Luk 18:5-16

⁵Mewö maljalmö, malö kiaŋön mönö keu söksök pöndaŋ jim niŋgiba kamakzawaŋgöra ölan nöhöiga ölöp bauköm waŋgibiga keuŋi teköma. Qahö bauköm waŋgibileŋak ewö, yaŋön mönö qösösök kaiga qeriqeriŋi mötpileŋbuk.’”

⁶Kembunöŋ kösohot mi mem teköba jiyök, “Jimtekötekö azi goŋgoŋan keu jiyöhi, mönö miaŋgöra kezap ala könaŋi mötmöriget.

⁷Anutunöŋ ambazip nanŋaŋgöra möwölöhöm eŋgiyöhi, yeŋön suŋgem asak bauköm eŋgimapköra köulukögetka Anutunöŋ mönö yeŋgö keuŋini kewöta jim teköi ölöwakŋe. Bauköm eŋgimamgö jiba taŋqaŋ qahö aka nalö qahö könjörari öŋgöma. Mi qahöpmahöp!

⁸Nöŋön kewö jibi mötket: Anutunöŋ mönö nalö kude köriiga keuŋini kewöta jim teköi ölöwakŋe. Wölaŋ bauköm eŋgimakzapmö, mi töndup Suep gölmegö azi ölŋan liliŋgöba kaba ambazip kewöt eŋgimawi, nalö miaŋgöreŋ mötnarip ölŋi miwikŋaima me qahöpto?” Mewö.

⁹Ambazip tosatŋan nanŋinaŋgö mötket öŋgöiga solanŋi diŋdiŋi akzin jiba tosatŋi mötketka eretŋi ahök. Jisösnöŋ i eŋgeka dopkeu kun kewö jii mötket,

¹⁰“Azi yahötŋan jöwöwöl jikenöŋ öŋgöba köuluköyohot. Kunöŋ Farisi aka kunŋan takis meme azia.

¹¹“Farisi (Köna keugö kapaŋkölköl) yaŋön kinda nanŋök kewö köuluköyök, ‘O Anutu, ambazip tosatŋan uruŋini goŋgiiga kalöpmalöp aka sero yoŋgorö ahakze, ni yeŋgö dop qahö maljal me takis meme endu kinjawi, ni yaŋgö dop mewöyök qahö maljal. Miaŋgöra saiwap jim gihizal.

¹²Nöŋön sonda dop sömaŋi yahöt nenegö siŋgi malakzal. Nöŋön moneŋ inapni pakpak mendeŋda 10:nöhök mohok Anutugö buŋaya qemakzal.’

¹³“Mewö köuluköyökmö, takis meme yaŋön waŋgömŋi kunöŋ kinda Suepnöŋ eu umamgö gamuŋi möta böröŋan jeŋi esuhuba kewö köuluköyök, ‘O Anutu, siŋgisöndok azi ni mönö ak kömum niŋgiman.’

¹⁴Nöŋön kewö jibi mötme: Yaŋön mönö Anutugö jeŋe solaniba miriŋe liliŋgöyökmö, Farisi (Köna keugö kapaŋkölköl) yaŋön mewö qahö. Denike yeŋön nanŋini uruŋini memba öŋgömei, Anutunöŋ mönö i körek memba et al eŋgimapmö, kunŋan nanŋi uruŋi memba etmawi, Anutunöŋ mönö i memba öŋgöba al waŋgima.” Mewö.

¹⁵Ambazip tosatŋan nahönbörat morömorö mewöyök eŋguaŋgita Jisösnöŋ böröŋan eŋgimisirimapköra yaŋgöreŋ kaget. Kagetmö, gwarek yeŋön mi eka jim qetal ak eŋgiget.

¹⁶Mewö aketmö, Jisösnöŋ nahönbörat mi köl öröm eŋgii kagetka kewö jiyök, “Nahönbörat moröŋi mi ölöp eŋgömosötketka nöŋgöreŋ kame. Anutunöŋ ambazip mewö mia bemtohoŋi buŋa qem eŋgima. Miaŋgöra i kude jöhöm eŋgime.