Luka 22:34-71

³⁴Iesuꞌa niro, raenaꞌa, “Petero, eḡeꞌa ḡaꞌohe, ohoḡore uzeuze ḡaeꞌa ḡae uḡidu ꞌoꞌohenaꞌa, e aḡuꞌa rae reꞌuma. Eꞌe ḡaruganobuꞌu kokorokuꞌa ugaꞌuma.”

³⁵Ebu Iesuꞌa ziro, raenaꞌa, “Eḡe gau haḡaoga veize tuḡuziroteꞌe madaḡano zaꞌe moni, nihara ebu tamaka mene odohe onamiro. Eꞌe zamaḡano za idararo ga mene?” Ze naenaeninaꞌa, “Idararo.”

³⁶Ebu Iesuꞌa raenaꞌa, “Izidiꞌe vazeꞌa mene danaziꞌuma, eꞌanoꞌo monize zu niharaze odohoꞌi! Iniu iniuꞌe vesinize oꞌoꞌa roꞌidene, dabuaze seronadu venisi hoitoꞌi!

³⁷Ibite eḡe moneo peroveta vazeḡa Isaiaꞌa Buka Zaḡoḡano ꞌahige mirihiro, raenaꞌa, 'Vazeꞌa aniꞌe ḡonore azaḡa zamaḡano ꞌahoga rae reiro.' Eḡeꞌa ziꞌohe, eꞌe ḡoeꞌaꞌe hube hune fureraꞌuma. Eḡe hari ibite mirihirotaꞌaꞌe niduꞌa hudau onaeꞌohe.”

³⁸Zeḡeꞌa naenaeniro, raenaꞌa, “Zuhiꞌa Boro, emeḡe mazaoꞌe venisi ꞌaheu.” Iesuꞌa ziro. “ꞌAi ahiḡa!”

³⁹Ebu Iesu ani iḡaiḡa haḡainuteꞌe teige Olive maḡa ꞌuꞌa buau onamiro. Zu ane tahiꞌatahiꞌa ane hegotiro.

⁴⁰Iesuꞌe eꞌe habaꞌano feurirotene, ani zinaꞌa, “ꞌAha radiuꞌenaꞌa, Sataniꞌa soꞌosoꞌozine eḡe mazao fieꞌeteꞌeꞌa mene dauḡifine, kuranoꞌi!”

⁴¹Ebu Iesu ani mobade onamadu obena hina tuḡadu kuraro,

⁴²raenaꞌa, “Mama, ḡa uratoꞌidene, eḡe mazaonoꞌo bioḡa aduga ꞌadi mae vaḡinoꞌi! Rehano mene eḡe ura, ḡae ura daꞌo haḡaoꞌi!”

⁴³Ebu tuḡure vigaꞌa adureonoꞌo ane vaḡe ovadu inaraharo.

⁴⁴Ani zamaḡa ufeta aduduꞌenaꞌa, zamaḡa tiba hanadu bare kuraro. Eꞌanoꞌo irairaniro ebu irairaḡaniꞌa ru teige rahao sore buaro.

⁴⁵Iesu ani kuru hauḡadu ane tahiꞌatahiꞌa vaḡe bare onamirotene ze bazuna haniziro. Mazaḡa zeꞌe vetuḡa raroteꞌanoꞌo ahirizeꞌa taoraro.

⁴⁶Eꞌanoꞌo aniꞌa ziro, raenaꞌa, “Za nougadu baze radiuꞌohe? Iḡunoꞌi! Sataniꞌa soꞌosoꞌozadu eḡe mazao fieꞌeteꞌe mene dauḡifine, kuranoꞌi!”

⁴⁷Iesuꞌa ḡoereꞌenogano, vaze ḡuḡuvaḡaniꞌa ani vaḡe onairo. Ebu Iesu tahiꞌa 12 boꞌaḡano Iudaꞌa ibitadu furaꞌinoga veize Iesu uhiḡa onairo.

⁴⁸Rehano Iesuꞌa raenaꞌa, “Iuda, ḡaꞌe eḡe Vaze Ubuga revonoga veize furaꞌihiꞌohe?”

⁴⁹Iesu tahiꞌatahiꞌaꞌe naginiꞌa fureraꞌuma ederirotene, ze Iesu niro, raenaꞌa, “Zuhiꞌa Boro, eme vesini hina utitozinine idaḡahehe?”

⁵⁰Ebu ane tahiꞌa ꞌahoganiꞌa venisi ahase bunadu Badiꞌa dibuꞌo hauꞌeteꞌe ḡihiꞌaḡa tuḡure vazeḡa variꞌiro. ꞌOugadu edaꞌe teḡaḡa buniro.

⁵¹Rehano Iesuꞌa raenaꞌa, “Ago ꞌougoꞌi!” Ebu Iesuꞌa vaze eꞌe teḡa obonadu faine manoniro.

⁵²Iesu obonetouga veize onairoteꞌe azaḡa, Badiꞌa dibuo hauꞌeteꞌe ḡihiꞌaḡaḡihiꞌaḡa, kuru neḡa ḡianeꞌeteꞌe ḡihiꞌaḡaḡihiꞌaḡa zu vaze boroboroꞌe Iesuꞌa ziro, raenaꞌa, “Zaꞌe ḡonore vazeḡa obone tiꞌeteꞌe teige, vesini ebu somori boro madu eḡe obohe touga veize onaahehe?

⁵³Mada niduꞌa eꞌe zae teite kuru neḡano radiunu. Eꞌe zamaḡano zaꞌe mene obohe tiro. Rehano izidiꞌe zaꞌa eḡe oboheꞌeteꞌe madaḡa zu uzabo gigiꞌa madaḡa feureha.”

⁵⁴Ze Iesu obone teadu Badiꞌa dibuꞌo hauꞌeteꞌe ḡihiꞌaḡa ne tutune onamiro. Petero zu faḡanonoꞌo zeḡe ḡaruna hegotiro.

⁵⁵Vaze nu eꞌe ne ḡabiꞌa zamaḡano ire roga hofadu ehore ḡeḡemaḡiro. Petero zuni zeḡe teite ehoriro.

⁵⁶Tuḡure roḡaeḡa ꞌahoganiꞌa Peteroꞌe ire roga duhuḡano ehoreꞌenogano horoniro. Ani ḡiane runeꞌenaꞌa, ziro. “Vaze ꞌadi zuni Iesu teite radiudo!”

⁵⁷Rehano Petero ani oꞌoniro, raenaꞌa, “Roḡae, e vaze aꞌe aḡua!”

⁵⁸Mene faḡa enogano vaze ꞌahoganiꞌa horonadu niro, raenaꞌa, “Ḡa zuni Iesu gatineꞌeteꞌe vazeḡa ꞌahoga!” Rehano Peteroꞌa ninaꞌa, “Ohoze, eꞌe mene!”

⁵⁹Mada tahiḡa ḡarugano, vaze ꞌahoganiꞌa teꞌoteꞌau ḡoeriro, raenaꞌa, “Vaze ꞌadi hube hune Iesu teite radiudo, mazaḡa ani zuni Galilea vazeḡa!”

⁶⁰Rehano Peteroꞌa naenaeniro. “Ohoze! E ḡaꞌa nagini raꞌetaꞌaꞌe aḡuꞌa!” Petero ani ize ḡoereꞌeteꞌe zamaḡano, kokorokuꞌa ugaro.

⁶¹Zuhiꞌa Boroꞌa vaetadu Petero ḡianiro. ꞌOugadu Petero ani Zuhiꞌa Boroꞌa ꞌahige niroteꞌe zamariro, 'Ohoḡore uzeuze kokorokuꞌa izema uganogano, ḡaꞌa ḡae uḡidu eḡe oꞌohiꞌuma.'

⁶²Ebu ani Badiꞌa dibuꞌo hauꞌeteꞌe ḡihiꞌaḡa neonoꞌo buanadu niau rudaro.

⁶³Iesu ḡianeꞌeteꞌe azaḡaniꞌa ani ḡareḡareniro zu bouniro.

⁶⁴Ze ani ubumaḡa ꞌuadu bare ḡadiḡadiniro, raenaꞌa, “Ḡa peroveta vazeḡa ꞌahine, iniuꞌa bouꞌateꞌe vazeḡa ihofoꞌi!”

⁶⁵Ebu ḡoere sauꞌa sauꞌa hina ḡareḡareniro.

⁶⁶Irarirotene, vaze boroboroꞌa tibano nuꞌoraro. Zeꞌe Badiꞌa dibuꞌo hauꞌeteꞌe ḡihiꞌaḡaḡihiꞌaḡa zu Mose goro ḡoeꞌa ihozeꞌeteꞌe azaḡa. Zeḡe kota zamaḡano Iesu mae ohoniro.

⁶⁷Ebu zeḡeꞌa niro, raenaꞌa, “Efoꞌi! Ḡaꞌe Kerisohe?” Iesuꞌa naenaeziro, raenaꞌa, “Eḡeꞌa 'Oꞌe' rae zine, zaꞌe eḡe ḡoere mene mae ḡihiniꞌuma.

⁶⁸Ebu eḡeꞌa 'E Keriso ga?' rae ḡadizine, zaꞌe mene naenaehiꞌuma.

⁶⁹Rehano izidionoꞌo zama mone eḡe, Vaze Ubuganiꞌa Badiꞌa gigiꞌaḡa edaꞌe naeo ehoriꞌuma.”

⁷⁰Zeḡe niduꞌa ḡadiniro, raenaꞌa, “Tena ḡaꞌe Badiꞌa Ubugahehe?” Aneꞌa zinaꞌa, “Oꞌe, zaeꞌa eꞌe iniu rae ihiꞌohe.”

⁷¹Ebu zeḡeꞌa zeḡe bare neneḡaniro, raenaꞌa, “Eme Iesuꞌe veꞌoḡa rae raꞌeteꞌe vazeḡa mene vaḡiꞌuma, mazaḡa emeḡeꞌa ane hebeonoꞌo ḡoere veꞌoḡa rateꞌe hube hune egeha!”