Irocashi 22:34-71

³⁴Icanqueriquea Jesoshi: —Peerero, noncanquempiquea, coajica tequeratagueti irinijeji chaapa, pomanacoquenaquea 3.

³⁵Ariquea icantiriquea Jesoshi itsatacaanejia: —Oraqueate notigarancajiaquempigueti pitsavetantajiaquitigueti, nocantajiavaquempiquea: ‘Aatoquea paajiguitsi pitsaratote, aisa pitetantarica pimentaquitsite, aisa aatoquea paajiguitsi itsipapae pigaviguitire.’ Piquejetacagueti, ¿choocampate picoguitejacoqueca? Iriatimpajia icantiriquea: —Tee onchoocateji.

³⁶Ariquea icantiriquea: —Cotanquitsiquea imaica choocagueti pitsaratote paanaqueroja, aisa pitetantarica pimentaquitsite. Aatogueti ochoocati pitsaampitsantsamenirite pojocantanaqueroja piitsaare jenoquitica paantanaquemparoja pitsaampitsantsamenirite.

³⁷Noncantajiaquempiquea irinetsanamajajiqueroquea ocanqueca Itioncacaantaqueca Aapani Irioshi cantacotsitaquenaca: ‘Intsipatacaantajiquempariquea covaeguishejigaroca covaeguisherentsi.’ Maasanopae itioncacotsijitaquena onetsanamajatanaquempaquea.

³⁸Icantiriquea iriatimpajia: —Jero, Nomajirote, mavite tsaampitsantsameniri. Icanque iriatimpa: —Ariotapojaque.

³⁹Iroompaquea yoanajiquea Jesoshi Orivotsempiqui, aritarite yoapinique oraniqui. Iriraquea itsatacaanejia yoguijaguijaitanaqueriquea.

⁴⁰Ariquea yarejerejeipojaca icantiriquea: —Pamanacoventajiguempa aatonijite picovaeguishejigatsi.

⁴¹Iroompaquea yoanaquequea tiijacoñajiquea ontaniqui yoguerotanaca yamananaqueriquea Iriri icanqueriquea:

⁴²“Aapani, pininquegueti paapitsatenarojate nantsipequempaca, cotanquitsiquea aatoquea iroguenti netsanatatsi nonintica naatimpa, iroguentiquea netsanatananquitsine pininqueca aviatimpa.”

⁴³Iroompaquea icoraquetashiqueriquea irashivantite Aapani Irioshi, iquenapojaque inquitequi itampishitacaapojaqueri.

⁴⁴Yamenacotavacagueti yatsipemajatanaca, arimpaqueate yamanacoventanacaquea, imasavivaetanaque quempeni irajantsi, ochochorojanaque inirojapae isavi quepatsiqui.

⁴⁵Ariquea iteroncanajatiguiro yamanacovencagueti icatianajaqueate yoanaji itajencashijiapojiri itsatacaanejia, yamenajiapojiriquea maajiaque, omagotacaanaqueritari ishimampojancare.

⁴⁶Icantiriquea: —¿Taate pimaantajiacaca? Pintinajajianaque pamanacoventajiguempaquea aatonijite aapojimpitsi covaeguishetacaanaquempineca.

⁴⁷Iroompaquea quenquetsatatsitiraja Jesoshi icoraquecoraqueipojaque caquintejia isaquiriaventajiapojacari. Iriraquea itsatacaane pajitatsica Jorashi ijivatapojiri. Yojocavaetapojaca quempeji irinintavorotashipojempari Jesoshi.

⁴⁸Ariquea Jesoshi icantavaqueri: —Jorashi, ¿irootaquempa picoraquetantacaca paacaanqueri Irijanite Caquinte, pinintavorotantamampeacarica?

⁴⁹Irirajia itsatacaanejia yamenajiavaquerigueti maasanojia coraquetashijiaquerica icantiriquea: —Nomajirote, ¿arite nompejianaquempiquea noncarajiavaqueri?

⁵⁰Aparo itsatacaane icaratavaqueri yashintacaca saserorote anaantamajatanquitsica, iguempitarejitsitari iguempita itincamijempequiquitica.

⁵¹Cotanquitsiquea Jesoshi icanque: —Ariotaquetsija icocani. Ipamitsitajariquea iguempitaqui, jac peamajatanaja.

⁵²Ariquea Jesoshi iquenquetsatacaajiaqueri saserorotejia anaantajianquitsica, imajirojiate igoaretatepae quempoguijajiguiroca teemporo, aisa jivajiatsica, maasanojia coraquetashijiaquerica aajiaquerineca, icantiriquea: —¿Arimpate naroguenti catsimari aapitsatantatsica pamashitantajiaquenaca pitsaampitsantsamenirite aisa inchaquiji?

⁵³Oraquea noconoajiguimpigueti nocantacoguitaniquea oraniqui teemporoqui teequea querocaquea pincotimajiguenaji, cotanquitsiquea imaica manatarite aapojaca pagavejantajiaquenaca, iroguentitari iragavejantantaquempaca imajirote pitsecacojiatsica, jero piquejetantajiacaroca imaica.

⁵⁴Ariquea yajiricajiaqueri Jesoshi, yaanaqueriquea itsovironaquitequi saserorote anaantamajatanquitsica. Iriraquea Peerero yoguijatacovetanacari cotanquitsiquea impoivaetapojaque.

⁵⁵Ariquea oraniqui itsitacajiaque paamari niganqui pampatejijaniquiqui itsovironaquitequi, savisaviitaque itajiaque yanquitacojiacaroquea. Iriraquea Peerero iconoajiapojacari isavicapoji.

⁵⁶Iroompaquea amenaqueriquea aparo yashintajitaca itaquegueti, amenitsitanacariquea sorerere ocanque: —Iricatica aisa itsipatacari Jesoshi.

⁵⁷Cotanquitsiquea yomanacotsitanaca Peerero, icanque: —Manquigarentsi, teenicate nontsateriji.

⁵⁸Iroompaquea incajaranquiguitetanaquitigui itsipaquea amenaqueri icanqueri: —Avirotari aisa itsatacaane Jesoshi. Icantsitajaquea aisa Peerero: —¡Teeshinete!

⁵⁹Iroompaquea incajaranquiguitevaetanaquegueti arimpaquea icantanaque itsipa: —Arimajaca itsipatacari, iriguentitarite Garireaquitica.

⁶⁰Iriraquea Peerero icanque: —Tee nontsatsitempiro picantacotaqueca. Iroompaquea icantanaquitigui Peerero inijanaquequea chaapa.

⁶¹Ipitsoquitsitanaca Amajirote yamenaquitiri Peerero, ariquea icotanaca iriatimpa iquenquejitanacaroquea icantaquerica Jesoshi incajaranquitica icanqueriquea: “Coajica tequeratagueti irinijeji chaapa pomanacoquenaquea 3.”

⁶²Icatiitsitapanajantaquea isotoapanajanti, iraitsitanacaquea ishimampojancamajatanaca.

⁶³Iroompaquea maasano coaretajia quempoguijajiaquerica Jesoshi ishiroshirontimentavaecari, icapocapovaetaqueri, oshequi.

⁶⁴Iponaajiaqueriquea icapoitari icantajiavaqueri: —Iintsijate pintsatavaqueja taaquea capojaquempi.

⁶⁵Iquenquetsaguisheventajiaqueri.

⁶⁶Iroompaquea osavincaguitetanaquegueti icapiocajiaca jivajiguirica joriojia, saserorotejia anaantajianquitsica aisa tsatacaantajiguiroca itioncacotanaqueca Moishishini, maasano. Iroompaquea icajemacaanqueriquea Jesoshi icoacojiaqueriquea.

⁶⁷Icantiriquea: —Iintsija pincamanquena, ¿arimajaca aviguentica Quirishitotatsica? Icantiriquea iriatimpa: —Arigueti noncantavequempi: ‘Jeejeguitatsi’, aatotarite piquemisantajianatsi.

⁶⁸Ariquea noncoacojiavetempigueti, aatoquea picantajigui aviatimpajia.

⁶⁹Cotanquitsiquea imaica iriraquea Irijanite Caquinte irisavicaquequea itincamijempequiqui Aapani Irioshi Agavejamajatatsica, incoguitempani.

⁷⁰Icantajiaqueriquea maasano: —Arisacanica ¿aviguentimpa Irijanite Aapani Irioshi? Icanque Jesoshi: —Naroguitatsi, aviguenti cantaqueroca.

⁷¹Ariquea icantajianaque iriatimpajia: —Iroosacanica, imaica ¿arimpate ancajemacaanque itsipapae incamancajiquea querocaca icocani iricatica? Jac imaicaquea aquemajiaqueriqueate icantaquegueti iriatimpa.