San Lucas 22:34-71

³⁴Jesús okilwij: ―Pedro, nimitzilwia nik axan, antes de tzajtzis in kaxtil, ijkuakón tej yotikijtoj eyi buelta nik mach tinechixmati.

³⁵Ijkuakón Jesús okintlajtlanij: ―Nijkuak onamechtitlanke iwan onamechilwij amo xikitkikan itlaj bolsa, nion tomin, nion kaktle, ¿kox itlaj oamechpoloj? Yejwan okijtojkej: ―Mach itlaj.

³⁶Tonses okinmilwij: ―Pero axan, akin kipia ibolsa, ma kitki iwan noijki ma kitki imorral. Iwan akin amo kipia iespada ma kinamaka itzotzol iwan ma kimokowi se iespada.

³⁷Porke namechilwia nik kipia de mochiwas notech yin tlan kijta in tiotlajkuilole: “Okitakej kej yeskia se tlakatl mach kuale.” Porke nochi tlan kajki ijkuilitok de Nej, kipia nik mochiwas.

³⁸Ijkuakón yejwan okijtojkej: ―Señor, nian katej ome espadajtin. Jesús okinmilwij: ―Ya kuale kajki, ayakmo itlaj xikijtokan.

³⁹Satepan Jesús okiske. Ijkón ken Yej okimatia okichiwaya, oyáj ipan Olivostepetl. Imomachtijkawan noijki oyajkej ikuitlapan.

⁴⁰Nijkuak Jesús ompa oajsito, okinmilwij: ―Ximotiotzajtzilikan, para amo amopan ma wiki in Amo Kuale Tlakatl.

⁴¹Jesús omijkuanij de innawak iwan oyáj ik se lado wejkatzin ken nijkuak se kitlamotla se tetl de wejka, ompa omotlankuaketzke iwan omotiotzajtzilij.

⁴²Okijtoj: ―Papan, tla tejwatzin tikmonekiltia, xinechmakixti de itech yin tlajyowilistle. Pero amo ma mochiwa ken Nej nikneki, sino ken tejwatzin tikmonekiltia.

⁴³Ijkuakón okimonextilij se ángel de ilwikak para kimakas chikawalistle.

⁴⁴Iwan nijkuak omoyolkokojtoka sa tekitl, omotiotzajtziliaya okachi. Wejweyi itonil ochipinia ipan tlale kej estle.

⁴⁵Nijkuak otlanke omotiotzajtzilij, omoketzke iwan oyáj kan oyekaj imomachtijkawan, iwan okinmajsitajsik kochtokej, porke in sotlawalistle iwan neyolkokole okinkochpachoj.

⁴⁶Jesús okinmilwij: ―¿Tlanik ankochij? Ximewakan, iwan ximotiotzajtzilikan para amo amopan ma wiki in Amo Kuale Tlakatl.

⁴⁷Jesús ok otlapojtoka, iwan ijkuakón oejkokej miekej tlakaj. Katlej itoka Judas, katlej oyeka se de yen majtlaktle iwan omen imomachtijkawan Jesús, okualinyekanaya. Omijkuanij inawak Jesús iwan okixpipitzoj.

⁴⁸Ijkuakón Jesús okilwij: ―Judas, ¿ijkín tinechixpipitzoa para tinechtemaktia (techtemaktilia) Nej katlej onimochij nitlakatl?

⁴⁹Katlej oyekaj iwan Jesús, nijkuak okitakej tlan pewa tlapanoa, okitlajtlanijkej: ―Señor, ¿tikneki ma tikmomagakan inwan ika espada?

⁵⁰Iwan se de yejwan okinakastzontekke se tlakatl itekipanoj in tlayekanke tiopixke, okitzontekilij iyeknakas.

⁵¹Pero Jesús okijtoj: ―Xikinkawakan. Ya kuale kajki. Ijkuakón Jesús okitzkilij inakas in yon tlakatl iwan opajtik.

⁵²Jesús okinmilwij in tlayekankej tiopixkej, in tlayekankej de tiopan iwan tlayekankej tetajtzitzintin, katlej owalajkej okikitzkikoj: ―¿Anwalajkej annechkitzkikoj ika espada iwan ika kuawitl kej yeskia niichtekke?

⁵³Nochipa onieka amowan itech weyi tiopan, iwan mach annechkitzkijkej. Pero itech yin ora Dios amechkawilia xikchiwakan tlan amejwan ankinekij, iwan tlan kineki in Amo Kuale Tlakatl katlej tlanawatia ijtik tlatleyualotl.

⁵⁴Iwan ijkuakón okitzkijkej in Jesús, iwan okiwikakej ichan tlayekanke tiopixke. Pedro san wejka okonitiaya.

⁵⁵Ompa tlatlajko patio, in tlakaj okitlalijkej se tlikuile, iwan omotlalijkej okiyawalojkej. Pedro noijki omotlalij intzalko.

⁵⁶Satepan se tlapalewijkasiwatl, nijkuak okitak in Pedro ewatok iyakapan tlikuile, okitlatak kuale iwan okijtoj: ―Yin tlakatl noijki onemia iwan Jesús.

⁵⁷Pero in Pedro mach okimokuitij, iwan okijtoj: ―Siwatl, nej mach nikixmati.

⁵⁸Achitzin satepan, oksé tlakatl okitak iwan okilwij: ―Tej noijki se de yejwan. Pero in Pedro okijtoj: ―Amo, nej mach inwan nipowi.

⁵⁹Kej se ora satepan, oksé okiyekijtoj: ―Ipan melajka, yin tlakatl onemia iwan Jesús, porke yin noijki de estado de Galilea.

⁶⁰Ijkuakón Pedro okijtoj: ―Tlakatl, mach nikmati tlan tikijta. Iwan san niman ijkuakón, nijkuak in Pedro ok otlapojtoka, otzajtzik in kaxtil.

⁶¹Ijkuakón in Señor omokuepke iwan okitlatak in Pedro, iwan Pedro okelnamikke tlan Señor okilwijka: “Axan, antes de tzajtzis in kaxtil, ijkuakón tej yotikijtoj eyi buelta nik mach tinechixmati.”

⁶²Iwan ijkuakón Pedro okiske iwan ochokak sa tekitl.

⁶³In tlakaj katlej okipixtokaj in Jesús, okipinawiayaj iwan okiwitekiaj.

⁶⁴Okixilpiayaj iwan okixwijwitekiaj, iwan okilwiayaj: ―¡Tla xitlajto (xikadibinaro), akin omitzmaak!

⁶⁵Iwan san tlan amo okilwiayaj para ika okipijpinatijkej.

⁶⁶Nijkuak otlaneske, omololojkej in tlayekankej tetajtzitzintin judiojtin, in tlayekankej tiopixkej, iwan tlamachtijkej de itlanawatil in Moisés, iwan okiwikakej in Jesús kan tlaixkomakaj (tlatzonmanaj) in judiojtin. Ompa okitlajtlanijkej:

⁶⁷―Xitechilwi, ¿kox tej in tiCristo? Yej okinnankilij: ―Tla namechilwis nik yen Nej, namejwan mach annechneltokiliskej.

⁶⁸Iwan tla itlaj namechtlajtlanis, mach annechnankiliskej, iwan nion mach annechkajkawaskej.

⁶⁹Iwan desde axan Nej katlej onimochij nitlakatl niewatos ik iyekma in toTajtzin Dios katlej kipia nochi poder.

⁷⁰Ijkuakón nochtin okitlajtlanijkej: ―¿Tonses kijtosneki tej titeKone de Dios? Jesús okinnankilij: ―Aján, yen Nej. Ijkón ken namejwan ya ankijtojkej.

⁷¹Tonses yejwan okijtojkej: ―Mach ok moneki ok akaj ma kistlakawi. Yotikkakej tlan Yej inewian yokimokuitij.