ሉቃሳ 18:5-16

⁵ሃ ኣምዔ ሚሺራታ ታና ላባንꬂያ ዲራዉኔ ኡባ ዎዴ ታኮ ያዴ ታና ዳቡርሴና ማላ፥ ታኒ ኢዚው ፒርዳና› ጌዳ።

⁶«ሄ ማካላንቻ ዳናይ ጎዋ ኣኬኪቴ።

⁷ፆሳይ ጋላሲኔ ቃማ ባሬንታ ማዳና ማላ፥ ዳንዳያን ኣኮ ዋሲያ ዶሬታዋንቱሲ ፒርዴኔዬ? ኢ ኡንቱንቶ ኤሌካ ዛሬኔ?

⁸ታኒ ሂንቴንቶ ያጋይ፤ ኡንቱንቶ ኤሌሊ ፒርዳና፤ ሺን ኣሳ ናዓይ ዪያ ዎዴ ሃ ቢታን ኣማኑዋ ዴማኔሻ?» ያጌዳ።

⁹ባሬንታ ጌሻ ጊዴ ኣማኔቲያዋንቶኔ ሃራ ኡባ ዳሪ ካꬊያዋንቶ፥ ዬሱሲ ሃ ሌሚሱዋ ኦዴዳ፡

¹⁰«ላዑ ኣሳቱ ዎሳናው ጌሻ ጎሊያ ጌሌዲኖ። ሄዋንቱፔ ኢቱ ፓሪሳዊያ፤ ኢቱ ቃይ ቃራፃ ቃንፂያዋ።

¹¹ፓሪሳዊ ዴንዲ ኤቂዴ ባሬ ዎዛናን ዎሲዴ፥ ‹ፆሳው፥ ታኒ ሃራ ኣሳዳን፡ ቦንቂያዋንቱዳን፥ ማካሊያዋንቱዳን፥ ዎሹሚያዋንቱዳን፥ ዎይ ሃዋዳን ቃራፃ ሺሼና ዲራው ኔና ጋላታይ።

¹²ሳሚንታን ላዑ ካላ ፆማይ፤ ታኒ ዴሚያ ኡባፔ ታሙ ኩሺያፔ ኢቱዋ ኢማይ› ያጌዳ።

¹³«ሺን ቃራፂያ ቢታኒ ሃኩዋን ኤቂዴ፥ ባሬ ኣይፊያን ፑዴ ሳሉዋ ꬎቁ ጊዴ ፄላናዉካ ኮዪቤና። ሺን ባሬ ቲራ ባቂዴ፥ ‹ፆሳው፥ ታኒ ናጋራንቻ፤ ታና ማራ› ያጌዳ።

¹⁴ታኒ ሂንቴንቶ ኦዲያዌ ኣዬ ጎፔ፥ ካሴ ቢታኒያፔ ኣꬊዴ ሃ ቢታኒ ፂሎ ጊዲዴ ባሬ ጎሌ ሲሜዳ፤ ባሬና ꬎቁ ኦꬂያ ኡባይ ካዉሻና፤ ባሬና ቃይ ካዉሺሲያ ኡራይ ꬎቁ ጋና» ያጌዳ።

¹⁵ዬሱሲ ባሬ ኩሺያ ዎꬂዴ ኣንጃና ማላ ኣሳይ ጉꬃ ናና ኣኪዴ ኣኮ ዬዲኖ። ኣ ካሊያዋንቱካ ቤዒዴ፥ ኣሳ ኣሄና ማላ ጌዲኖ።

¹⁶ዬሱሲ ቃሲ ጉꬃ ናና ባሬኮ ፄሲዴ፥ «ጉꬃ ናናይ ታኮ ያና ማላ ኣጊቴ፥ ዲጎፒቴ፤ ፆሳ ካዉቴꬃይ ሃዋንቱ ማላሳ።