LUKU 18:5-16

⁵lán gyaanↄↄ pì e ĩa daama nà, mɛ́ zɛo. Tó mɛ́ɛ kɛ lɛro, à zɛmalana yãana sai é ma ã'ãmɛ.

⁶Ben Dii bè: À yãkpaɛkɛri zaaa yã'ona ma.

⁷Luda é zɛ kↄ̃n gbɛ̃ kɛ̀ à ń sɛ́ aↄ̃ↄe wii lɛɛa fãantɛ̃ kↄ̃n gwãavĩnↄoroo? Eé kɛ kↄkↄkↄ kↄ̃n weńlanaon yↄ́?

⁸Mɛ́ɛ ooare, eé zɛńyomɛ gↄ̃ↄ. Baa kↄ̃n beeeo tó Gbɛ̃ntee Nɛ́ sù, eé a náanɛkɛri e anduna guuↄ́?

⁹Ben à ɛ̀ara à yã kɛ̀kii lɛ̀kↄ̃zi gbɛ̃ kɛ̀ aↄ̃è ń zĩnda diɛ maa aↄ̃ kya káńgunↄnɛ.

¹⁰Gↄ̃ↄn plaa kenↄ bé wà gàa adua kɛ Luda ua guu, gbɛ̃ doo nɛ́ Farisimɛ, gbɛ̃ doo sↄ̃ bɛ'ↄↄsiri.

¹¹Farisi pì zɛna èe adua kɛɛ. À bè a swɛ̃̀ guu: Luda, ma n sáabu kɛ̀ kɛ̀ má dɛ lán gbɛ̃ kpaaanↄ bàro, dibidibikɛrinↄ, náanɛsaideenↄ, zinakɛrinↄ ke lán bɛ'ↄↄsiri kɛ̀ bà.

¹²Mɛɛ̀gↄ̃ lɛ́ yii gurↄ plaplaa azuma kↄ̃n azumao. Pↄ́ kɛ̀ má è píngi mɛɛ̀ à kuridee bↄnnɛ.

¹³Bɛ'ↄↄsiri pì sↄ̃ↄ zɛ kãaa, èe fↄ̃ à wɛ́ɛ sɛ̀ à musu gwà sero. À kpãngeda kɛ̀ à bè: Luda, ǹ sùu kɛmao, durunkɛrin ma ũ.

¹⁴Mɛ́ɛ ooare, gↄ̃gbɛ̃ pì tà a bɛ Luda yãsiona guumɛ, èe kɛ Farisi pìnlo. Zaakɛ gbɛ̃ kɛ̀ è a zĩnda sɛ́ lezĩ Luda é à busa. Gbɛ̃ kɛ̀ è a zĩnda busa sↄ̃ Luda é à sɛ́ lezĩ.

¹⁵Wèe mↄↄ Yesunɛ kↄ̃n ń nɛ́ fétenↄ lɛ à ↄ kɛḿma. Kɛ̀ à ìbanↄↄ è lɛ, ben aↄ̃ gìńnɛ.

¹⁶Ben Yesu nɛ́nↄ sìsi à bè: À tó nɛ́nↄ mↄ́ ma kiia, àton gíńnɛro, zaakɛ aↄ̃ takanↄ pↄ́n kpata kɛ̀ bↄ̀ Luda kiia ũ.