Odoca 22:34-71

³⁴Ante apæ̈necä ëñëninque Itota angantapa. —Pegodo, bitö ïmite ämo ëñëe. Tawadiya ñöwoönæ ayæ̈ pedämaï ïñonte bitö botö ïmotedö apæ̈nedinque, Dicæ abogaa, ante mempoga go adopoque anguïmi ïmipa, ante Itota apæ̈negacäimpa.

³⁵Ayæ̈ wæætë tömënäni ïnänite, —Botö wëënëñedë mïnitö ïmïnite da godöninque, Godonte æ̈inta da wente ænguincadedë æ̈nämaï inte goedäni, antabopa. Mäincoo da wente ænguï næ̈æ̈nämaï inte awæncata næ̈æ̈nämaï inte goedäni, ante botö da godömo godinque mïnitö ænguënëmïni inte wæmïnitawo. Äñongante, —Ænguënente wædämaï intamönipa, änänitapa.

³⁶Itota wæætë tömënäni ïnänite, —Ñöwo ïñömö æcänö godonte æ̈inta da wente ænguincade mäna tömengä mänincade næ̈ænte gocæcäimpa. Ayæ̈ mäincoo da wente ænguï adobaï næ̈ænte gocæcäimpa. Ayæ̈ yaëmë mänämaï ingä inte weocoo yacoo në mäningä wacä ingante godonte æ̈ninque wæætë yaëmë godonte æncæcäimpa.

³⁷Ïïmaï ante dodäni näni yewæ̈mongaïnö baï botö ïmote cæcædänimpa. “Në ëñënämaï näni cæcabo ïñönänite tömengä adocä ïnongä ingampa, ante änänitapa,” ante yewæ̈mongatimpa. Mänömaï impa, ante pönëninque botö ïïmaï ämopa. Botö ïmote æbänö cæquïnänii, ante näni yewæ̈mongaïnö baï botö ïmote tömänö ïinque cæquïnö anguënë. Botö ïmote ante näni yewæ̈mongaïnö baï cædinque ñöwo ïñömö edæ eyepæ̈ ba aedäni.

³⁸Ante apæ̈neyongante tömënäni, —Awënë, yaëmë mëa mæ̈ ongö ae. Änänitapa. Tömengä wæætë, —Idæwaa, angacäimpa.

³⁹Ïinque apæ̈nedinque Itota wadæ godinque cöwë nänö æidö baï æidinque Odibowænquidi go æiyongante tömengä mïñæ̈ në godäni tee empo æigadänimpa.

⁴⁰Æi cöwë nänö æi ongöñömo pöninque tömënäni ïnänite, —Mïnitö ñöwo Wængonguï ingante nämä beyænque apæ̈nedinque, Mönitö wïï wënæ wënæ cæïnëmöni bacæmönimpa, ante apæ̈needäni.

⁴¹Äninque Itota wadæ godinque dica mönö wido cæganca mäninganca godinque da guicapodinque Wængonguï ingante apæ̈necantapa.

⁴²Apæ̈nedinque, “Mæmpo ëñëmi. Bitö Ao äninque edæ tï nä wænguïmæ̈ baï ö ænte baï cædinque botö ïmote edæ, Wæ̈nämaï incæbiimpa, ämi ïninque botö edæ waa tobaïmopa. Incæte botö änönö baï wïï cædinque wæætë tömëmi änönö baï cæe, ämopa.”

⁴³Ante apæ̈neyongä Wængonguï öönædë nänö da pönöningä anquedo Itota weca ponte a ongöninque, Tæ̈ï pïñænte entawencæbiimpa, ante cædinque pönö töö æ̈mænte baï cæcantapa.

⁴⁴Incæte Itota ïñömö edæ nanguï wæwente badinque Wængonguï ingante ancaa apæ̈necä ïninque edæ tömengä owæ̈mæ̈ wepæ̈ gowete baï tadinque onguipoiya petæ̈ petæ̈ wææntapa.

⁴⁵Ayæ̈ ïinque apæ̈nedinque tömengä ængæ̈ gantite godinque tömengä mïñæ̈ në pönïnäni weca ponte ayongä tömënäni nanguï wæwente wædinque mö ñönäni.

⁴⁶Adinque edæ tömengä tömënäni ïnänite, —Ïñæmpa möwo mömïnii. Edæ ængæ̈ gantidinque, Wënæ wënæ cæïnente badämaï incæmönimpa, ante Wængonguï ingante apæ̈needäni, angacäimpa.

⁴⁷Ante tæcæ apæ̈neyongä nanguï ïnäni ïñontobæ̈ ponte a ongönänitapa. Itota mïñæ̈ näni, Dote, ante gocabo ïningä incæ Codaa ïñömö täno beyænte pöninque Itota ingante waa cæte baï queë bemoncæte ante pongä.

⁴⁸Adinque Itota tömengä ingante, —Codaa ïñæmpa, botö Waobo ëñagaïmo ïñömote bitö, Ïingä ingampa, ante queë bemöninque odömonte pædæ godömi ænguïnänii, angantapa.

⁴⁹Mänömaï cæcæ cædänipa, ante adinque tömengä mïñæ̈ në godäni guiquënë, —Awënë, yaëmenca godö tao cæquïmöni ämii, änänitapa.

⁵⁰Wængonguï quï, ante në godongä ñæ̈nængä pönï ïnongä ingante në cæcä ïñömö mänïñömö ponte a ongongä adinque Itota mïñæ̈ në pöningä adocanque wæætë yaëmë æ̈ninque mäningä önömonca tömëmonca ïnö wangö tamoncacä wæcantapa.

⁵¹Adinque Itota wæætë, —Idæwaa, äninque gampo cæmoncacä waa bamoncagacäimpa.

⁵²Ayæ̈, Wængonguï quï, ante në godönäni ñæ̈næ̈näni incæ Wængonguï oncö ñæ̈næncö ante në wææ wänönäni incæ në aadäni näni Picæncabo incæ tömengä ingante æncæte ante në pönïnäni ïñönänite Itota tömënäni ïnänite, Botö mïñæ̈ në godäni tönö botö dicæ awënë ingante wido cæcæte ante cæbogaa. Incæte mïnitö, Në wido cæcä ingampa, ante baï cæmïni awædö. Edæ canta teëmenca mïni badöinca tönö yaëmë næ̈ænte botö weca pömïnii.

⁵³Ïñæmpa botö æpogadö Wængonguï oncö ñæ̈næncönë ïïmö ïñö ïïmö ïñö yabæcönë go guiidinque mïnitö weca a ongöñömote mïnitö wæætë bæi ongoncæte ante pædæ gopodämaï ïmïnitapa. Edæ ñöwo wëmö mæ̈ mämonte baï ïñonte edæ mïni në wënæ wënæ cæyedë impa, ante apæ̈negacäimpa töö.

⁵⁴Ïninque Itota ingante bæi ongonte ænte mäo, Wængonguï quï, ante në godongä ñæ̈nængä pönï ïnongä weca ænte godänitapa. Gobæ godäni ïninque Pegodo ïñömö ayæ̈ ayæ̈ gocantapa.

⁵⁵Ñæ̈næ̈ oncö yacömoyæ̈ ïñömö wææ wänönäni gonga tänonte godämæ̈ pö tæ̈ contadäni adinque Pegodo tömënäni weca pö tæ̈ contacä.

⁵⁶Adinque në cæcä onquiyængä tömengä gongapamö ongongä adinque tömengä ingante cöwä adinque, —Ïingä adobaï mäningä mïñæ̈ tee empo gocä ingantapa.

⁵⁷Äñongante Pegodo, —Onquiyæ̈mi ëñëmi. Botö mäningä ingante dicæ abogaa, angantapa.

⁵⁸Ayæ̈ wantæ ate wacä pöninque Pegodo ingante waa adinque, —Bitö adobaï tömengä mïñæ̈ në gobi ïmitapa töö. Ante apæ̈necä ëñëninque, —Onguïñæ̈mi ëñëmi. Botö dicæ tömengä mïñæ̈ gobogaa. Edæ wabo ïmopa.

⁵⁹Ayæ̈ wacä adobaï wantæ wantæ adoque ooda go ate äninque, Ïingä ïñömö Itota mïñæ̈ në godingä ingampa. Näwangä impa. Gadideabæ quëwëningä inte edæ pongä aedäni.

⁶⁰Angä ëñëninque Pegodo, —Onguïñæ̈mi, quïëmë baï apæ̈nebipa, ante botö ëñënämaï ïmopa. Ante tæcæ mënea äñongante tawadiya ïñontobæ̈ aa aa pecantapa.

⁶¹Itota incæ tömengä gämæ̈nö dadi ëmænte pömö acä adinque Pegodo ïñontobæ̈, Æ, äninque, “Tawadiya ñöwoönæ pedämaï ïñonte bitö botö ïmotedö ante wadö ate apæ̈nedinque, Dicæ abogaa, ante tededinque mempoga go adopoque anguïmi ïmipa,” ante Itota wëënëñedë apæ̈necä ëñentabopa.

⁶²Ñöwo nänö pequinque do pecampa, ante pönente wædinque Pegodo oncodo tao godinque Ca ca wægacäimpa.

⁶³Itota ingante në wææ wänönäni ïñömö tömengä ingante mänïñedë badete todinque edæ tæi tæi pänänitapa.

⁶⁴Ayæ̈ tömengä awinca wïni cæmöninque tömënäni, —Æcänö bitö ïmite tæi tæi pänaa, ante Wængonguï apæ̈necä ëñente ate apæ̈nebi ëñëmönie.

⁶⁵Ante badete todinque quïëmë baï ante godö babæ änewënänitapa.

⁶⁶Ñäö bayedë, Wængonguï quï, ante në godönäni ñæ̈næ̈näni tönö në odömönäni ïñömö idægoidi ïnänite në aadäni näni Picæncabo ïnönäni inte edæ godongämæ̈ go bee tëninque tömënäni näni apænte anguimpaa gäänë ongöñönäni Itota ingante tömënäni weca töö æ̈mænte ænte mäo gönönäni gongængantapa.

⁶⁷Tömengä ingante në apænte änäni ïñömö, —Apæ̈nebi ëñëmönie, äninque, Bitö mönitö Codito ïnömi ïmitawoo. Äñönänite Itota wæætë, —Botö apæ̈nebo ïninque mïnitö wæætë ëñënämaï ïmaïmïnipa.

⁶⁸Ayæ̈ wæætë botö ëñencæte ante ämo ïninque mïnitö wæætë botö ïmote apæ̈nedämaï ïmaïmïnipa.

⁶⁹Incæte ämo ëñëedäni. Botö ïñömö në Waobo ëñagaïmo inte ïincayæ̈ ate Wængonguï në tæ̈ï Pïñængä tömëmæ̈ ïnö tæ̈ contate ongoncæboimpa.

⁷⁰Ante apæ̈necä ëñëninque tömänäni, —Ïñæmpa, bitö Wængonguï Wëmi ïmitawoo. Äñönänite, —Botö mänïmodö ïmopa. Tömëmïni edæ mänömaï äninque edæ nö apæ̈nemïnipa.

⁷¹Ante apæ̈necä ëñëninque, —Idæwaa. Tömengä nämä incæ edæ, Wængonguï Wëmo ïmopa, ante wënæ wënæ apæ̈necä do ëñentamompa. Ïninque mönö ñöwo edæ, Wadäni, Itota wënæ wënæ cæcampa, ante apæ̈necædänimpa, ante quïnante godömenque diqui diqui minguïï, ante wægadänimpa.