Luca 22:34-71

³⁴Jesuba idjía jarasia: –Mʌ̃a jaraya, Pedro, ara naʌ̃ diamasi eterre berui naẽna bʌa b̶arima ũbea mʌ̃ra unucaad̶a aya.–

³⁵Maʌ̃be Jesuba ãdjía jarasia: –Mʌ̃a bãrã parata neẽ́, buchaca neẽ́ idjab̶a jĩrũne jʌ̃bada neẽ́ diabuesid̶e ¿ne cʌre b̶aesid̶aca?– Ãdjirãba panusid̶aa: –Ni cãrẽ sid̶a cʌre b̶aeẽ́ basía.–

³⁶Maʌ̃ carea idjia jarasia: –Baribʌrʌ mʌ̃a jaraya: id̶ira parata erob̶ʌbʌrʌ ededua. Buchaca bara b̶ʌbʌrʌ maʌ̃ sid̶a ededua. Djõbada neco neẽ́ b̶ʌba idjia cacuad̶e jʌ̃barira nẽdobueped̶a ab̶a nẽdodua.

³⁷Mʌ̃a jaraya: Ãcõrẽneba bed̶eabariba mʌ̃nebema b̶ʌd̶ara wãrãda mãwãida b̶ʌa. Nãwã b̶ʌsia: ara idjida ẽberã cadjirua quĩrãca idu beabisia. Mʌ̃nebema b̶ʌped̶ad̶ara wãrãda jũma mãwãya.–

³⁸Maʌ̃ carea ãdjirãba jarasid̶aa: –Dai Boro, nama djõbada necoda umé eropanʌa.– Jesuba jarasia: –B̸esia. Waa bed̶earãnadua.–

³⁹Maʌ̃be Jesura wayacusa Olivo eyad̶aa wãsia idjia obari quĩrãca. Idji ume nĩbabadarã sid̶a wãsid̶aa.

⁴⁰Araa jũẽsid̶ad̶e Jesuba ãdjía jarasia: –Ãcõrẽa iwid̶id̶adua mʌ̃ igarad̶a amaaba.–

⁴¹Maʌ̃be Jesura mõgara tab̶arida b̶ʌ tʌmʌane wãsia. Chĩrãborod̶e cob̶eped̶a Ãcõrẽa nãwã iwid̶isia:

⁴²–Zeza, bʌmaa bia b̶ʌbʌrʌ, mʌ̃ra idu bia mĩgabirãdua. Baribʌrʌ mʌ̃a quĩrĩã b̶ʌ quĩrãca orãdua, ãtebʌrʌ bʌa quĩrĩã b̶ʌ quĩrãca odua.–

⁴³Mãwã b̶ʌd̶e bajãnebema nezocaba ʌb̶ʌada idjía diad̶e zesia.

⁴⁴Jesura bio sopua b̶ʌ bẽrã Ãcõrẽa wetara iwid̶i b̶asia. Maʌ̃ne idji jʌara oa quĩrãca egorod̶aa erozoasia.

⁴⁵Jesuba Ãcõrẽa iwid̶i b̶aped̶a jẽda wãsia. Maʌ̃ne idji ume nĩbabadarãra sopuaba cãĩ panʌda unusia.

⁴⁶Maʌ̃ carea ãdjía jarasia: –¿Cãrẽ cãrẽã bãrãra cãĩ panʌ? Pirab̶arid̶aped̶a Ãcõrẽa iwid̶id̶adua mʌ̃ igarad̶a amaaba.–

⁴⁷Wad̶i Jesu bed̶ea b̶ʌd̶e ẽberãrãda zocãrã jũẽcuasid̶aa. Judada ãdji nocoare b̶asia. Idjira Jesuba doce edad̶ad̶ebema basía. Jesu uridarrad̶e isõi carea caita wãsia.

⁴⁸Maʌ̃ne Jesuba idjía jarasia: –Juda, isõbʌrʌd̶eba ¿mʌ̃, Naʌ̃ Djara Edad̶ara bʌa jida diaica?–

⁴⁹Jesu ume nĩnaba cawasid̶aa idjira jidad̶ida. Maʌ̃ carea nãwã iwid̶isid̶aa: –Dai Boro, ¿necoba djõnica?–

⁵⁰Ara mãwãbʌrʌd̶e ab̶aʌba sacerdote dji droma nezoca cʌwʌrʌ jʌwa araarebemada tʌtasia.

⁵¹Maʌ̃ carea Jesuba jarasia: –¡Djõrãnadua! ¡Idu b̶ʌd̶adua!– Ara maʌ̃da dji ẽberã cʌwʌrʌra tãped̶a anibisia.

⁵²Maʌ̃be Jesuba sacerdote bororãa, Ãcõrẽ de dromanebema zarrarãa, dji droma b̶ea zeped̶ad̶arãa bid̶a nãwã jarasia: –Bãrãba ¿cãrẽ cãrẽã neco bara, bacuru bara mʌ̃ra jãwã jidad̶e ze panʌ? ¿Mãwãra mʌ̃ra ẽberã minijĩchiaca?

⁵³Ewariza mʌ̃ra Ãcõrẽ de droma dajada bãrã tãẽna b̶ad̶amĩna jidad̶aca basía. Baribʌrʌ ara nawena Ãcõrẽba diaurua idu poyabi b̶ʌa. Mãwã bãrãba o quĩrĩã panʌra o panʌa.–

⁵⁴Jesura jidad̶aped̶a sacerdote dji droma ded̶aa edesid̶aa. Pedroba tʌmʌba ẽpẽ nĩbasia.

⁵⁵Maʌ̃ne ʌ̃cʌrʌba de dud̶a tʌbʌda coad̶aped̶a caita chũpanesid̶aa. Pedro sid̶a ãdjirã tãẽna chũmesia.

⁵⁶Mãwã b̶ʌd̶e nezocawẽrã ab̶aʌba Pedrora tʌbʌ cã chũmʌda unuped̶a bio acʌ nũmesia. Maʌ̃ne jarasia: –Za b̶ʌra Jesu ume nĩbabadjia.–

⁵⁷Baribʌrʌ Pedroba nãwã mẽrãsia: –Bʌa jara b̶ʌ ẽberãra mʌ̃a unucaa.–

⁵⁸Dãrãẽ́ne dewaraba Pedrora unuped̶a nãwã jarasia: –Bʌra ãdjid̶ebemada jãwã b̶ʌa.– Maʌ̃ carea Pedroba jarasia: –Ache, mãwãẽ́a.–

⁵⁹Mãwãnacarea dewaraba jarasia: –Wãrãda za b̶ʌra Jesu ume nĩbabadjia. Idjira Galilead̶ebemada jãwã b̶ʌa.–

⁶⁰Baribʌrʌ Pedroba panusia: –Ache, mʌ̃a adua b̶ʌa bʌa cãrẽda jara b̶ʌda.– Pedro wad̶ibid̶a bed̶ea b̶ʌd̶e eterrera berusia.

⁶¹Ara mãwãbʌrʌd̶e Jesuba Pedrora jẽdaa pʌrrʌga acʌsia. Maʌ̃ne Pedroba quĩrãnebasia Jesuba idjía jarad̶ara: eterre berui naẽna bʌa b̶arima ũbea mʌ̃ra unucaad̶a aya.

⁶²Ara maʌ̃da Pedrora ãyã wãped̶a bio sopuaba jĩãsia.

⁶³Maʌ̃ne Jesu jida eropanʌ ẽberãrãba idjira ipid̶a biẽ́ jarabadjid̶aa idjab̶a puobadjid̶aa.

⁶⁴Jesura quĩrã bʌrad̶aped̶a ubadjid̶aa. Maʌ̃ne nãwã jarabadjid̶aa: –¡Ãcõrẽneba bed̶eadua! ¡Daia jaradua caibʌrʌ bʌra usida!–

⁶⁵Maʌ̃ awara ne quĩrãtanoa jara panʌneba Jesura biẽ́ jarabadjid̶aa.

⁶⁶Ãsa bad̶acarea purud̶ebema dji dromarãda ãbaa dji jʌresid̶aa. Sacerdote bororãda, judiorã ley jaradiabadarã sid̶a duanasid̶aa. Maʌ̃be Jesura ãdjirã quĩrãpita enebisid̶aa. Idjía nãwã jarasid̶aa:

⁶⁷–Dairãa jaradua: ¿bʌra Ãcõrẽba ẽdrʌ edabari diai jarad̶aca?– Jesuba panusia: –Mʌ̃a bãrãa jarabʌrʌ sid̶a ĩjãnaẽ́a.

⁶⁸Maʌ̃ awara mʌ̃a bãrãa cãrẽ cãrẽã ĩjãnaẽ́ panʌda iwid̶ibʌrʌ panunaẽ́a. Idjab̶a mʌ̃ra ẽdrʌ b̶ʌd̶aẽ́a.

⁶⁹Baribʌrʌ id̶iba ʌ̃taa mʌ̃, Naʌ̃ Djara Edad̶ara Ãcõrẽ ne jũma poya b̶ʌ jʌwa araare chũmaya.–

⁷⁰Maʌ̃ carea jũmarãba iwid̶isid̶aa: –Mãwã baibʌrʌ ¿bʌra Ãcõrẽ Warraca?– Jesuba panusia: –Mãẽ, bãrãba mãwã jara panʌa.–

⁷¹Maʌ̃ne ãdjirãba jarasid̶aa: –¿Dadjirãba waa cãrẽda jʌrʌd̶i? ¿Ara idji iteba jara b̶ʌẽ́ca idjira Ãcõrẽ Warrada?–