SAN LUCAS 22:34-71

³⁴―Ndiꞌya̱ nchcuiꞌ naꞌ loꞌo nuꞌu̱ juani, Pedro ―nacui̱ Jesús jiꞌi̱―, chaꞌ nu loꞌo tya lyiji xiꞌya ndyeꞌe talya juani, liꞌ sna quiyaꞌ ñacui̱ nuꞌu̱ chaꞌ ná nslo nuꞌu̱ ꞌna.

³⁵Liꞌ nchcuane Jesús jiꞌi̱ nguꞌ: ―Nu loꞌo ngulo naꞌ cña jiꞌi̱ ma̱ chaꞌ tsaa ma̱ xaꞌ quichi̱ nu ná loꞌo cujui̱ cñi jiꞌi̱ ma̱, ná loꞌo xaꞌ cujui̱, ná loꞌo caña jiꞌi̱ ma̱, ¿ha ntsuꞌu na nu lyiji jiꞌi̱ ma̱ liꞌ? ―Ná sca na lyiji jiꞌi̱ ya liꞌ ―nguxacui̱ nguꞌ chaꞌ jiꞌi̱.

³⁶Liꞌ nacui̱ Jesús jiꞌi̱ nguꞌ: ―Juaꞌa̱ ngua tuꞌni, pana xaꞌ ñaꞌa̱ ngaꞌa̱ chaꞌ cuaꞌni ma̱ juani. Nu cuꞌma̱ nu ntsuꞌu cujui̱ cñi jiꞌi̱ ma̱ ni, loꞌo biꞌ cuiꞌya ma̱ tsaa ma̱, loꞌo xaꞌ cujui̱ loꞌo; si ná ntsuꞌu maxtyi cusu̱u̱ jiꞌi̱ ma̱, ngaꞌa̱ chaꞌ cujuiꞌ ma̱ steꞌ ma̱ chaꞌ cuiꞌya ma̱ maxtyi.

³⁷Juaꞌa̱ chaꞌ nchcuiꞌ naꞌ loꞌo ma̱ chaꞌ ngaꞌa̱ chaꞌ tyuꞌu tucua chaꞌ cuxi nu nchcuiꞌ quityi cusuꞌ chaꞌ caca ꞌna. Ndiꞌya̱ nscua chaꞌ: “Ñiꞌya̱ nu nduꞌni nguꞌ loꞌo ñati̱ cuxi, juaꞌa̱ cuaꞌni nguꞌ loꞌo ycuiꞌ Cristo”. Lcaa chaꞌ nu nscua chaꞌ caca ꞌna, juaꞌa̱ caca ꞌna tuꞌni ―nacui̱ Jesús jiꞌi̱ nguꞌ.

³⁸Liꞌ nacui̱ nguꞌ biꞌ jiꞌi̱: ―Cusuꞌ, nde ntsuꞌu tucua tyaꞌa maxtyi cusu̱u̱ ―nacui̱ nguꞌ. ―Cuayáꞌ cua lacua ―nacui̱ Jesús liꞌ.

³⁹Liꞌ nduꞌu Jesús ndyaa yu ca lo caꞌya Olivos, ñiꞌya̱ nu nduꞌni ti yu. Loꞌo nu nguꞌ nu ndyaca tsaꞌa̱ jiꞌi̱ biꞌ, nduꞌu lcaꞌa̱ nguꞌ jiꞌi̱ yu liꞌ.

⁴⁰Nu loꞌo ndyalaa nguꞌ ca biꞌ, liꞌ nacui̱ Jesús jiꞌi̱ nguꞌ: ―Chcuiꞌ ma̱ loꞌo ycuiꞌ Ndyosi Sti naꞌ chaꞌ ná tyiji̱loo nu xñaꞌa̱ jiꞌi̱ ma̱ ―nacui̱.

⁴¹Liꞌ nduꞌutsuꞌ Jesús nde slo nguꞌ ñaꞌa̱ cuayáꞌ nu tyalaa sca quee cu̱ na, ca biꞌ ndyatu̱ sti̱ꞌ Jesús chaꞌ chcuiꞌ loꞌo ycuiꞌ Ndyosi.

⁴²―Sti naꞌ ―nacui̱ yu―, ¿ha ná ntsuꞌu xi xaꞌ la ñaꞌa̱ nu caca cuaꞌni naꞌ cña re, chaꞌ ngaꞌaa chcubeꞌ la naꞌ loꞌo cña tlyu re jinuꞌu̱? ―nacui̱ Jesús jiꞌi̱ ycuiꞌ Ndyosi Sti yu―. Pana ntiꞌ naꞌ chaꞌ cuaꞌni naꞌ cua ñaꞌa̱ ca cña nu ntiꞌ nuꞌu̱ chaꞌ cuaꞌni naꞌ.

⁴³Liꞌ nduꞌu tucua sca xca̱ nu ngutuꞌu slo ycuiꞌ Ndyosi nde cua̱, chaꞌ ta la juersa jiꞌi̱ Jesús.

⁴⁴Nu loꞌo lye tsa nchcubeꞌ Jesús, liꞌ lye la nchcuiꞌ yu loꞌo ycuiꞌ Ndyosi. Loꞌo liꞌ ntyucua jatá Jesús, ndyalú nchcuaꞌ lo yuu; ñiꞌya̱ si nchcuaꞌ tañi ycuiꞌ, juaꞌa̱ ñaꞌa̱.

⁴⁵Ndye nchcuiꞌ Jesús loꞌo ycuiꞌ Ndyosi Sti yu, liꞌ nguxtyu̱u̱ yu ñaa yu slo nu nguꞌ nu ndyaca tsaꞌa̱ jiꞌi̱ yu. Liꞌ nquije nguꞌ jiꞌi̱ yu, ndiꞌi̱ nguꞌ lajaꞌ nguꞌ chaꞌ ndye juersa jiꞌi̱ nguꞌ, chaꞌ xñiꞌi̱ tsa tiꞌ nguꞌ.

⁴⁶Liꞌ nacui̱ yu jiꞌi̱ nguꞌ: ―¿Ni chaꞌ laca ndiꞌi̱ ma̱ lajaꞌ ti ma̱? Tyatu̱ clya ma̱ chaꞌ chcuiꞌ ma̱ loꞌo ycuiꞌ Ndyosi, chaꞌ ná tyiji̱loo nu xñaꞌa̱ jiꞌi̱ ma̱.

⁴⁷Tya nchcuiꞌ ca Jesús loꞌo nguꞌ biꞌ, liꞌ ndyalaa quiñaꞌa̱ tsa ñati̱. Nu naa Judas biꞌ, tsaca yu tyaꞌa nu tii tyucuaa tyaꞌa nguꞌ nu ndyaca tsaꞌa̱ jiꞌi̱ Jesús ni, nguluꞌu yu tyucui̱i̱ jiꞌi̱ nguꞌ quiñaꞌa̱ biꞌ. Ñaa yu ca slo Jesús chaꞌ chcuichaꞌ yu sacaꞌ Jesús.

⁴⁸Liꞌ nchcuiꞌ Jesús loꞌo yu biꞌ: ―Judas ―nacui̱―, ¿ha biꞌ chaꞌ chcuichaꞌ nuꞌu̱ ꞌna chaꞌ tya nuꞌu̱ ꞌna yaꞌ nguꞌ cuxi, naꞌ nu cua nda Ni ꞌna lijya̱a̱ chaꞌ caca naꞌ ñati̱?

⁴⁹Loꞌo naꞌa̱ nguꞌ nu ndu̱ loꞌo Jesús ñiꞌya̱ caca chaꞌ biꞌ, liꞌ nchcuane nguꞌ jiꞌi̱ yu: ―Cusuꞌ ―nacui̱ nguꞌ―, ¿ha cuaꞌa ya jinuꞌu̱ loꞌo maxtyi, chaꞌ ná ca̱a̱ nguꞌ cua?

⁵⁰Liꞌ ngusicua̱ tsaca tyaꞌa nguꞌ biꞌ maxtyi jiꞌi̱ yu, ngusiꞌyu yu jyaca̱ sca msu jiꞌi̱ xuꞌna sti joꞌó; ngusiꞌyu cuꞌ yu scuaꞌ jyaca̱ laꞌa tsuꞌ cui̱ jiꞌi̱ yu.

⁵¹Liꞌ nacui̱ Jesús jiꞌi̱ nguꞌ: ―Cuayáꞌ tsa lo cua ti. Ta tiꞌi̱ ma̱ maxtyi jiꞌi̱ ma̱. Liꞌ ngusta yaꞌ Jesús lo scuaꞌ jyaca̱ msu biꞌ, ngua tsoꞌo ca scuaꞌ jyaca̱ yu liꞌ.

⁵²Loꞌo ti nchcuiꞌ Jesús loꞌo nguꞌ sti joꞌó nu laca loo, loꞌo nguꞌ nu laca cña neꞌ laa, juaꞌa̱ loꞌo nguꞌ cusuꞌ jiꞌi̱ quichi̱, lcaa nguꞌ nu ñaa chaꞌ tyaa loꞌo nguꞌ jiꞌi̱: ―¿Ha na nduꞌu cuꞌma̱ lijya̱ ma̱ loꞌo maxtyi jiꞌi̱ ma̱, loꞌo yaca jiꞌi̱ ma̱, chaꞌ quijiꞌi̱ yaca ma̱ ꞌna ñiꞌya̱ nu ntyijiꞌi̱ na jiꞌi̱ sca cuaana?

⁵³Lcaa tsa̱ loꞌo ngutiꞌi̱ naꞌ loꞌo cuꞌma̱ neꞌ laa tonu biꞌ, ni sca quiyaꞌ ná ngusacui̱ yaꞌ cuꞌma̱ ꞌna. Pana cua ngujui xi tyempo jiꞌi̱ ma̱ chaꞌ cuaꞌni ma̱ chaꞌ cuxi biꞌ juani, chaꞌ cua nda nu xñaꞌa̱ chacuayáꞌ jiꞌi̱ ma̱; la cuiꞌ nu biꞌ laca loo jiꞌi̱ ma̱.

⁵⁴Loꞌo liꞌ ngusñi nguꞌ jiꞌi̱ Jesús chaꞌ caca preso, ndyaa loꞌo nguꞌ jiꞌi̱ nde toniꞌi̱ jiꞌi̱ xuꞌna sti joꞌó. Loꞌo Pedro ni, ndyaa lcaꞌa̱ yu jiꞌi̱ nguꞌ tyijyuꞌ ti liꞌ.

⁵⁵Ca biꞌ nguxtyuꞌu nguꞌ xi quiiꞌ claꞌbe la su laja toꞌ niꞌi̱, loꞌo liꞌ ndyuꞌu tiꞌi̱ nguꞌ toꞌ lquiiꞌ biꞌ; loꞌo Pedro ndyacaꞌa̱ laja nguꞌ.

⁵⁶Liꞌ naꞌa̱ sca nu cunaꞌa̱ cuaꞌ jiꞌi̱ nguꞌ chaꞌ loꞌo Pedro ngaꞌa̱ toꞌ lquiiꞌ biꞌ. Ñaꞌa̱ tsa nu cunaꞌa̱ biꞌ jiꞌi̱ yu, liꞌ nchcuiꞌ loꞌo nguꞌ: ―Loꞌo nu quiꞌyu re ndyaꞌa̱ loꞌo nu Jesús biꞌ ―nacui̱ jiꞌi̱ nguꞌ.

⁵⁷Hora ti nguxacui̱ Pedro chaꞌ jiꞌi̱ nu cunaꞌa̱ biꞌ: ―Maꞌ cusuꞌ, ná nslo naꞌ jiꞌi̱ yu jua ―nacui̱ Pedro liꞌ.

⁵⁸Ca tiyaꞌ la xi naꞌa̱ chaca ñati̱ jiꞌi̱. ―Loꞌo nuꞌu̱ laca tyaꞌa ndyaꞌa̱ nguꞌ jua ―nacui̱ ñati̱ biꞌ jiꞌi̱ Pedro. ―Siꞌi naꞌ ―nacui̱ yu―. Ná laca naꞌ tyaꞌa ndyaꞌa̱ nguꞌ jua ―nacui̱ Pedro jiꞌi̱ nguꞌ.

⁵⁹Cua nteje tacui sca hora, liꞌ nchcuiꞌ chaca ñati̱ loꞌo tyaꞌa ndyaꞌa̱ ti yu ndacua: ―Chañi chaꞌ loꞌo nu quiꞌyu re ndyaꞌa̱ loꞌo preso jua, chaꞌ loꞌo yu re laca nguꞌ Galilea ―nacui̱ yu liꞌ.

⁶⁰―Chocue ―nacui̱ Pedro liꞌ―, ná jlo tiꞌ naꞌ ni chaꞌ nchcuiꞌ nuꞌu̱. La cuiꞌ hora nu loꞌo tya ndu̱ Pedro nchcuiꞌ, liꞌ ngusiꞌya sca ndyeꞌe.

⁶¹Liꞌ nguxtyacui loo Jesús su ndu̱ neꞌ niꞌi̱, chaꞌ ñaꞌa̱ jiꞌi̱ Pedro. Hora ti ndyiꞌu tiꞌ Pedro chaꞌ nu cua nchcuiꞌ Jesús loꞌo yu tya tsa̱ la. Ndiꞌya̱ ngua chaꞌ biꞌ: “Nu loꞌo tya lyiji xiꞌya ndyeꞌe talya juani, liꞌ sna quiyaꞌ ñacui̱ nuꞌu̱ chaꞌ ná nslo nuꞌu̱ ꞌna”, nacui̱ Jesús tya liꞌ.

⁶²Liꞌ nduꞌu Pedro nde liyaꞌ, lye tsa ndyunaa yu chaꞌ ngua xñiꞌi̱ tsa tiꞌ yu.

⁶³Loꞌo nguꞌ nu ndu̱ cua̱ jiꞌi̱ Jesús ni, nxtyí loꞌo tsa nguꞌ jiꞌi̱ Jesús, loꞌo juaꞌa̱ ngujuiꞌi̱ nguꞌ jiꞌi̱ yu.

⁶⁴Ndacu̱ꞌ nguꞌ cloo Jesús loꞌo sca lateꞌ, cuati ngujuiꞌi̱ yaꞌ nguꞌ sacaꞌ yu. Liꞌ nacui̱ nguꞌ jiꞌi̱ yu: ―Ca tii nuꞌu̱, ¿tilaca laca nu ngujuiꞌi̱ jinuꞌu̱ lacua?

⁶⁵Loꞌo juaꞌa̱ quiñaꞌa̱ la chaꞌ subaꞌ nchcuiꞌ nguꞌ biꞌ loꞌo Jesús liꞌ.

⁶⁶Loꞌo nguxee, liꞌ ndyuꞌu tiꞌi̱ nguꞌ cusuꞌ jiꞌi̱ nguꞌ judío, loꞌo nguꞌ sti joꞌó nu laca loo, loꞌo nguꞌ mstru chaꞌ joꞌó; ndyaa loꞌo nguꞌ jiꞌi̱ Jesús nde loo ñaꞌa̱ taju nguꞌ tisiya biꞌ. Ca biꞌ nguxana nguꞌ ndachaꞌ nguꞌ jiꞌi̱ yu:

⁶⁷―Cuachaꞌ clya nuꞌu̱ jiꞌi̱ ya si nuꞌu̱ laca Cristo ―nacui̱ nguꞌ jiꞌi̱ yu. Nguxacui̱ Jesús chaꞌ jiꞌi̱ nguꞌ liꞌ: ―Masi ñacui̱ naꞌ jiꞌi̱ ma̱ juaꞌa̱, ná jlya tiꞌ ma̱ ꞌna.

⁶⁸Masi xcuane naꞌ sca chaꞌ jiꞌi̱ ma̱, ná xacui̱ ma̱ chaꞌ ꞌna. Cua jlo ta̱ꞌ chaꞌ ná culaá ma̱ ꞌna.

⁶⁹Pana nde loo la tyucua naꞌ nu lijya̱a̱ chaꞌ caca naꞌ ñati̱, tyucua naꞌ nde laꞌa tsuꞌ cui̱ jiꞌi̱ ycuiꞌ Ndyosi nu lcaa tsiyaꞌ ti cña nchca jiꞌi̱ Ni.

⁷⁰Loꞌo ti nchcuane lcaa nguꞌ tonu jiꞌi̱ yu: ―¿Ha nuꞌu̱ laca Sñiꞌ ycuiꞌ Ndyosi lacua? Liꞌ xaꞌ nguxacui̱ Jesús chaꞌ jiꞌi̱ nguꞌ chaca quiyaꞌ: ―Chañi chaꞌ nu nchcuiꞌ cuꞌma̱ loꞌo nacui̱ ma̱ chaꞌ biꞌ laca naꞌ ―nacui̱ yu jiꞌi̱ nguꞌ.

⁷¹―Ngaꞌaa ntiꞌ culana na xaꞌ la ñati̱ nu jlo tiꞌ ―nacui̱ nguꞌ liꞌ―. Cua ndyuna lcaa na chaꞌ nu nchcuiꞌ yu re. Tuꞌba ycuiꞌ ca yu cua nduꞌu chaꞌ cuiñi.