LUUKA 18:5-16

⁵hili goma ’bom yansan jin wun ma kaṯẖ mo mmoṯu/ulkina a’di aha/ ki mii mo tani aha/ mina mii ka ḵar/e goma yim mo, wakan ka yim midi diki wuyaa/ is e mo ki yam piti jin rashina a’di mo be.

⁶Dhali Tap̱a ki o gwo mo ki: Ciḵi gwo mo ma, jin on ma mandwall gwo jin diki ta amanmii ka ḵar/e mo.

⁷Dhali min ma Arumgimis diki mii ka ḵar/e gom kum piti kun kwanykina a’di mo ’taa? uni gun gwoki ’twa/ i a’di ki montee ilu/ mo dhali ki mon’thiny mo ’taa? Mina a’di itaya adiiṯe/ ap̱o/ uni mo ’taa?

⁸Aha/ ṯora um gwo ki a’di midi mii ka ḵar/e gom uni ki jahanne/ mo. Bahili ki Ya/ gi ’Kwani midi p̱u’du/ mo tani mina a’di gam moŋgam gwo is e mony’cesh mo ’taa?

⁹A’di si’da/ ki ṯor gwom ’bi’th/e yansan ki uni gun gam ’twa/ ’kup̱ ki is buni mo ki uni ta kuŋ ḵar/e mo dhali waḵ kun tiya mo.

¹⁰’Kwani su/ iikin mo e gu’b gi mondheleladhelel mo mmo’tho mo. Jan ’de/ ta Wathim P̱arisi mo. Dhali jamu/ ta’da mantera thulp̱a/ mo be.

¹¹Wathim P̱arisi doshki’d mo dhali ’tho kan ki is piti mo ki: Arumgimis, aha/ ’bora /e bwa i is mo ki aha/ dinaki waki ’kwanin tiya mo kun ta imanḵwal to mo dhali kun ’koki ta kuŋ ḵar/e mo dhali imanmii miinyc̱al mo walla mmodiki wa e ka mantera thulp̱a/ yansan mo be.

¹²Aha/ ga/a to mo me’di su/ ka dhas mo. Aha/ c̱ina to mo jin taḵu Arumgimis ’peni to ’baar mo jin gamkika/ mo be.

¹³Hila mantera thulp̱a/ a’di doshki’d isa dhana/ mo, a’di diki ’de’k em piti ’kup̱ ki momis mo, hili a’di dorki’da bor piti ki me’d mo mmo/o gwo mo ki: Arumgimis, miiyi mii ap̱o/ aha/ jin tana amanmii miinthus mo.

¹⁴Aha/ ṯora um gwo mo ki: wathi/ yansan yaki’d ka luŋgu’b bway gu’b piti mo ki mo ma ḵar/e mo, ma mo dhalka kamu/ mo. Haali/ aris ’kwani ’baar mo ka ’deṯe/ ’deṯe/ mo kun dhu is buni ki ca mo tani uni minu dhu ki gwa’d mo, hili a’di jin karki is piti ki gwa’d mo tani minu kar ki ca mo be.

¹⁵Dhali uni ’kokin mo si’da/ mmosusi usha ’pereny i a’di mo ki a’di midi ta uni is ki me’d mo. Dhali ki imanciḵ a’di gwo p̱arki a’di e mo tani uni ḵucurki uni ki gwo mo be.

¹⁶Hila Yesus yuḵki uni i a’di mo mmo/o gwo mo ki: Dhalki ushi uc̱i iiyini aha/ mo ma, dhalki uni ki non mo. Haali/ ku gi wakan mo tani ’kon e Bampa/ ma Arumgimis mo be.