Luka 22:34-71

³⁴Ana na Yesu berkanio, berinavo “Pitere, kiniou neber telerinio ka jau, ka bogiano nei ga, mia tormano tokoko-reko re vo, mia jau kavarbonbonua kiniou ve varolu, koverinavo jau maka kejikia kiniou leleio.”

³⁵Ana na Yesu bika denlo, naio berinavo “Kamiu kuvisidomii von nanua, ka bogo nam̃a nemiila kamiu kubano m̃a kubioliolu janea vio nalo. Kiniou neber ka kamiu ka mia kuvar re kenemiu saba nalo tealo vija kamiu, jibe ka siveu na veru, p̃eli na basaro, p̃eli na kulubue dolu na jaamiu, p̃eli na vite nalo na jibe na. ?Mia jum̃abe, kamiu kumial ka jumemiu bulati ka vite nalo tai?” Naruei nalo aberdop̃e aberinavo “Tubo, maka jumememi ve bulati ka titai.”

³⁶Ana na Yesu ber kalo berinavo “Nao, naina naruei. Mia vonganei, kito rojua bogo dolu tenia nei. Vonganei, verenio nana be kiano siveu na veru, p̃eli na kiano basaro, mia monoka naio rivar vija naio rivano. Toro na ver maka kiano iobogu na mira tai, bo ka naio riṽiliṽililar kanio m̃ano saluvoiano, mia naio rivar veru nene rivan rivulu ka kiano iobogu na mira tai.

³⁷Kiniou neber naio nei ka kamiu, bior vivitauiano lu nalo re nua nam̃a aberii kiniou, ajum̃a amalmaluvo abe riano naruei, ban bokar iliano nam̃a Aisea naio berenio, napano berinavo ‘Amila ka naio jibe ka naio bunu be toro va tai na lakokoroviano na tuboiano.’ ”

³⁸Mia naiagagoano nalo ajum̃a ajidomii ga iliano na iobogu na mira nei, naruei nalo aberinavo “Tubo, kejiio, ninei be kiado iobogu na mira juo nei.” Mia Yesu mial ka napano maka ajikia dulu kiano iliano nei, ana na naio berinavo “E abe, roberii vite na bare naruei.”

³⁹Mia Yesu nalo ajuvan vio nei mave, mia jibe ka napano naio jom̃a milaio, naio miel bavin bokar Suku na Buruolivi Nalo, naio naliko kiano naiagagoano nalo.

⁴⁰Mia bogo napano aba aboru ea vio napano Yesu jo ban eaio, amijilimebi eaio, naruei naio ber kalo berinavo “Kamiu monoka kubolkouo tulaka ka mia jukuano nalo ala re kamiu kuvijoru.”

⁴¹Naio ber jibe na kalo, bisi ana na naio juvanlo, ba lie denlo telisu ga, naruei minie ka sudu jaano ana bolkouo ban Atua.

⁴²Naio bolkouo jibe nei, berenio “Aiou Teta o-o, ver jau komijikia kala mia rivu ga, jau kodular baja na jogvaiano nei kanaku, ka nomunu re. Mia jau kala re kanaku sidomiano, mia kala ga kiamo.”

⁴³Ana ka bogo nei Yesu mijog temiano toru ea naio, naruei amial nailiano tai jaluvo ea vio mave binimei yetano, binimei miija Yesu ka naio ve p̃irinio sikili bereio.

⁴⁴Mia Yesu jo mijog bova toru, jiniomo de sano titi, mia bolkouo jikili lie vo banbano-o mia sano minonoano nalo aju abadigdig jibe ka burukija bavatove ea borotano.

⁴⁵Mia bogo na naio bolkouo bisi, ana na jumolu bereio, ban bereio ea naiagagoano nalo, mia mial tinieiiano na monmeliano muelo ruei, aju amonmelio ga.

⁴⁶Naruei mila bovonlo, berinavo “Ai, jum̃abe ana na kamiu kumitu kumonmelio? Bo kanio kuvitumolu kuvila tibe ka na kiniou naber ka kamiu ruei. Monoka kubolkouo ka mia jukujukuano nalo amei re ka ala kuvijoru.”

⁴⁷Mia bogo na Yesu jom̃a mil banlo kia ga vo, amial burum̃ara taara na tomu nalo amiyoyotuba kalo, amial ka napano toro tai jukamu kalo abinimei vaataro, nina naio napano beamu, naio be nalo tai, be Jutas. Ana na Jutas binimei vaataro ka Yesu, bokario ana miomiom babibiniono.

⁴⁸Mia Yesu mil jukamu banio, berinavo “Jutas, ka vai na koniom kukulnioku jibe na mia naio bo ga, mia ka vaio ana jau kojidom kovulvulu ka kiniou Kulorinio Kenerinio ea m̃arabo na jibe na?”

⁴⁹Mia bogo na nalo na Yesu kiano napano ajikil aju vaataro ka naio abitilubar venia nei Jutas nalo ajidom alaio, abika den Yesu, aberinavo “?Tubo, jum̃abe, mia kito retelo ka kiado iobogu na mira?”

⁵⁰Mia Yesu naio maka riverdop̃elo vo mia naiagagoano nalo tai naio jumolu, burular kiano iobogu na mira, miven ea nalo tai, napano naio be toro tai na parinio toro lu kanano, mia naio jetitire ea ga meriniano ana jelar tiliniene vameruo.

⁵¹Mia Yesu mil banio, berinavo “!Ee, to to to! Kito rola re bunu tibe na kalo.” Ana na naio mijiou jokol jeleig burutiliniene toro nei, mia mila vatitigio bereio bo.

⁵²Naruei naio bitikar tomu na tortoru na kulo lu nalo naliko tomu na tortoru na menumia nalo na Atua kiano yimo, bija navurim̃araboiano na kulo Ju nalo kialo, napano abinimei ka naio, naio mil banlo berinavo “?Jum̃abe ana na kubar iobogu bija kenemiu nia nalo jibe na? ?P̃eli kumitu kumisidom kuberiam̃a kiniou nebe toro na p̃irinio jikili ka m̃a bina p̃eli nam̃a muemue toro?

⁵³Nanua, legiano telabo ga, kiniou nojo bija kamiu ea Yimo Lu banbano-o, mia bior vaio ana maka kumei vaataro ka kiniou ka kuvokar kiniou ea bogo nalo na ruei? Mia nemial jibe ka kamiu kube tomu na melijokouo, napano kubinimei bija moroano dolu nalo na melijokouo, a vonganei be kenemiu aura memedu.” Mo abinimei abokar Yesu, aburio bano.

⁵⁴Bogo na abokar Yesu, aburio ban bereio naliko, abano aba jouro ea burusio na parinio toro lu kanano. Mia Pitere bunu jom̃a jakisosor vavanlo ga ka bogo nei, naio maka riva vaataro keanlo.

⁵⁵Mia bogo na abinimei jouro ea burusio nei, tealo aba ajovokar sebi bilvili ka atuṽalo eaio, mia Pitere bunu ba jotano naliko.

⁵⁶Naruei aju ana jegliiano na sebi mereralii Pitere mirano, ana na niatira tai nam̃a mim̃au napano jo bijalo, naio bitilubario, ana berenio “!Ai, kamiu kuvialio! Kema na, naio bunu be nalo tai nam̃a bogo nonovio ajakisosor tete na.”

⁵⁷Mia Pitere barbonbonua, berinavo “!Ee maka! Kuvivinieku!, kiniou neber vatitig kaso, maka nejikia kema na!”

⁵⁸Karina maka vesiou ga, nalo tai mial Pitere, bitilubario, ber “Ai, jau bunu, kobe nalo tai na.” Mia Pitere berdop̃e berinavo “Ai kema, abe makanio.”

⁵⁹Mo aju jibe na bano-o, na aura takurano barlaka bereio, dolu binimei berial bereio, ber m̃elea banlo, berinavo “Kiniou neber vatitig ka kamiu, kema na, naio naliko tete re Kalele na jukamu ruei. !Kuvial, naio bunu be toro Kalele memedu ga ruei!”

⁶⁰Mia Pitere berdop̃e mila sibi bereio berinavo “Kema, abe kiniou maka nejikia tena m̃a kojom̃a koberenio na koig.” Ana monloglog bogo nam̃a Pitere jom̃a ber iliano nei kia ga vo, tu jokokoreko.

⁶¹Mia bogo na tu jokokoreko, ana Tubo p̃ilig parinio binimei, bitikar Pitere, naio bitii kilkil eaio. Naruei Pitere jidomial bereio Tubo kiano iliano nanua berial kanio nua ruei, napano berenio berinavo “Riano kiniou neber kaso, ka bogiano na legiano nene ga, bogo na tu tokokoreko re vo, mia jau kavarbonbonua kiniou ve varolu ruei, kover jau maka kejikia kiniou.”

⁶²Mia Pitere naio mijog kirivova toru laka, naio batavio, jegi-i o-o mia jegi.

⁶³Mo nalo napano ajum̃a abokakar Yesu ea bogo na, amila kikii naio, a amil vulevulei eaio, ajukukikio,

⁶⁴ban amiorko mirano ka mia naio rijikia re rial vite, mia bogo nam̃a ajum̃a amijuba biliviligio, amiyotel eaio abika denio aberinavo “Ei, aber jau kobe naverialiano tai, bo ga, jau kabagbag von ka kenia na jom̃a mijubaso vonga na.”

⁶⁵Mia amila jibe na ka banbano-o, amil niegeniege toru laka.

⁶⁶Aju jibe na banbano-o m̃erenio bavin garuei, ana na navurim̃ara-boiano na kulo Ju nalo, jibe ka kulo lu na tortoru nalo bija naverloglogiano na tuboiano nalo, abinimei vio takurano ea kialo komeli na toru neibano. Bogo na abinimei vio takurano bisi, ana na aburu Yesu ba jikili ju jukamu ea miralo.

⁶⁷Naruei amil banio abika denio aberinavo “Verenio jau kobe Naverikariano be riano, nam̃a kulo Ju nalo ajum̃a amial aber mia monoka rimei, mo, numisidom ka jau koverial ka kumemi vonganei.” Mia Yesu berdop̃e banlo, berinavo “Kiniou nemijikia neverial ka kamiu, mia ver neverenio, mia p̃eli kuvisaaro re ka kumonmoneaio.

⁶⁸Mia kiniou nejidom ka nevika vite tai den kamiu bunu, mia ver nevikanio, p̃eli mia kamiu kuverdop̃e kulu re ga na.

⁶⁹Mia be titai nana kiniou najaaro ka nejidom never ka kamiu naio ber jibe nei, ber ‘Jikar vonganei, mia tibe ka ga napano Iliano Lu berenio ruei, napano berinavo mia Kulorinio Kenerinio riva totano mave tivelinio vameruo ka Atua na moroano toru.’ ”

⁷⁰Mia bogo na amijog iliano nei, abika denio, aberinavo “!Tomnei, venia na jibe na! ?Jau kojo kober jau naruei kobe Atua kenerinio memedu?” Ana na Yesu berdop̃elo bere “Verver kuvisidom kuver tibe na, mia tibe na ga naruei.”

⁷¹Mia bogo na amial Yesu jom̃a mijamo ka ber naio be Atua kenerinio, tiniel kirimimi, aber jibe nei aber “Kema na mil jibe na, kito robitilubar vatitig ka burum̃ara tokoriano joa naio ruei. Mia kito resiravo re bunu toro dolu ka rila veriiano na naio bereio, naio kiano iliano ga jibure naio bereio ruei.”