. Yan, ikà niyo eglengà te pegtawal-tawal niyo diyà kandin. Metoman a lomikò Timanem Migpekeotaw, aw ibeg ko kitaen se medita otaw egsalig diyà kanak.”

⁹Nayan, mig-indan si Jesus te tegdeyanan seini diyà te menge otaw eden dan aw metòlid se eg-inangen dan, aw gayed dan eglindò te doma.

¹⁰Minikagi si Jesus, “Doen dowa otaw dimoton te dakel simbahan te Jerusalem amon megtawal-tawal dan. Parisiyo se sebad, aw iskribinti se sebad.

¹¹Timindeg kidoen se Parisiyo aw migtawal-tawal, kagi din, ‘E Timanem, egpesiontong a diyà kamno, so labi a pa mèpiya diyà te menge doma otaw, so kenà a iling te otaw eg-akal, aw eglàpang te punù, aw eglakad. Egpesiontong a so kenà a medaet otaw iling te iskribinti sida.

¹²Kelikit te simana, mekedowa a egpowasa. Gayed ko ipegbowang se ikesempolò ketengà te kwarta eg-ebaten ko.’

¹³Meneng pegtawal-tawal te iskribinti, migpekediyò sikandin diyà te menge doma otaw so neyàyà. Wedà heman lengag doton te langit, meneng timikelong sikandin aw dinapì din se kagpa din tandà te pegselsel din, aw minikagi, ‘Timanem, keidowi a bag, so nelegeb a te salà.’

¹⁴Na, penenalan kaw te kagi ko. Peg-olì te iskribinti sìyan, pigwedad den te Timanem se salà din. Meneng se Parisiyo, wedà pegwedadi te Timanem se salà din. Inangen te Timanem medanà se kedita te otaw egpelangkaw-langkaw, meneng inangen din melangkaw se kedita te otaw egpedanà te kandan pegkeotawun.”

¹⁵Nayan, doen menge otaw nengibing te dedeitek mengisù doton ki Jesus amon pemàdan din dan, aw megtawal-tawal te begayan dan te Timanem te mèpiya. Meneng pegkità te menge tinoledaan din kenyan, migsagda dan kandan.

¹⁶Meneng tinawal i Jesus se kedita dan diyà kandin, aw minikagi sikandin, “Ikà niyo egsagda kandan, so lomowan se Timanem diyà te otaw ontò somalig diyà kandin iling te pegsalig te mengisù diyà te amay aw inay dan.